༢༠༡༠ ཕྱི་ཟླ་ ༣ ཚེས་ ༡༣ རེས་གཟའ་སྤེན་པ།

༄༅། །རྒྱ་རིགས་དམངས་གཙོ་དོན་གཉེར་བ་ཁག་གཅིག་རྡ་སར་ཆེད་ཕེབས་ཀྱིས་བོད་ལ་མིང་དོན་མཚུངས་པའི་རང་སྐྱོང་ཐོབ་རྒྱུའི་བོད་མིའི་མངོན་འདོད་དེར་རྒྱབ་སྐྱོར་ཤུགས་ཆེ་ཡོད་སྐོར་བརྗོད་ཡོད། ཨ་རི་དང་། (USA) ཉི་ཧོང་། (Japan) ཐེ་ཝན། (Taiwan) ཨོ་སི་ཊོ་ལི་ཡ། (Australia) ཐེ་ལན་ཌི། (Thailand) ཀེམ་པོ་ཌི་ཡ། (Cambodia) ཇར་མན། (Germany) ཁེ་ཎ་ཌ། (Canada)  ཧོང་ཀོང་། (Hongkong) བཅས་རྒྱལ་ཁབ་དགུ་ཙམ་ནང་རྟེན་གཞི་བྱས་པའི་རྒྱ་རིགས་དམངས་གཙོ་ལས་འགུལ་ཚོགས་པའི་འཐུས་མི་གྲངས་ ༢༢ ཙམ་ནས་གསུམ་བཅུའི་དུས་དྲན་ཐེངས་ ༥༡ མཛད་སྒོར་ལྷན་ཞུགས་གནང་བ་མ་ཟད། གསུམ་བཅུའི་དུས་དྲན་གྱི་མཛད་སྒོ་གྲུབ་མཚམས་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་གཞུང་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་འགྲེམས་སྟོན་ཁང་ (Tibet Museum) ནང་བོད་མི་ཚོའི་རང་དབང་འཐབ་རྩོད་ལ་གདུང་སེམས་མཉམ་སྐྱེ་མཚོན་ཆེད་བོད་མིའི་རང་དབང་གི་ལམ་བུ་ཞེས་པའི་རྡོ་ལེབ་འབུར་བརྐོས་ཀྱི་གཟུགས་བརྙན་ཞིག་བོད་མི་ཚོར་ལག་རྟགས་སུ་ཕུལ་ཡོད་པ་མ་ཟད། ཕྱི་ཚེས་ ༡༡ ཉིན་ཁོང་རྣམས་ནས་གསར་འགོད་གསལ་བསྒྲགས་ཤིག་སྤེལ་སྐབས་རྒྱ་ནག་དམངས་གཙོ་སྤྱི་མཐུན་ཚོགས་པའི་ (Federation For A Democratic China) འཐུས་མི་སྐུ་ཞབས་ཅིན་ཇིན་ (Chin Jin) ལགས་ཀྱིས་བརྗོད་དོན། ང་ཚོ་རྡ་སར་ཡོང་དོན་ནི་བོད་ཀྱི་གནད་དོན་དེ་རྒྱ་རིགས་དམངས་གཙོ་དོན་གཉེར་བ་གཅིག་པུ་བརྗོད་པ་ཙམ་མིན་པར་འཛམ་གླིང་ཚང་མས་ཤོད་རྒྱུའི་གོ་སྐབས་ཡོང་རྒྱུར་དམིགས་པ་ཞིག་ཡིན། འདས་པའི་ལོ་ ༥༠ རིང་བོད་ཀྱི་གནད་དོན་དེ་ལྟར་ལྷག་ཡོད་པ་ང་ཚོས་གསལ་པོ་ཤེས་ཀྱི་ཡོད། བོད་ཀྱི་དཀའ་ངལ་དེ་མ་འོངས་པར་ལམ་སེང་སེལ་ཐུབ་པའི་རྟགས་མཚན་གང་ཡང་མཐོང་གི་མེད། ༸གོང་ས་མཆོག་གི་དམིགས་བསལ་སྐུ་ཚབ་རྣམས་དང་རྒྱ་ནག་གཞུང་གི་སྐུ་ཚབ་དབར་འབྲེལ་མོལ་ཐེངས་དགུ་བྱས་ཀྱང་གྲུབ་འབྲས་གང་ཡང་བྱུང་མེད། དེར་བརྟེན་ང་ཚོས་བོད་ཀྱི་གནད་དོན་ལ་འགྱུར་བ་ཞིག་ཡོང་རྒྱུར་ཐབས་ལམ་གཞན་ཞིག་འཚོལ་ཞིབ་བྱེད་བཞིན་ཡོད། ཅེས་གསར་འགོད་པ་ཁག་གཅིག་ལ་གསུངས་ཡོད།

དེ་བཞིན་གསར་འགོད་པ་ཁག་གཅིག་གིས་རྒྱ་ནག་ནང་དམངས་གཙོ་ཁྱབ་སྤེལ་གཏོང་རྒྱུའི་འབད་བརྩོན་ཇི་ཡིན་དྲིས་པར་སྐུ་ཞབས་ཅིན་ཇིན་ལགས་ཀྱིས། དམངས་གཙོ་ནི་རྒྱ་མི་རིགས་ཀྱི་མངོན་འདོད་ཡིན་པ་དང་། རྒྱ་མི་རིགས་ཚོས་ལོ་ངོ་བརྒྱ་ཕྲག་རིང་འཐབ་རྩོད་བྱས་ཡོད། ང་ཚོས་འབད་བརྩོན་དེ་ཙམ་བྱེད་ཐུབ་མེད་ནའང་དོན་སྙིང་ལྡན་པ་ཞིག་རེད། གནས་སྟངས་དེ་འཛམ་གླིང་མི་ཚང་མས་ཤེས་རྒྱུའི་རེ་བ་ཡོད། ང་ཚོས་འཛམ་གླིང་གི་དབུ་ཁྲིད་ཚོར་རྒྱ་ནག་དང་རྒྱ་མི་རིགས་ཀྱི་གུ་ཡངས་མེད་པའི་སྤྱི་ཚོགས་ལ་གུ་ཡངས་ཀྱི་སྤྱི་ཚོགས་དང་སྲིད་དབང་སྒེར་གཅོད་ཀྱི་ལམ་ལུགས་ནས་དམངས་གཙོའི་ལམ་ལུགས་སུ་འགྱུར་རྒྱུར་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་རྒྱུ་དང་། འཛམ་གླིང་གི་དབུ་ཁྲིད་ཚོས་རྒྱ་མི་རིགས་ཚོར་དམངས་གཙོ་ཐོབ་རྒྱུ་དང་བོད་མི་ཚོར་མིང་དོན་མཚུངས་པའི་རང་སྐྱོང་ཐོབ་རྒྱུར་འགན་ཁུར་ཞུ་དགོས། རྒྱ་ནག་ནང་དམངས་གཙོ་ཡོང་རྒྱུ་དང་བོད་ནང་མིང་དོན་མཚུངས་པའི་རང་སྐྱོང་ཡོང་རྒྱུ་ཟེར་བ་ནི་ཊམ་ཁ་གཅིག་གི་ངོས་གཉིས་ལྟ་བུ་ཡིན། དེར་བརྟེན་ང་ཚོས་མཉམ་རུབ་ཐོག་ལས་ཀ་བྱེད་དགོས་ཞེས། ཞེས་འགྲེལ་བརྗོད་བྱས་ཡོད།