༢༠༡༠ ཕྱི་ཟླ་ ༣ ཚེས་ ༡ རེས་གཟའ་ཟླ་བ།
༄༅། ཕྱི་ལོ་ ༢༠༡༠ ཟླ་ ༢ ཚེས་ ༢༦ ཉིན་ལྔ་བཅུའི་ལམ་སྟོན་དུས་དྲན་ཚོགས་ཆུང་གིས་གོ་སྒྲིག་ཐོག་བཙན་བྱོལ་བོད་གཞུང་ལས་ཁུངས་མ་ལག་དང་བཅས་པའི་གཞུང་ཞབས་རྣམས་ནས་འབྱུང་འགྱུར་ལོ་ལྔ་བཅུའི་རིང་བོད་མི་རིགས་ཀྱི་རྩ་དོན་སྒྲུབ་ཕྱོགས་ཀྱི་འཆར་སྣང་བགྲོ་གླེང་ཚོགས་འདུ་ཞིག་ཉིན་གྲངས་གཉིས་རིང་རྡ་ཤོད་བོད་ཁྱིམ་ཚོགས་ཁང་ནང་སྐོང་ཚོགས་གནང་ཡོད། དེ་ཉིན་སྔ་དྲོ་ཆུ་ཚོད་ ༩།༣༠ ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་བཀའ་བློན་རྣམ་པ་དང་། ལས་ཁུངས་ཁག་གི་དྲུང་ཆེ་ཆུང་། ས་གནས་ཁག་གི་གཞིས་འགོ ལས་ཁུངས་མ་ལག་དང་བཅས་པའི་གཞུང་ཞབས་རྣམ་པ་བཅས་ཁྱོན་སྲི་ཞུ་བ་མི་གྲངས་ ༤༠༠ བརྒལ་བ་ཚང་འཛོམས་ཐོག་འབྱུང་འགྱུར་ལོ་ལྔ་བཅུའི་རིང་གི་འཆར་སྣང་བགྲོ་གླེང་ཚོགས་འདུ་ཚོགས་པར་ཐོག་མར་བཀའ་ཁྲི་མཆོག་གིས་དབུ་འབྱེད་ཀྱི་གསུང་བཤད་གནང་དོན། དེ་རིང་འདིར་ཚོགས་ཕེབས་གནང་མཁན་ཚང་མར་བཙན་བྱོལ་བོད་གཞུང་བཀའ་ཤག་དང་ང་རང་སྒེར་གྱི་ངོས་ནས་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། དེ་རིང་ང་ཚོ་འདིར་འཛོམས་རྒྱུ་དེ་རྒྱུན་གཏན་གྱི་ཚོགས་འདུ་ཞིག་གི་ངོ་བོ་མ་ཡིན་པར་དམིགས་བསལ་ཚོགས་ཕེབས་བའི་དགོངས་པར་ག་རེ་ཡོད་པ་ཆ་ཚང་བརྗོད་རྒྱུའི་གོ་སྐབས་ཡོད་པའི་ཚོགས་འདུ་དོན་སྙིང་ལྡན་པ་དང། གུ་ཡངས་པོ་དམིགས་ཡུལ་གཞི་རྒྱ་ཆེན་པོ་བཅས་ཀྱི་རེ་བ་བྱས་ཏེ་ཚོགས་འདུ་འདི་བསྐོང་ཚོགས་བྱས་པ་རེད། ཚོགས་འདུ་འདིའི་གྲོས་གཞི་འཆར་ཅན་གྱི་དང་པོ་གཉིས་པ་ཞེས་བརྗོད་རྒྱུ་གང་ཡང་མེད་པར་རྒྱ་ཆེན་པོ་དང་གུ་ཡངས་པོ་བྱས་ཏེ་བཞག་ཡོད། ཁྱེད་རང་ཚོ་སོ་སོའི་དགོངས་པའི་ནང་གང་གལ་གནད་ཆེན་པོ་གཟིགས་ཀྱི་ཡོད་པ་དང། གང་གསུང་འདོད་ཡོད་པ་ཚང་མ་བོད་མི་རིགས་ཀྱི་རྩ་དོན་དང་འབྲེལ་བ་ཡོད་པ་ཆོས་དང་། རིག་གཞུང་། ཤེས་རིག དཔལ་འབྱོར། ཆབ་སྲིད། གང་འདྲ་ཞིག་གི་སྐོར་ཡིན་ཡང་གསུང་སའི་གོ་སྐབས་ཡོད་ཅེས་སོགས་ཀྱི་གསུང་བཤད་གནང་ཡོད། ད་རེས་ཉིན་གཉིས་ཀྱི་ཚོགས་འདུ་དེ་འདས་པའི་གནས་ཚུལ་ཙམ་མ་ཟད། འབྱུང་འགྱུར་ཡང་བཙན་བྱོལ་བོད་མིའི་ལས་དབང་གི་ཁ་ཕྱོགས་ཇི་འདྲ་ཞིག་ཏུ་འགྲོ་མིན་བརྒྱ་ཆ་མང་ཤོས་བོད་གཞུང་གི་སྲི་ཞུ་བར་རག་ལུས་སྟབས། འདས་པའི་ལོ་ལྔ་བཅུའི་ཉམས་མྱོང་གཞིར་བཟུང་སྟེ་འབྱུང་འགྱུར་བོད་མི་རིགས་ཀྱི་རྩ་དོན་སྒྲུབ་ཕྱོགས་ཀྱི་ཁ་ཕྱོགས་དང་ཐབས་ལམ་ལ་ངེས་པ་རྙེད་པའི་ལམ་སྟོན་ལ་དམིགས་པ་ཞིག་ཡིན་འདུག
