༢༠༡༠ ཕྱི་ཟླ་ ༣ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༨ ཉིན་ས་སྐྱ་བདག་ཁྲི་རིན་པོ་ཆེ་མཆོག་དང་། རྒྱལ་བ་ཀརྨ་པ་རིན་པོ་ཆེ་མཆོག རྒྱུད་སྟོད་གྲྭ་ཚང་། ཕྱི་རྒྱལ་དགེ་སློང་བྷེ་རི་བཅས་ནས་ཇི་ལྟར་གསོལ་འདེབས་ཞུས་པ་བཞིན་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་པ་བཞི་སྦྲགས་ཀྱི་བཀའ་ཁྲིིད་ལེགས་པར་གྲུབ་སྟེེ་བླ་མ་རྒྱུད་མཆོད་དང་རྩེ་ལྗོངས་རྒྱུའི་བརྟན་བཞུགས་བསྟར་འབུལ་ཞུས་པ། དེ་ཡང་སྔ་དྲོ་ནས་སློབ་མ་རྣམས་ཀྱིས་གསང་འདུས་བདག་བསྐྱེད་སྔོན་དུ་གསུང་བའི་སྒོ་ནས་ཆུ་ཚོད་ ༩།༠༠ ཐོག་༸གོང་ས་མཆོག་ཕོ་བྲང་ནས་དཔལ་ས་སྐྱ་བདག་ཁྲི་རིན་པོ་ཆེ་མཆོག་དང་། རྒྱལ་བ་ཀརྨ་པ་རིན་པོ་ཆེ་མཆོག རྒྱུད་སྟོད་མཁན་རིན་པོ་ཆེ་མཆོག ཆོས་རིག་བཀའ་བློན་བཅས་ཀྱིས་སྤོས་སྣེས་སྔོན་བསུས་ཀྱིས་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་བླ་མ་རྒྱུད་མཆོད་གཞུང་བཞིན་གསུང་གྲུབ་པ་དང་། དེ་རྗེས་བཙན་བྱོལ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་བོད་ནང་དྲག་པོའི་ཁྲིམས་གཞི་བསྡམས་ཏེ་ལོ་ ༢༠ འཁོར་བར་མཆོད་འབུལ་སྐྱབས་ཐོ་སྙན་གསེང་ཞུས་ཡོད། དེ་ནས་བཟང་སྤྱོད་སྨོན་ལམ་གསུང་འདོན་གནང་། བརྟན་བཞུགས་ཀྱི་ཐོག་མར་དཔལ་ལྡན་ས་གསུམ་མ། སྐབས་གསུམ་པ། གསོལ་འདེབས་མལ་སྐབས་ས་སྐྱ་བདག་ཁྲི་རིན་པོ་ཆེ་མཆོག་དང་། རྒྱལ་བ་ཀརྨ་པ་རིན་པོ་ཆེ་མཆོག རྒྱུད་སྟོད་མཁན་རིན་པོ་ཆེ་དང་མཁན་ཟུར་རྣམ་གཉིས། དགེ་འདུན་བགྲེས་པ་ ༡༦ བཅས་ནས་མཇལ་ཁ་ཞུས་རྗེས་༸རྒྱལ་བའི་ཞབས་བརྟན་གསུང་། གཏང་རག་མལ་སྐབས་ཕྱི་རྒྱལ་དགེ་སློང་བྷེ་རི་དང་རྒྱུད་སྟོད་བླ་མ་དབུ་མཛད་ནས་མལ་རྟེན་གསུམ་འདེགས་འབུལ་ཞུས། དེ་རྗེས་རྒྱུད་སྟོད་ཕྱག་མཛོད་ལས་བྱེད་ ༡༤ ཙམ་ལ་མཇལ་ཁ་ཞུས་པ་དང་ཕྱོགས་མཚུངས་གསང་འདུས་ཚོགས་འཁོར། ཉི་གཞོན་འཆར་ཀ་མ། བསྟན་རྒྱས་སྨོན་ལམ། གསང་འདུས་བཀྲ་ཤིས་བཅས་འདོན་གནང་། བརྟན་བཞུགས་བསྟར་འབུལ་སྐབས་དཔལ་ས་སྐྱ་བདག་ཁྲི་རིན་པོ་ཆེ་མཆོག་དང་། རྒྱལ་བ་ཀརྨ་པ་རིན་པོ་ཆེ་མཆོག རྒྱུད་སྟོད་མཁན་རིན་པོ་ཆེ་མཆོག བཙན་བྱོལ་བོད་གཞུང་གི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན། ཆོས་རིག་བཀའ་བློན་མཆོག དེ་བཞིན་སེར་སྐྱ་མི་མང་བཅས་ཁྱོན་མི་གྲངས་སྟོང་ཙ་བརྒལ་བ་བཅར་ཡོད་པ་བཅས་སོ།
