༢༠༡༠ ཕྱི་ཟླ་ ༣ ཚེས་ ༡༨ རེས་གཟའ་ཕུར་བུ།
༸གོང་ས་མཆོག་དང་མདྷ་ཡ་པར་ཌེ་ཤིའི་མངའ་སྡེའི་བློན་ཆེན་དེ་བཞིན་མངའ་སྡེའི་སྤྱི་ཁྱབ་མཆོག་བཅས།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་མདྷ་ཡ་པར་ཌེ་ཤིའི་མངའ་སྡེའི་གྲོས་ཚོགས་ནང་ (Madhya Pradesh Assembly) འགྲོ་བ་མིའི་ཐོབ་ཐང་དང་འབྲེལ་བའི་ལྷན་ཚོགས་ཤིག་ཏུ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བཀའ་དྲིན་བསྐྱངས་གནང་མཛད། ཀུན་ཁྱབ་འགན་ཁུར་གྱི་ལམ་ནས་འགྲོ་བ་མིའི་ཐོབ་ཐང་། ཞེས་པའི་བརྗོད་གཞིའི་ཐོག་ཚོགས་པའི་ལྷན་ཚོགས་དེ་གོ་སྒྲིག་གནང་མཁན་མདྷ་ཡ་པར་ཌེ་ཤིའི་འགྲོ་བ་མིའི་ཐོབ་ཐང་ཚོགས་ཆུང་ (Madhya Pradesh Human Rights Commission) ཞེས་པ་དེ་ཡིན། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྩལ་དོན། རྒྱ་གར་ནང་ཆོས་ལུགས་རིས་མེད་ཀྱི་ལྟ་གྲུབ་ཁྱད་པར་བ་ཞིག་ཡོད་པ་དེས་ཁུལ་དེའི་མང་གཙོའི་འགྲོ་ལུགས་ལ་ལམ་ལྷོང་ཡོང་བའི་ཆ་རྐྱེན་གལ་ཆེ་ཞིག་ཐོག་མཐུན་འགྱུར་སྐྲུན་ཐུབ་ཅེས་བཀའ་སྩལ། དེ་བཞིན་༸གོང་ས་༸སྐྱབ་མགོན་ཆེན་པོ་མཆོག་གིས་ཐུན་མོང་མིན་པའི་མིའི་རིགས་ཀྱི་ཁྱད་ཆོས་བྱམས་པ་དང་བརྩེ་བ། ཀུན་ཁྱབ་མཛའ་གྲོགས་ཀྱི་འདུ་ཤེས་དེ་དག་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་གཙོ་བོ་དེ་ཡིན་སྐོར་བཀའ་སྩལ་དོན། ཐུན་མོང་མིན་པའི་མིའི་རིགས་ཀྱི་ཁྱད་ཆོས་བྱམས་པ་དང་བརྩེ་བ། ཀུ་ཁྱབ་མཛའ་གྲོགས་ཀྱི་འདུ་ཤེས་དེ་དག་གིས་སྤྱི་ཚོགས་རྣམ་དཔྱོད་ལྡན་པ་ཞིག་ཡོང་བ་དང་དབུལ་ཕོངས་དང་། མི་རིགས་དབྱེ་འབྱེད། ཆོས་ལུགས། འདྲ་མཉམ་མིན་པའི་སྤྱི་ཚོགས་ཀྱི་གནས་སྟངས་དེ་དག་ལ་བརྟེན་ནས་བྱུང་བའི་འགྲོ་བ་མིའི་ཐོབ་ཐང་རྡོག་རོལ་གཏོང་རྒྱུ་དེ་དག་མཚམས་འཇོག་བྱེད་ཐུབ། བྱམས་པ་དང་བརྩེ་བ་ནི་འགྲོ་བ་མིའི་ཐོབ་ཐང་བསྲུང་སྐྱོབ་བྱེད་མཁན་གཙོ་བོ་དེ་ཡིན། འགྲོ་བ་མིའི་རྣམ་དཔྱོད་ཀྱི་སྩལ་ཆ་ཐམས་ཅད་ནས་ཡར་རྒྱས་གོང་མཐོར་ཡོང་བར་མི་སྒེར་སོ་སོར་རང་དབང་དགོས། རང་དབང་མེད་ན་རང་གི་རྣམ་དཔྱོད་ཀྱི་སྩལ་དེ་འཕེལ་རྒྱས་མི་ཐུབ། རང་དབང་དེ་སྤྱི་ཚོགས་ཇི་འདྲ་ཞིག་ཡིན་ནའང་ཡར་རྒྱས་འགྲོ་རྒྱུའི་མེད་དུ་མི་རུང་བའི་ཆ་རྐྱེན་ཤིན་ཏུ་གལ་ཆེ་ཞིག་ཆགས་ཡོད། དེ་འདྲའི་རང་དབང་དེ་ཡོང་བར་ང་ཚོ་ཚང་མ་གཅིག་པ་ཡིན་ཞེས་ཀུན་ཁྱབ་འགན་ཁུར་ཐོག་འདྲ་མཉམ་གྱི་བསམ་བློ་ཞིག་སྐྱེད་ཐུབ་དགོས། མི་རྣམས་ཆོས་ལུགས་མི་གཅིག་པ་དང་། སྐད་ཡིག་མི་གཅིག་པ། ས་གནས་མི་གཅིག་པ་སོ་སོར་འཚོ་གནས་བྱེད་བཞིན་ཡོད་ནའང་འགྲོ་བ་མི་ཞིག་ཡིན་པ་འདྲ་མཉམ་ཆགས་ཡོད། དངུལ་དང་དཔལ་འབྱོར་གཅིག་པུས་མི་ཚེའི་བདེ་སྐྱིད་བསྐྲུན་ཐུབ་ཀྱི་མེད།
༸གོང་ས་མཆོག་གིས་མདྷ་ཡ་པར་ཌེ་ཤིའི་མངའ་སྡེའི་གྲོས་ཚོགས་ནང་འགྲོ་བ་མིའི་ཐོབ་ཐང་ཀུན་ཁྱབ་འགན་ཁུར་གྱི་ལམ་ནས་ཡོང་དགོས་སྐོར་བཀའ་སློབ་སྩོལ་བཞིན་པ
ད་ལྟའི་ཆར་དངུལ་དེ་ཧ་ཅང་གལ་ཆེ་ཆགས་ཡོད། སྤྱི་ཚོགས་ཡར་རྒྱས་ཡོང་བར་དཔལ་འབྱོར་ནུས་ཤུགས་གོང་མཐོར་གཏོང་རྒྱུ་དེ་གལ་ཆེ་ཆགས་ཡོད། འོན་ཀྱང་རང་རྒྱུད་ལ་འགྲོ་བ་མིའི་རིན་ཐང་དེ་འཇགས་རྒྱུ་ནི་དེ་མཚུངས་ཀྱི་གལ་ཆེ་ཞིག་ཆགས་ཡོད། དངུལ་གྱིས་རང་ལ་གང་དགོས་ཀྱི་མཐུན་རྐྱེན་བཟང་པོ་དང་འདོད་ཡོན་ལོངས་སྤྱོད་རྒྱས་སྤྲོད་ཐོག་ལོངས་སུ་སྤྱོད་རྒྱུའི་མཐུན་རྐྱེན་སྐྲུན་ཐུབ། འོན་ཀྱང་དངུལ་སྤྲད་ནས་སེམས་ཀྱི་ཞི་བདེ་ཉོ་ཐུབ་བམ། དེར་བརྟེན་ང་ཚོས་རང་གི་ནང་གི་རིན་ཐང་ཐོག་དོ་སྣང་ཆེ་ཙམ་སྤྲོད་དགོས་པ་ཞིག་ཆགས་ཡོད། བྱམས་བརྩེ་ནི་མི་སྒེར་དང་སྤྱི་ཚོགས་བདེ་སྐྱིད་ལྡན་པ་ཞིག་ཡོང་བར་སྔོན་འགྲོའི་ཆ་རྐྱེན་ཞིག་ཆགས་ཡོད། རྒྱ་གར་ནང་བྱམས་བརྩེར་གཞི་བཅོལ་བའི་འཚེ་མེད་ཞི་བའི་ཐོག་ཆོས་ལུགས་མཐུན་སྒྲིལ་གྱི་མཉམ་ལེན་བྱེད་རྒྱུའི་སྲོལ་རྒྱུན་གྱི་ལམ་བཟང་ཞིག་དར་འཕེལ་བྱུང་ཡོད། ངོས་རང་སྲོལ་རྒྱུན་གྱི་ལམ་བཟང་དེ་བརྡ་ལེན་སྤྲོད་བཞིན་ཡོད་པས་ངོས་རང་རྒྱ་གར་གྱི་བང་ཆེན་ལྟ་བུ་ཞིག་ཡིན་ཞེས་བརྗོད་ཐུབ་ཅེས་བཀའ་སྩལ། དེ་བཞིན་དེང་སང་བཟང་སྤྱོད་ཉམས་ཆག་འགྲོ་བཞིན་པའི་གནས་སྟངས་ཐོག་བཀའ་སྩལ་དོན། གནས་སྟངས་དེ་ཆོས་ལུགས་ཚང་མར་འཕྲད་བཞིན་པའི་གནས་སྟངས་ཙམ་མིན་པར་དེ་བས་གཏིང་ཟབ་པ་མིའི་རིན་ཐང་ཐོག་ཉམས་ཆག་འགྲོ་བཞིན་པའི་གནས་སྟངས་ཤིག་ཆགས་ཡོད། དེར་བརྟེན་བྱམས་བརྩེ་དང་བཟོད་བསྲན་གྱི་ཉམས་ལེན་དེ་གོང་མཐོར་གཏོང་རྒྱུར་འབད་བརྩོན་བྱེད་དགོས། སྒེར་སུ་ཡིན་རུང་མཐའ་ན་དུད་འགྲོ་ཡན་ཆད་ལ་སྡུག་བསྔལ་ལས་གྲོལ་རྒྱུའི་ཐོབ་ཐང་ཡོད། ང་ཚོ་ཚང་མ་འགྲོ་བ་མི་ཞིག་ཡིན་པ་གཅིག་མཚུངས་ཡིན། མི་གཉིས་དབར་ཕན་ཚུན་སྐད་རིགས་མི་འདྲ་བས་བར་དུ་ཆོད་པའི་ཁྱད་པར་ཕྲན་བུ་ཡོང་བཞིན་ཡོད་ནའང་ཁོང་གཉིས་དབར་འབྲེལ་ལམ་དེ་ད་དུང་ལུས་ཀྱི་རྣམ་འགྱུར་ཐོག་ནས་ལས་སླ་པོར་ཡོང་ཐུབ། དཔེར་ན་ལུས་ཀྱི་རྣམ་འགྱུར་འཛུམ་མདངས་ཚུན་ཆད་ཀྱི་ཐོག་ནས་ཁོང་གཉིས་དབར་འབྲེལ་བ་ཡོང་ཐུབ།ངོས་ཀྱི་མི་ཚེ་མང་ཆེ་བ་དེ་རྒྱ་གར་ནང་འཚོ་གནས་བྱས་ཡོད། ངོས་ཀྱི་ལུས་པོ་དེ་འདས་པའི་ལོ་བཅུ་ཕྲག་འགའ་ཤས་རིང་རྒྱ་གར་གྱི་བག་ལེབ་དང་ལྡ་ལི་ལ་བརྟེན་ནས་འཚོ་ཡོད། དེར་བརྟེན་གནས་སྟངས་དེ་འདྲའི་འོག་ངོས་རང་རྒྱ་གར་བ་ཞིག་ཆགས་ཡོད་ཅེས་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་ནང་ཆོས་དེར་ཆ་གསུམ་ཕྱེ་གནང་མཛད་ནས་བཀའ་སྩལ་དོན། ནང་ཆོས་ལ་སློབ་གཉེར་བྱ་རྒྱུའི་གཙོ་བོ་ཆ་གསུམ་འབྱེད་ཆོག་ནང་པའི་ཚན་རིག ནང་ཆོས་ཀྱི་ལྟ་གྲུབ། ནང་ཆོས་དང་འབྲེལ་བའི་ཉམས་ལེན་བཅས་ཡིན། ཆ་དང་པོ་གཉིས་པོ་དེ་དེང་དུས་ཤེས་ཡོན་ལམ་ལུགས་གསར་པའི་ནང་འཇོག་ཐུབ་ཅེས་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་མུ་མཐུད་ནས་བཀའ་སློབ་སྩལ་དོན།དངུལ་དང་དཔལ་འབྱོར་གྱིས་དངོས་པོའི་དགོས་མཁོ་མང་པོ་ཉོ་ཐུབ་ཀྱང་བློ་གྲོས་ཀྱི་ཤེས་རབ་དང་སེམས་ཀྱི་ཞི་བདེ་ཉོ་མི་ཐུབ། བློ་གྲོས་ཀྱི་ཤེས་རབ་ཡོང་བར་མི་རྣམས་ཀྱིས་ཆོས་དང་མིའི་རིན་ཐང་དེ་དག་རྒྱུད་ལ་འཇགས་དགོས། དངོས་པོའི་འཛུགས་སྐྲུན་ཐོག་ཡར་རྒྱས་ཕུལ་དུ་བྱུང་བའི་ལུང་པ་དེ་ཚོའི་མི་རྣམས་ལ་ནང་གི་རིན་ཐང་མ་འདང་པ་དེ་འདྲ་ཡོད། ལུང་པ་དེ་ཚོའི་ནང་ཡོད་པའི་གཞོན་སྐྱེས་ཚོ་རང་སྣང་གང་དྲན་གྱི་མི་ཚེ་སྐྱེལ་བཞིན་ཡོད་པའི་གནས་སྟངས་ཆགས་ཡོད་སྐོར་བཀའ་སྩལ། དེ་ཡང་སྐབས་དེར་མགོན་པོ་གང་ཉིད་མཆོག་གིས་བྱམས་བརྩེ་དང་བཟོད་བསྲན་གྱི་རིན་ཐང་གོང་མཐོར་གཏོང་བར་བུད་མེད་ཚོས་མང་གཙོའི་ཁེ་ཕན་ལེན་པའི་ཐོག་ནུས་ཤུགས་འདོན་དགོས་ཚུལ་བཀའ་སྩལ་དོན། ལུས་ཁམས་གྲུབ་ཚུལ་གྱི་ཆ་ནས་བུད་མེད་ཚོར་བྱམས་བརྩེའི་གོམས་པ་ཆེ་བ་ཡོད། ངོས་རང་ལ་ཆ་བཞག་ན་ངོས་ཀྱི་རྒྱུད་ལ་བྱམས་བརྩེའི་ས་བོན་དེ་ངོས་ཀྱི་མ་ལས་བྱུང་བ་ཞིག་ཡིན། ཕྱིས་སུ་ནང་ཆོས་ཀྱིས་གོང་འཕེལ་གཏོང་རྒྱུར་ཕན་གྲོགས་བྱུང་། ཅེས་བཀའ་སྩལ། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་སྒེར་གྱི་དགོངས་བཞེད་ལྟར་ན་ཆོས་ལུགས་འདྲ་མིན་མང་པོ་ཡོད་ཀྱང་ཆོས་ལུགས་ཚང་མས་སོ་སོའི་རྗེས་འཇུག་པ་ཚོར་ཕན་ཐོགས་ཡོད་པར་བརྟེན་ཆོས་ལུགས་དེ་དག་དབར་ཁྱད་པར་དེ་ཙམ་མེད། དཔེར་ན། སྨན་མང་པོ་ཡོད་པའི་ནང་ནས་མཛུབ་སྟོན་གྱིས་སྨན་འདི་མཆོག་དང་འདི་ཞན་ཞེས་བརྗོད་མི་ཐུབ་པ་ལྟར་ཆོས་ལུགས་འདི་མཆོག་དང་གཞན་རྣམས་བེད་སྤྱོད་དེ་ཙམ་མེད་པ་བརྗོད་མི་ཐུབ་ཅེས་བཀའ་སྩལ། དེ་བཞིན་མགོན་པོ་གང་ཉིད་མཆོག་ཆོས་ལུགས་འདྲ་མིན་གྱི་གནས་ཆེན་ཁག་ལ་གནས་མཇལ་དུ་ཆིབས་སྒྱུར་བསྐྱང་རྒྱུར་སྐུ་ངལ་གང་ཡང་གཟིགས་ཀྱི་མེད་པ་དང་། དུས་ཡུན་རིང་པོའི་སྔོན་གྱི་སྐབས་ཤིག་ལ་༸གོང་ས་མཆོག་གིས་ཉིན་གཅིག་གི་དུས་ཚོད་དེ་ཐོག་མར་ཡེ་ཤུའི་ལྷ་ཁང་དང་། དེ་རྗེས་ཁ་ཆེའི་ལྷ་ཁང་། དེ་ནས་ཧིན་དྷུའི་ལྷ་ཁང་། དེ་རྗེས་སིཀ་ཀྱི་ལྷ་ཁང་བཅས་ལྷ་ཁང་སོ་སོར་གནས་མཇལ་ལ་ཆིབས་སྒྱུར་བསྐྱངས་པ་ཞིག་ཐུགས་དྲན་གསོ་བཞིན་ཡོད་སྐོར་བཀའ་སྩལ། དེ་རྗེས་ཞལ་ཤོབ་དང་སྦྲགས་མགོན་པོ་གང་ཉིད་མཆོག་སྐབས་དེར་སིཀ་ཀྱི་ལྷ་ཁང་ནང་གི་བྱིན་རླབས་ཀྱི་ཁ་ཟས་དེ་བྲོ་བ་ཆེ་བ་ཙམ་མ་ཟད་གསོལ་གྲོད་ལའང་ཕན་པོ་བྱུང་ཡོད་སྐོར་བཀའ་སྩལ།
སྐབས་དེར་འགྲོ་བ་མིའི་རིན་ཐང་དང་འགྲོ་བ་མིའི་ཐོབ་ཐང་། ཞེས་པའི་དཔེ་དེབ་གསར་པ་ཞིག་༸གོང་ས་མཆོག་གིས་དབུ་འབྱེད་མཛད། རེས་གཟའ་ལྷག་པའི་ཉིན་མངའ་སྡེའི་སྤྱི་ཁྱབ་མཆོག་གིས་༸གོང་ས་མཆོག་ལ་ཁོང་གི་བཞུགས་གནས་མགྲོན་ཁང་ནང་གདན་འདྲེན་ཞུས་ནས་ཉིན་གུང་གི་ལྗགས་སྨིན་ཞིག་ཕུལ་ཡོད
