༢༠༡༠ ཕྱི་ཟླ་ ༢ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༣ ཉིན་ཟི་ལིང་གྲོང་ཁྱེར་གྱི་ཟ་ཁང་ཞིག་གི་ནང་ནས་འཛིན་བཟུང་བྱས་པའི་བོད་མི་གཞས་པ་བཀྲིས་དོན་གྲུབ་ལགས་ལ་སོག་རྫོང་མི་མང་ཁྲིམས་ཁང་གིས་ཆབ་སྲིད་དང་འབྲེལ་བའི་གླུ་གཞས་བཏང་བའི་ཉེས་འཛུགས་འོག་ལོ་གཅིག་དང་ཟླ་བ་བདུན་གྱི་བཙོན་འཇུག་དུས་བཀག་བཟོས་ཡོད། ཁོང་ཉེན་རྟོག་པས་འཛིན་བཟུང་བྱས་ནས་ཟི་ལིང་གྲོང་ཁྱེར་གྱི་བཙོན་ཁང་ནང་ཟླ་བ་གཉིས་ཙམ་བཀག་ཉར་ཐོག་མནར་གཅོད་ཚད་མེད་བཏང་ཡོད་པ་མ་ཟད། ནང་མི་དང་སྤན་མཆེད་སུ་གཅིག་ཀྱང་ཐུག་འཕྲད་བྱེད་བཅུག་མེད། རྗེས་སུ་ཟི་ལིང་ནས་རྨ་ལྷོ་སོག་རྫོང་གི་བཙོན་ཁང་དུ་གནས་སྤོས་བྱས་ཏེ་ཁྲིམས་ཐག་མ་གཅད་གོང་ཁོང་གི་ཕ་རྒན་དང་ཐུག་རྒྱུའི་གོ་སྐབས་ཤིག་སྤྲད་ཡོད། སོག་རྫོང་གི་བཙོན་ཁང་ནང་སླེབས་སྐབས་ཁོང་གི་གདོང་པའི་ངོས་ཚང་མར་རྨ་ཁ་བཟོས་ཡོད་པ་རེད། ཁོང་གི་གྱོད་གཞི་དེར་སོག་རྫོང་ཁྲིམས་ཁང་ནང་ཁྲིམས་བཤེར་བྱེད་སྐབས་ནང་མི་སྤན་མཆེད་སོགས་མི་བཞི་བཅུ་ལྷག་ཁོང་ཐུག་འཕྲད་དུ་ཕྱིན་ཡོད་ཀྱང་ཁྲིམས་རར་ཁོང་གི་ཕ་རྒན་མ་གཏོགས་གཞན་སུ་གཅིག་དང་ཐུག་འཕྲད་བྱེད་བཅུག་མེད་པ་མ་ཟད། ཁོང་གི་ཁྲིམས་རྩོད་པའི་མཐུན་རྐྱེན་གྱི་ཐོབ་ཐང་དེ་ཡང་ཕྲོགས་ཡོད་པ་རེད། བཀྲིས་དོན་གྲུབ་ལགས་ཀྱིས་ཕྱི་ལོ་ ༢༠༠༨ ལོར། ང་དགུ་ལོ། ཞེས་པའི་གཞས་ཤིག་བཏང་བར་རྒྱ་ནག་གཞུང་གིས་ཁོང་གི་གཞས་དེར་ཆབ་སྲིད་དང་འབྲེལ་བ་ཡོད་སྐོར་གྱིས་གླུ་གཞས་ཀྱི་འོད་སྡེར་དེ་ཕྲལ་མར་བཀག་སྡོམ་གྱི་བཙན་བཀའ་བཏང་ཡོད། དེ་རྗེས་ཕྱི་ལོ་ ༢༠༠༩ ལོར་སླར་ཡང་ཁོང་གིས་རྨ་ཁ་མེད་པའི་གཅར་རྡུང། ཞེས་པའི་གླུ་གཞས་ཤིག་བཏང་ཡོད། གླུ་གཞས་དེར་བོད་མི་ཚོས་དགའ་མོས་ཆེན་པོ་བྱས་ནས་ཟླ་བ་གཅིག་ནང་གླུ་གཞས་ཀྱི་འོད་སྡེར་ (CD) གྲངས་ ༥༠༠༠ ཙམ་ཉོ་མཁན་བྱུང་འདུག འོན་ཀྱང་རྒྱ་ནག་གཞུང་གིས་འོད་སྡེར་དེ་འགྲེམས་སྤེལ་མི་ཆོག་པའི་བཙན་བཀའ་བཏང་ཡོད་པ་མ་ཟད་། ཁོང་རྒྱ་ནག་གཞུང་གིས་འཛིན་བཟུང་བྱ་རྒྱུའི་གསལ་བསྒྲགས་བྱས་རྐྱེན་ཁོང་རང་གི་ཕ་ཡུལ་དུ་གནས་མ་ཐུབ་པར་ས་གནས་གཞན་དུ་བྲོས་འགྲོ་དགོས་བྱུང་འདུག ད་ལྟའི་ཆར་གཞས་པ་བཀྲིས་དོན་གྲུབ་ལགས་རྨ་ལྷོ་སོག་རྫོང་གི་བཙོན་ཁང་དུ་ཡོད་པ་བཅས།།
