༢༠༠༩ ཕྱི་ཟླ་ ༡༢ ཚེས་ ༡༥ རེས་གཟའ་མིག་དམར།
༄༅། །ང་ཚོའི་འབྲེལ་མོལ་གྱི་ལས་རིམ་སྐོར་རྒྱ་ནག་དབུས་དམར་ཤོག་ཚོགས་པའི་འཐབ་ཕྱོགས་གཅིག་གྱུར་ལས་ཁང་གི་རྒྱུན་ལས་ཀྲུའུ་ཞི་གཞོན་པ་ཀྲུའུ་ཝའེ་ཆུན་ལ་བཅར་འདྲི་ཞུས་པ་ཞིག་རྒྱ་ནག་གི་གསར་འགྱུར་བརྒྱུད་ལམ་ཐོག་འདི་ཟླ་ ༡༢ ཚེས་ ༨ ཉིན་ཐོན་འདུག
ད་ལྟ་ང་ཚོས་རྒྱ་ནག་གི་འགོ་ཁྲིད་ཚན་ཁག་དང་སྐབས་རྗེས་མའི་འབྲེལ་མོལ་སྐོར་གོ་བསྡུར་བྱེད་སྒང་ཡིན་པར་བརྟེན། བཅར་འདྲི་འདི་སྤེལ་བསྒྲགས་བྱེད་པའི་དུས་ཚོད་དང་། དེའི་ནང་དོན་བཅས་པ་མགོ་རྙོག་གི་རང་བཞིན་དུ་གྱུར་ཞིང་། ངའི་ཤེས་ཚོད་ལྟར་ན། རྒྱ་ནག་གི་འགོ་ཁྲིད་ཚན་ཁག་ནས་རང་རེ་དང་མཚུངས་པར་འཕྲོས་མོལ་རྒྱུན་མཐུད་བྱེད་འདུན་འཆང་གི་ཡོད་ཅིང་། ནམ་ཕུགས་དེ་དག་བོད་དོན་ཐད་གཉིས་མོས་གྲོས་བསྡུར་གྱི་ལམ་ནས་ཐག་གཅོད་ཅིག་ཡོང་བའི་ཕྱོགས་སུ་འཕེལ་རྒྱས་འགྲོ་རྒྱུར་ང་ཚོས་རེ་བ་བྱེད་ཀྱི་ཡོད།
ཕྱི་ལོ་ ༢༠༠༦ ཟླ་ ༢ པར་འབྲེལ་མོལ་ཐེངས་ལྔ་པ་བསྐྱངས་སྐབས་རྒྱ་ནག་གཞུང་ཕྱོགས་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཞེངས་ཕྱོགས་ཏེ། གང་ཉིད་ནས་བོད་རང་བཙན་རྩོད་ལེན་མི་གནང་བར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་གནས་རྒྱུའི་དགོངས་གཞི་འཆང་གི་ཡོད་པ་དེར་བསྔགས་བརྗོད་གསལ་པོ་ཞུས་ཡོད།
སྐབས་དེར་ཚོགས་འདུའི་ནང་བཀའ་མོལ་ཇི་བྱུང་བོད་ཡིག་ཐོག་སྒྲ་ཕབ་ཞུས་པར་གཞིགས་ན། རྒྱ་ནག་གཞུང་ཕྱོགས་ནས་༸གོང་ས་མཆོག་གི་བཞེངས་ཕྱོགས་ལ་ ” གཏམ་བཟང་པོ་(གནས་ཚུལ་བཟང་པོའམ། དགའ་བསུ་ཞུ་འོས་པའི་གནས་ཚུལ་) “ཞེས་བརྗོད་ཡོད། བཀའ་མོལ་ཞིབ་ཕྲ་འདིར་ལུང་འདྲེན་བྱས་ན། “(ཏཱ་ལའི་བླ་མས་)རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་གཞི་རྩར་བཟུང་བའི་ཐོག་ནས་དཀའ་རྙོག་སེལ་འདོད་ཡོད་ཅེས་གསུངས་ཏེ་རྣམ་འགྱུར་ཞིག་སྟོན་གྱི་ཡོད་པ་དེ་ནི་དགའ་བསུ་ཞུ་འོས་པའི་གནས་ཚུལ་ཞིག་ཡིན། ” ཞེས་གསལ་འདུག ང་ཚོས་འདི་དག་ད་ཕན་རྒྱ་གཞུང་གི་འབྲེལ་ཡོད་དཔོན་རིགས་ཚོ་དང་མཉམ་དུ་འབྲེལ་མོལ་བྱེད་པའི་བརྒྱུད་རིམ་ཁྲོད་ཡར་རྒྱས་ཆུང་ཆུང་ཞིག་ཡིན་ནའང་དེ་དག་གལ་ཆེན་པོ་ཡིན་པའི་ལྟ་ཚུལ་བཟུང་ཡོད། དེ་དུས་ང་ཚོར་༸གོང་ས་མཆོག་གིི་བཞེངས་ཕྱོགས་ཏེ། གང་ཉིད་ནས་གཉིས་མོས་ཀྱི་ཐག་གཅོད་ཅིག་ཡོང་བའི་འབད་བརྩོན་གནང་བ་དེ་རྒྱ་ནག་གཞུང་ཕྱོགས་ལ་ཐུགས་སྣང་ཡོང་གི་འདུག་སྙམ་པའི་ཚོར་སྣང་ཐེངས་དང་པོ་བྱུང་། འདི་ནི་ང་ཚོས་འབྲེལ་མོལ་གྱི་ལས་རིམ་ཁྲོད་བཟང་པོའི་ཆ་ཤས་རྣམས་གསལ་སྟོན་བྱས་དང་བྱེད་བཞིན་ཡོད་པའི་ནང་རྒྱ་ནག་གཞུང་ཕྱོགས་ནས་ཕྱི་ལོ་ ༢༠༠༢ ལོར་འབྲེལ་བ་སླར་གསོ་བྱུང་བ་ནས་ད་བར་ལོ་ལྔ་སོང་བའི་རིང་བཟང་པོའི་རྣམ་འགྱུར་སྟོན་པའི་ནང་གི་གཅིག་ཡིན་ཞིང་། སྐབས་དེར་ང་ཚོ་བཞུགས་སྒར་དུ་ཕྱིར་འཁོར་མ་ཐག་དེ་དག་༸གོང་ས་༸སྐྱབས་མགོན་ཆེན་པོ་མཆོག་ལ་༸སྙན་སེང་ཞུས་པ་ཡིན།
དེ་མཚུངས་རྒྱ་ནག་གཞུང་ཕྱོགས་ནས་ཐག་གཅོད་བྱེད་དགོས་པའི་གནད་དོན་དུ་མའི་ཐོག་ང་ཚོའི་དོ་སྣང་བསྐྲུན་པར་བྱས་ཤིང་། ང་ཚོའི་ངོས་ནས་༸གོང་ས་མཆོག་གིས་སེམས་འཚབ་ཀྱི་གནས་ཚུལ་དེ་དག་ཐམས་ཅད་བསྒྲགས་གཏམ་ཞིག་བརྒྱུད་སེལ་བཞེད་ཡོད་ལུགས་བརྒྱུད་ཞུ་བྱས་པར་མ་ཟད། འབྲེལ་མོལ་ཐད་གལ་ཆེའི་མཇུག་འབྲས་འདོད་བློ་ཁེངས་པ་ཞིག་ཡོང་བའི་འགན་སྲུང་ཆེད་བསྒྲགས་གཏམ་གྱི་ཚིག་གཞིའི་ཐད་ཕྱོགས་ཕན་ཚུན་གཉིས་ཀ་གྲོས་འདྲི་བྱས་འཐུས་བསམ་འཆར་ཡང་ཞུས་པ་ཡིན། འོན་ཀྱང་རྒྱ་ནག་གཞུང་ཕྱོགས་ནས་ང་ཚོའི་འབད་བརྩོན་འདིར་ཡ་ལན་ཙམ་ཡང་བྱས་མེད།
དེ་ལས་ལྡོག་སྟེ། ཕྱི་ལོ་ ༢༠༠༦ ཟླ་ ༥ ཙམ་ནས་དབང་འཛིན་པ་ཚོས་བོད་ནང་རྒྱལ་གཅེས་སློབ་གསོ་ལ་སོགས་ཆབ་སྲིད་ཀྱི་ལས་འགུལ་སྤེལ་རྒྱུ་ཛ་དྲག་ཏུ་བཏང་བ་མ་ཟད། ༸གོང་ས་མཆོག་ལ་མཚན་སྨད་ཞུ་རྒྱུ་དང་། བོད་མིའི་ཆོས་ལུགས་ཀྱི་བྱེད་སྒོ་ཐོག་དམ་བསྒྲགས་ཆེ་རུ་བཏང་ཡོད་པ་རེད།
ཕྱི་ལོ་ ༢༠༠༨ ནང་བོད་ས་ཡོངས་སུ་ཞི་བའི་ངོ་རྒོལ་གཅིག་མཇུག་གཉིས་མཐུད་བྱུང་རྗེས་ང་ཚོ་དང་རྒྱ་ནག་གི་འབྲེལ་ཡོད་འགོ་ཁྲིད་ཚོའི་དབར་འབྲེལ་མོལ་ཐེངས་གཉིས་དང་ནང་མོལ་གྲོས་བསྡུར་ཐེངས་གཅིག་བཅས་བྱུང་བ་རེད། ཕྱི་ལོ་ ༢༠༠༨ ཟླ་ ༡༡ པའི་ནང་འབྲེལ་མོལ་ཐེངས་བརྒྱད་པའི་སྐབས་ང་ཚོས་(བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར།)ཕུལ་བ་དང།། དེའི་ནང་བོད་རིགས་ཡོངས་ལ་གཞི་རྩའི་དགོས་མཁོ་ཁག་གསལ་སྟོན་བྱེད་ཡོད་ལ། དེ་དག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ད་ཡོད་རྩ་ཁྲིམས་ཀྱི་ཆ་རྐྱེན་འོག་བསྐོང་ཐུབ་རྒྱུ་རེད།
རྒྱ་ནག་གིས་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར།༽ ནང་བཀོད་པའི་དོན་ཚན་ཁག་ལ་བལྟ་ཙམ་ཡང་མ་བྱས་པར་མཐའ་གཅིག་ཏུ་ཁས་ལེན་མ་བྱས་སྟབས། ད་ཆ་མུ་མཐུད་འབྲེལ་བ་བྱེད་རྒྱུར་དམིགས་ཡུལ་མེད་པར་ཆགས། འོན་ཀྱང་༸གོང་ས་མཆོག་གིས་འབྲེལ་མོལ་གྱི་ལས་རིམ་ཐད་དམ་བཅའ་བརྟན་བཟུང་གནང་ཡོད་ལ། ང་ཚོར་ཡང་རྒྱ་ནག་གི་དབུ་ཁྲིད་ཚོ་དང་ཡང་བསྐྱར་འབྲེལ་བ་བྱེད་རྒྱུར་གོམ་པ་སྤོ་དགོས་པའི་བཀའ་སློབ་གནང་ཡོད།
ད་བར་འབྲེལ་མོལ་གྱི་བརྒྱུད་རིམ་ལ་ལེགས་ཆ་ཇི་ཙམ་མངོན་རྒྱུ་ཡོད་པ་དེ་དག་ང་ཚོས་རང་འགུལ་གྱི་འབད་བརྩོན་ཁོ་ན་ལས་བྱུང་བ་ཡིན། ང་ཚོས་འབད་བརྩོན་ལ་བརྟེན་ནས་ཕྱི་ལོ་ ༢༠༠༢ ནས་བཟུང་འབྲེལ་མོལ་སླར་གསོ་དང་འབྲེལ་ད་ཕན་གྲོས་བསྡུར་སྔ་རྗེས་ཀྱི་ལས་རིམ་འགོོ་བཙུགས་ཐུབ་པ་བྱུང་ཡོད།
རྒྱ་ནག་ཕྱོགས་ནས་༸གོང་ས་མཆོག་གི་བཞེངས་ཕྱོགས་ལ་བཟང་པོའི་རྣམ་འགྱུར་བསྟན་པ་དེ་ཕྱི་ལོ་ ༢༠༠༦ ཟླ་ ༢ བསྐྱངས་པའི་འབྲེལ་མོལ་ཙམ་མ་ཡིན་པར། ཕྱི་ལོ་ ༢༠༠༨ ཟླ་ ༥ ནང་རྒྱ་ནག་གི་གྲོང་ཁྱེར་ཧྲན་ཀྲན་དུ་ནང་མོལ་གྲོས་བསྡུར་བསྐྱངས་སྐབས་སུའང་རྒྱ་ནག་ཕྱོགས་ནས་༸གོང་ས་མཆོག་ལ་དམིགས་ཏེ་༼མཚམས་འཇོག་གསུམ།༽ (དེ་གསུམ་ནི། ཁ་བྲལ་གྱི་ལས་འགུལ་མཚམས་འཇོག་དགོས་པ་དང་། དྲག་སྤྱོད་མཚམས་འཇོག་དགོས་པ། པེ་ཅིང་དུ་རྒྱལ་སྤྱིའི་རྩེད་འགྲན་ཆེན་མོར་ངོ་རྒོལ་བྱེད་པ་མཚམས་འཇོག་དགོས་པ་བཅས་ཡིན།) ཟེར་བ་ཞིག་བཏོོན་པ་རེད། ང་ཚོས་དེ་དག་ལ་ཁས་ལེན་མ་བྱས་སྟབས། ཕྱི་ལོ་ ༢༠༠༧ ཟླ་ ༧ ནང་ཚོགས་པའི་འབྲེལ་མོལ་ཐེངས་བདུན་པའི་སྐབས་རྒྱ་ནག་ཕྱོགས་ནས་༼རྒྱབ་སྐྱོར་མི་བྱེད་པ་བཞི།༽ ཞེེས་པ་བཏོན་པ་རེད། (དེ་བཞི་ནི། པེ་ཅིང་དུ་རྒྱལ་སྤྱིའི་རྩེད་འགྲན་ཆེན་མོར་ངོ་རྒོལ་བྱེད་པའི་ལས་འགུལ་ལ་རྒྱབ་སྐྱོར་མི་བྱེད་པ་དང་། ཁྲིམས་འགལ་དང་དྲག་པོའི་ལས་འགུལ་ལ་རྒྱབ་སྐྱོར་མི་བྱེད་པ། དྲག་སྤྱོད་པར་རྒྱབ་སྐྱོར་མི་བྱེད་པ་མ་ཟད་ལས་འགུལ་དེ་དག་ཁ་ཡོད་ཀྱིས་བཀག་དགོས་པ། བོད་རང་བཙན་རྩོད་ལེན་གྱི་ལས་འགུལ་ལ་རྒྱབ་སྐྱོར་མི་བྱེད་པ་བཅས་རེད།) ཁོང་ཚོས་བརྗོད་གསལ་ལྟར་ན་༼རྒྱབ་སྐྱོར་མི་བྱེད་པ་བཞི།༽དེ་༼མཚམས་འཇོག་གསུམ།༽གྱི་ཚབ་ཏུ་བཏོན་པ་དེ་དག ང་ཚོས་༸གོང་ས་མཆོག་གི་༼མཚམས་འཇོག་གསུམ།༽གྱི་ནང་གསལ་བྱ་སྤྱོད་ཁག་སྤེལ་གནང་གི་མེད་པ་རེད་ཅེས་དོན་ཚན་ཞུས་པ་དེར་བརྩི་འཇོག་བྱས་པ་ཡིན་ཞེས་བརྗོད་ཀྱི་ཡོད་པ་རེད། དེར་བརྟེན་རྒྱ་ནག་གི་དབུ་ཁྲིད་ཚོས་༼མཚམས་འཇོག་གསུམ།༽ སྲིད་བྱུས་ནས་༼རྒྱབ་སྐྱོར་མི་བྱེད་པ་བཞི།༽ཞེས་པར་བསྒྱུར་བ་དེ་ཁོང་ཚོས་༸གོང་ས་མཆོག་གི་རང་བཙན་རྩོད་ལེན་གྱི་ཕྱག་ལས་མཛད་ཀྱི་མེད་པ་ཁས་ལེན་གྱི་ཡོད་པའི་རྟགས་རེད།
ཉེ་དུས་པེ་ཅིང་ནས་བསྒྲགས་གཏམ་སྤེལ་ཁག་ལ་གཞིགས་ན། ང་ལ་རྒྱ་ནག་གཞུང་ནང་ཕྱག་ལས་གནང་སྐབས་བོད་ཀྱི་གནད་དོན་ཐད་ལོ་མང་རིང་མཉམ་ཞུགས་གནང་མྱོང་མཁན་རྒྱ་རིགས་སློབ་དཔོན་གྱི་བསླབ་བྱ་བརྒྱབ་པ་དེ་དྲན་གསོས་བྱུང་། ཁོང་གིས་རྒྱ་མིའི་དབུ་ཁྲིད་རྣམས་ནས་༸གོང་ས་མཆོག་གི་ཁ་བྲལ་རྩོད་གནང་ཀྱི་མེད་པ་གསལ་རྟོགས་ཡོད་བཞིན་དུ་ཁོང་ལ་ཁ་བྲལ་གྱི་ཉེས་ཞྭ་གཡོག་པ་དེ་ཕུད་རྒྱུའི་ཆབ་སྲིད་ཀྱི་བློ་སྤོབས་ལྡན་པར་ང་ཚོས་རེ་བ་རྒྱག་རྒྱུ་མེད། གལ་ཏེ་རྒྱ་ནག་ཕྱོགས་ནས་ཉེས་ཞྭ་དེ་ཕུད་པའི་དབང་དུ་བཏང་ན་ཡང་ཁོང་ཚོས་ད་ལྟ་བོད་ཐོག་འཛིན་པའི་སྲིད་བྱུས་དང་༸གོང་ས་མཆོག་བོད་ལ་ཕྱིར་ལོག་ཕེབས་རྒྱུའི་ཐད་བཀག་འགོག་བྱེད་པ་སོགས་ཀྱི་གནས་ཚུལ་དེ་དག་དྲང་བདེན་ཡིན་པའི་ཁུངས་སྐྱེལ་རྒྱ་ནག་མི་མང་ལ་བྱེད་ཐུབ་ཀྱི་མ་རེད་བཅས་གསུངས་ཡོད།
རྒྱ་ཕྱོགས་ནས་ཡང་ནས་ཡང་དུ་ང་ཚོར་གསར་ལམ་བརྒྱུད་འབྲེལ་མོལ་བྱ་རྒྱུ་མེད་པ་དང་། ང་ཚོ་ཕན་ཚུན་ཐད་ཀར་གདོང་ཐུག་གིས་བཀའ་མོལ་ཞུས་དགོས་པ་བརྗོད་ཀྱི་ཡོད། འོན་ཀྱང་ཀུན་གྱི་མཐོང་ཆོས་སུ་ཡོད་པ་ལྟར་རྒྱ་ཕྱོགས་ནས་གསར་ལམ་བརྒྱུད་འདེམས་སྒྲུག་བྱེད་པའི་བཅའ་འདྲིའི་རིགས་འདོན་སྤེལ་བྱས་ཏེ་འབྲེལ་མོལ་གྱི་ལས་རིམ་ལ་འགོག་རྐྱེན་བཟོ་གཞི་མང་དུ་གཏོང་གི་ཡོད། ཕྱི་ལོ་ ༢༠༠༨ འབྲེལ་མོལ་ཐེངས་ ༧ པའི་སྐབས་རྒྱ་ཕྱོགས་ནས་༼རྒྱབ་སྐྱོར་མི་བྱེད་པ་བཞི་༽ནི་༼མཚམས་འཇོག་གསུམ་༽དང་བསྡུར་ན་ལེགས་པ་ཡོད་པའི་རྣམ་འགྱུར་བསྟན་ཡོད་པ་དེ་ལྟར་ཡང་འབྲེལ་མོལ་གྲུབ་རྗེས་ང་ཚོ་རྒྱ་གར་དུ་༸གོང་ས་མཆོག་ལ་༸སྙན་སེང་ཆེད་མ་འབྱོར་སྔོན་ཁོང་ཚོས་གསར་ལམ་ལ་འབྲེལ་བ་བྱས་པ་དང་སྦྲགས་རང་ཉིད་ཀྱི་ལངས་ཕྱོགས་དང་ཡོངས་སུ་རྒྱབ་འགལ་གྱི་ལན་བརྡ་ཞིག་སྤྲད་འདུག
ང་ཚོའི་བསམ་པར་གལ་ཏེ་རྒྱ་ཕྱོགས་ལ་བོད་མིའི་དཀའ་ངལ་རྣམས་སེལ་རྒྱུ་དང་། དེ་བཞིན་རྒྱ་ནག་གི་རྩ་ཁྲིམས་དང་གྲངས་ཉུང་མི་རིགས་དང་འབྲེལ་བའི་ཁྲིམས་སྒྲིག་ནང་གསལ་གྱི་ཐོབ་ཐང་རྣམས་བོད་མིར་གཅིག་མཚུངས་སྤྲོད་རྒྱུའི་དོན་དམ་གྱི་བསམ་བློ་ཡོད་ཚེ། དེ་དག་ད་ཡོད་འབྲེལ་མོལ་གྱི་བརྒྱུད་ལམ་དང་གྲོས་མོལ་གྱི་རྒྱ་ཅོག་སྟེང་སྤྲོད་དགོས་པ་ཡིན།
༸གོང་ས་མཆོག་ནས་འབྲེལ་མོལ་གྱི་བརྒྱུད་རིམ་ཐད་དམ་བཅའ་བརྟན་བཟུང་གནང་གི་ཡོད་པ་དང་། ང་ཚོ་གྲོས་བསྡུར་མུ་མཐུད་བྱ་རྒྱུ་གྲ་སྒྲིག་ཨང་གསར་ཡིན། ཝ་ཤིང་ཊོན་ཌི་སི་ནས་ཕྱི་ལོ་ ༢༠༠༩ ཟླ་ ༡༢ ཚེས་ ༡༠ ལ།
