༄༅། །འདི་གར་སྤོན་ཊ་ཆོལ་གསུམ་ས་གནས་འགོ་འཛིན་ལས་ཁུངས་ནས་ཕྱི་ལོ་ ༢༠༢༥ ཟླ་བ་ ༤ ཚེས་ ༢༦ ཉིན་ཉེ་ལམ་ཇམྨུ་དང་ཀཤ་མཱིར་མངའ་སྡེའི་ནང་བྱུང་བའི་འཇིགས་སྐུལ་གྱི་དོན་རྐྱེན་འོག་མིའི་ཚེ་སྲོག་ཤོར་བ་དང་། མང་པོ་ཞིག་རྨས་སྐྱོན་ཕོག་པའི་ཡིད་སྐྱོའི་གནས་ཚུལ་ཐོན་པ་བཞིན། ཕྱི་ཚེས་ ༢༦ ཉིན་ཀྱི་སྔ་དྲོར་ཆུ་ཚོད་ ༩ ནས་ ༡༡ བར་སྤོན་ཊ་ཆོལ་གསུམ་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་ཞུས་ཐོག་ས་གནས་འགོ་འཛིན་ཁྱབ་ཁོངས་དཔལ་ཞ་ལུ་དགོན་པ་དང་། དེ་བཞིན་གཞིས་མི་གཏན་སྡོད་སེར་སྐྱ་མི་མང་ཡོངས་ནས་མི་མང་ཚོགས་ཁང་དུ་ཚང་འཛོམས་ཐོག་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་མཚོན་བྱེད་མཆོད་འབུལ་སྨོན་ལམ་ཚོགས་ཡོད།
སྐབས་དེར་སྤོན་ཊ་ཆོལ་གསུམ་ས་གནས་འགོ་འཛིན་དགེ་ལེགས་འཇམ་དབྱངས་ལགས་ནས་གསུང་དོན། དེ་རིང་མཆོད་འབུལ་སྨོན་ལམ་ཞུས་དགོས་དོན་གཙོ་བོ་ནི་ཉེ་ལམ་ཇམྨུ་དང་ཀཤ་མཱིར་མངའ་སྡེའི་ནང་མི་མང་པོ་འཇིགས་སྐུལ་གྱིས་རྐྱེན་ལམ་དུ་ཕྱིན་པ་རྣམས་ལ་གསོལ་འདེབས་དང་མཆོད་འབུལ་སྨོན་ལམ་མཚོན་བྱེད་ཆེད་དུ་ཡིན། དེ་བཞིན་ངེས་ཅག་ནས་རྨས་སྐྱོན་ཕོག་པ་རྣམས་ལ་མྱུར་དུ་དྲག་སྐྱེད་ཡོང་བའི་གསོལ་བ་སྨོན་འདུན་ཞུས་ཡོད་པ་བཅས།།
