༄༅། །ཕྱི་ལོ་ ༢༠༢༥ ཟླ་བ་ ༤ ཚེས་ ༡༢ ཉིན་འཛམ་གླིང་ནང་གི་གཙུག་ལག་སློབ་གྲྭ་རྙིང་ཤོས་གྲས་སུ་ཡོད་པའི་ཨལ་མ་མ་ཊེར་སི་ཊུ་ཌི་ཨོ་རུམ་(Alma Mater Studiorum) ཞེས་ཨི་ཊ་ལིར་རྟེན་གཞི་བྱས་པའི་བྷོ་ལོ་ན་གཙུག་ལག་སློབ་གཉེར་ཁང་གི་མཐུན་འགྱུར་འོག་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་དགུང་གྲངས་དགུ་བཅུ་ཐམ་པར་ཕེབས་པའི་༸སྐུའི་འཁྲུངས་སྐར་ལ་གུས་བརྩི་ཞུ་སླད། གཙུག་ལག་སློབ་གྲྭ་དེའི་ནང་བགྲོ་གླེང་ཚོགས་འདུ་ཁྱད་པར་ཅན་ཞིག་ཚོགས་ཡོད་པ་དང་བགྲོ་གླེང་འདི་ནི་བྱམས་བརྩེ་གླིང་ཆོས་ཚོགས་དང་། ཨི་ཊ་ལི་དང་བོད་མཛའ་འབྲེལ་ཚོགས་པ།   ཨི་ཊ་ལི་བོད་རིགས་ཚོགས་པ། དེ་བཞིན་ཨི་ཊ་ལི་ནང་པའི་མཐུན་ཚོགས་བཅས་ཀྱིས་གོ་སྒྲིག་གནང་བ་ཞིག་ཡིན།

ཚོགས་འདུ་ཐོག་སྐུ་མགྲོན་ཁོངས་སུ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། བྷོ་ལོ་ན་གཙུག་ལག་སློབ་གྲྭ་ཆེན་མོའི་ཆོས་ལུགས་ཁྲིམས་ལུགས་མཁས་དབང་སློབ་དཔོན་ཨན་ཊོ་ནེལ་ལོ་ཌེ་ཨོ་ཊོ་ལགས། (Professor Antonello De Oto) དེ་བཞིན་ཨི་ཊ་ལི་བོད་མཐུན་ཚོགས་ཀྱི་ཚོགས་གཙོ་ཁི་ལའུ་ཌི་ཡོ་ཁར་ཌེལ་ལི་ལགས། (Dr. Claudio Cardelli) བོད་ཀྱི་རིག་གཞུང་མཐུན་ཚོགས་ཀྱི་ཚོགས་གཙོ་འབུམ་རམ་པ་པི་ཡེ་རོ་ཝེར་ནི་ལགས། (Dr. Piero Verni) སྐུ་མགྲོན་ཁོངས་སུ་གཞན་ཡང་བྱམས་བརྩེ་གླིང་སེན་ཊརོ་རི་ཇིམ་ལྟེ་གནས་ཀྱི་འབུམ་རམ་པ་པའོ་ལོ་རོ་བྷེར་ཊི་དི་སར་སི་ན་ལགས། (Dr. Paolo Robert di Sarina) ཨི་ཊ་ལི་བོད་རིགས་ཚོགས་པའི་སྐུ་ཚབ། དེ་བཞིན་ཨི་ཊ་ལི་པོ་མ་ཡ་བླ་མ་ཙོང་ཁ་པའི་བསྟི་གནས་ཁང་གི་འགན་འཛིན་ལུ་སི་ཡ་ལན་ཌི་ལགས། (Mrs. Lucia Landi) བོ་ལ་ན་སྤྱན་རས་གཟིགས་ཆོས་ཚོགས་ཀྱི་འགན་འཛིན་ལྕམ་མ་རི་ཡ་ག་རི་ཛ་མ་ཕི་ཡ་ལགས། (Mrs. Maria Grazia Maffia) བྷོ་ལ་ནོ་དྷརྨ་ཀ་ཡ་ལྟེ་གནས་ཀྱི་འགན་འཛིན་མ་ཁོ་སེཊ་ཊ་མེན་གྷོ་ལི་ལགས། (Mrs. Cosetta Mengoli) བཅས་ཁྱོན་བསྡོམས་མི་གྲངས་ ༣༠ ལྷག་འདུ་འཛོམས་གནང་ཡོད།

གོ་སྒྲིག་ཚོགས་ཆུང་རྣམས་ནས་བགྲོ་གླེང་ཚོགས་འདུ་ཙམ་མིན་པ་ཕྱི་ལོ་ ༡༩༩༠ ལོར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ཆེ་བསྟོད་ཕྱག་འཁྱེར་འབུལ་ལམ་ཞུ་སྐབས་ཀྱི་པར་རིས་འགྲེམས་སྟོན་ཡང་ཡོད་པ་དེས་ལོ་རྒྱུས་རང་བཞིན་ལྡན་པའི་དུས་ཚོད་དེའི་མཐོང་སྣང་དྲན་གསོ་ཞིག་མཁོ་སྤྲོད་གནང་ཡོད། དེ་བཞིན་༸གོང་ས་མཆོག་ལ་གུས་བརྩི་ཞུ་ཆེད་རྒྱལ་ཁབ་འདྲ་མིན་གྱིས་འདོན་སྤེལ་ཞུས་པའི་སྦྲག་རྟགས་ཀྱི་འགྲེམས་སྟོན་ཡང་ཡོད་པ་དེས་མགོན་པོ་གང་ཉིད་མཆོག་གི་བསླབ་བྱ་དང་འགྲོ་བ་མིའི་ཞབས་འདེགས་ལ་རྒྱལ་སྤྱིའི་ཐོག་བསྔགས་བརྗོད་ཡོད་པའི་མཚོན་རྟགས་ཡིན་པ་སྟོན་ཡོད། མཛད་སྒོ་འདི་མཇུག་བསྡུ་སྐབས་༸གོང་ས་མཆོག་གི་སྐུ་ཚེ། ལྟ་གྲུབ། ཁོང་གི་མུ་མཐུད་དུ་གནང་པའི་བཀའ་སློབ་དག་འཁོད་པའི་གློག་བརྙན་ཞིག་ཚོགས་བཅར་ཡོངས་ལ་གཟིགས་འབུལ་ཞུས་ཡོད།

ཚོགས་འདུ་ཐོག་སུད་སི་དོན་གཅོད་འཕྲིན་ལས་ཆོས་སྐྱིད་ལགས་ནས་བྷོ་ལོག་ན་གཙུག་ལག་སློབ་གྲྭ་ཆེན་མོ་གཙོས་པའི་གོ་སྒྲིག་ཚོགས་ཆུང་ཡོངས་ལ་དེ་རིང་ཚོགས་འདུ་འདིར་གོ་སྒྲིག་གནང་བ་ཐུགས་རྗེ་ཆེ་ཞུས་ཡོད་པ་མ་ཟད། ཉེ་ལམ་ཁོ་མོ་དྷ་རམ་ས་ལ་གཞུང་འབྲེལ་ཕྱོགས་བསྐྱོད་སྐབས་༸གོང་ས་མཆོག་མཇལ་རྒྱུ་གོ་སྐབས་བྱུང་ཡོད། ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་གཟུགས་བདེ་ཐང་དང་། མང་ཚོགས་ལ་མཇལ་ཁ་མུ་མཐུད་གནང་བཞིན་ཡོད་པ་གསལ་བཤད་གནང་ཡོད། ད་དུང་ལོ་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༠ ལ་ཕེབས་རྒྱུ་ཡིན་པས་འཇམ་གླིང་ཕྱོགས་ཡོངས་ལ་གོ་སྟོན་སྲུང་བརྩི་བྱ་འཆར་ཡོད་པ་དང་། ལོ་འདི་བྱམས་བརྩེའི་ལོ་ཞེས་སྲུང་བརྩི་ཞུ་འཆར་ཡོད་པ་ལྷན་རྒྱས་ཀྱང་སོ་སོའི་ས་གནས་སུ་༸གོང་ས་མཆོག་གི་རླབས་ཆེན་གྱི་མཛད་པ་རྣམས་ངེས་པར་སྤེལ་དགོས་པའི་གསུང་བཤད་གནང་ཡོད།

དེ་རྗེས་སྐུ་ཚབ་དོན་གཅོད་ནས་ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱག་དེབ་གསར་པ་ (བོད་དང་བོད་མིའི་མགྲིན་ཚབ།) ཞེས་ཨི་ཊ་ལི་སྐད་དུ་ཡོད་པ་སྐུ་མགྲོན་རྣམས་ལ་ཕུལ་བ་མ་ཟད་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱག་དེབ་ནང་གསལ་བ་བཞིན་ད་བར་བོད་དོན་ཐོག་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་དང་མ་འོངས་པ་བོད་དོན་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བ་འབོད་སྐུལ་ཞུས་ཡོད། དེ་ནས་ཕྱི་ལོ་ ༢༠༢༥ ཟླ་བ་ ༤ ཚེས་ ༡༣ ཉིན་ཨི་ཊ་ལི་ཁུལ་གྱི་གཞུང་འབྲེལ་ཕྱོགས་བསྐྱོད་ལེགས་གྲུབ་ཀྱིས་སུད་སི་ཕེབས་ཐོན་གནང་ཡོད།