༄༅། །ཕྱི་ལོ་ ༢༠༢༥ ཟླ་བ་ ༣ ཚེས་ ༢༨ ཉིན་ཨ་རིའི་མངའ་སྡེ་ཀེ་ལི་ཧྥོ་ནི་ཡའི་ནང་བྱང་ཀེལ་བོད་རིགས་སྤྱི་མཐུན་ཚོགས་པའི་སྤྱི་ཁང་དུ་བྱང་ཨ་རི་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་བོད་རྒྱའི་ན་གཞོན་འབྲེལ་ལམ་གྱི་ཚོགས་འདུ་ཞིག་བསྐོང་ཚོགས་གནང་ཡོད་པ་དང་། ། ཚོགས་འདུའི་ཐོག་གཏམ་བཤད་གནང་མཁན་དུ་རྒྱ་ནག་གི་མང་གཙོ་དོན་གཉེར་བ་གྲགས་ཅན་སྐུ་ཞབས་ཧྥང་ཀྲིང་ལགས་དང་། སྐུ་ཞབས་ཀྲུའུ་ཧྥང་སོ་ལགས། རྒྱ་རིགས་གཞོན་སྐྱེས་བོད་ལ་རྒྱབ་སྐྱོར་ཞེས་པའི་དྲ་ཐོག་གླེང་སྟེགས་ཀྱི་ཚོགས་མི་ཇིན་ཇེར་ (Ginger Duan) ལགས། བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་སོགས་ནས་རྒྱ་ནག་གི་མང་གཙོའི་འཐབ་རྩོད་དང་མ་འོངས་པའི་འགྲོ་ཕྱོགས། དེ་བཞིན་བོད་རྒྱའི་དབར་གྱི་འབྲེལ་ལམ་དང་མཉམ་ལས་སོགས་ཀྱི་ཐད་ས་ཁུལ་དེའི་རྒྱ་རིགས་དང་བོད་རིགས་གཞོན་སྐྱེས་གང་མང་ཞིག་དང་བཀའ་མོལ་ལྷུག་པོ་བྱུང་ཡོད་པ་རེད། 
སྐུ་ཞབས་ཧྥང་ཀྲིང་ལགས་ནི་དེ་སྔོན་རྒྱ་ནག་གནམ་བདེ་སྒོ་མོའི་ཐང་ཆེན་དུ་དྲུག་བཞིའི་སློབ་ཕྲུག་གི་དོན་རྐྱེན་སྐབས་རྐང་པ་གཉིས་འཐབ་འཁོར་འོག་མེད་པ་ཆག་པའི་རྒྱ་ནག་གི་མང་གཙོ་དོན་གཉེར་བ་གྲགས་ཅན་ཞིག་ཡིན་པ་དང་། ཁོང་ནས་སྔར་གྱི་རྒྱ་རིགས་མང་གཙོའི་འཐབ་རྩོད་སྐོར་རོབ་ཙམ་གླེང་ནས་གཞོན་སྐྱེས་མི་རབས་གསར་པ་རྣམས་དང་ལྷན་འབྲེལ་བ་མཐུད་ནས་ཕན་ཚུལ་བསམ་ཚུལ་བརྗེ་ལེན་དང་སློབ་སྦྱོང་བྱེད་རྒྱུ་གལ་ཆེན་ཡིན་པ་གསུང་གནང་བ་དང་། སྐུ་ཞབས་ཀྲུའུ་ཧྥང་སོ་ལགས་ནས་རྒྱ་ནག་གི་མ་འོངས་པའི་མང་གཙོའི་འགྲོ་ཕྱོགས་ཐད་བསམ་ཚུལ་བཏོན་གནང་བ་དང་ཤོག་དཀར་ལས་འགུལ་སོགས་རྒྱ་རིགས་མི་རབས་གསར་པའི་གཞོན་སྐྱེས་རྣམས་ནས་ལས་དོན་དོན་སྙིང་ལྡན་པ་མང་པོ་བསྒྲུབས་དང་སྒྲུབ་མུས་ཡིན་པ་གསུང་། རྒྱ་རིགས་གཞོན་སྐྱེས་བོད་ལ་རྒྱབ་སྐྱོར་ཞེས་པའི་དྲ་ཐོག་གླེང་སྟེགས་ཀྱི་འགན་འཁུར་མཁན་རྒྱ་རིགས་བུ་མོ་ཇིན་ཇེར་ (Ginger Duan) ལགས་ནས་ཁོ་མོ་བོད་ནང་ཡོད་སྐབས་ར་རྒྱ་དགོན་པའི་ནང་སློབ་འཁྲིད་བྱས་པའི་གོ་སྐབས་ཐོབ་ནས་བོད་པ་དང་ལྷན་འབྲེལ་བ་བྱུང་བའི་ལོ་རྒྱུས་དང་། ཁོང་གིས་རྒྱ་རིགས་ནང་བོད་ཐོག་རྒྱ་ཡིག་ཐོག་ནས་ངོ་སྤྲོད་བྱེད་རྒྱུའི་ལས་དོན་དགོས་མཁོ་ཆེ་བར་བརྟེན་ཁོང་དང་ཁོང་གི་རྒྱ་རིགས་གྲོགས་འགས་དྲ་ཐོག་བརྒྱུད་བོད་དོན་དང་འབྲེལ་བའི་གནས་ཚུལ་རྒྱ་ཡིག་ཐོག་སྤེལ་བཞིན་སྐོར་སོགས་ངོ་སྤྲོད་གནང་།
ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ནས་བོད་རྒྱའི་དབར་བོད་བཙན་བཟུང་བྱུང་བ་ནས་བཟུང་གཞུང་དང་གཞུང་ཁོངས་མིན་པའི་འབྲེལ་མོལ་བྱུང་ཡོད་པའི་འཕེལ་རིམ་ངོ་སྤྲོད་གནང་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་བོད་དཀའ་རྙོག་སེལ་བའི་གཉིས་ཕན་གྱི་ཐབས་ལམ་སྔར་ནས་གསལ་སྟོན་མཛད་ཡོད་པ་ཤེས་རྟོགས་དགོས་པའི་གལ་འགངས་དང་། དམིགས་གསལ་བོད་རྒྱའི་གཞོན་སྐྱེས་མི་རབས་གསར་བའི་དབར་གྲོས་མོལ་གང་མང་ཡོང་ཐུབ་དགོས་པའི་བསམ་ཚུལ་སྤེལ་གནང་ཡོད་པ་རེད།
ཚོགས་འཛོམས་ཀྱི་སྐབས་བོད་རྒྱའི་ཚོགས་བཅར་བ་རྣམས་ཚོགས་ཆུང་སོ་སོར་བགོས་ནས་བསམ་ཚུལ་གང་ཡོད་ཕན་ཚུན་བརྗེ་ལེན་བྱས་པ་དང་། མ་འོངས་པར་བོད་རྒྱ་འབྲེལ་མཐུད་ཀྱི་ལས་དོན་སྔར་ལྷག་ཡོང་ཐབས་ལ་ཚོགས་བཅར་བ་རྣམས་ནས་ལས་འཆར་གྱི་བསམ་ཚུལ་སོགས་ཀྱང་བཏོན་གནང་ཡོད། ཚོགས་འཛོམས་ཐོག་བྱང་ཀེལ་ཁུལ་དུ་ཡོད་པའི་རྒྱ་རིགས་དང་བོད་རིགས་མཐོ་སློབ་སློབ་མ་འགས་མཐོ་སློབ་ནང་བོད་རྒྱའི་གནད་དོན་དང་འབྲེལ་བའི་འགྲོ་གླེང་བསྐོང་ཚོགས་གནང་ཐབས་སོགས་ལ་ཡང་བཀའ་མོལ་ལྷུག་པོ་བྱུང་བ་དང་བཅས་ཚོགས་འཛོམས་དེ་བཞིན་ལེགས་འགྲུབ་བྱུང་འདུག
ཚོགས་འཛོམས་ཀྱི་སྐབས་བོད་རྒྱའི་ཚོགས་བཅར་བ་རྣམས་ཚོགས་ཆུང་སོ་སོར་བགོས་ནས་བསམ་ཚུལ་གང་ཡོད་ཕན་ཚུན་བརྗེ་ལེན་བྱས་པ་དང་། མ་འོངས་པར་བོད་རྒྱ་འབྲེལ་མཐུད་ཀྱི་ལས་དོན་སྔར་ལྷག་ཡོང་ཐབས་ལ་ཚོགས་བཅར་བ་རྣམས་ནས་ལས་འཆར་གྱི་བསམ་ཚུལ་སོགས་ཀྱང་བཏོན་གནང་ཡོད། ཚོགས་འཛོམས་ཐོག་བྱང་ཀེལ་ཁུལ་དུ་ཡོད་པའི་རྒྱ་རིགས་དང་བོད་རིགས་མཐོ་སློབ་སློབ་མ་འགས་མཐོ་སློབ་ནང་བོད་རྒྱའི་གནད་དོན་དང་འབྲེལ་བའི་འགྲོ་གླེང་བསྐོང་ཚོགས་གནང་ཐབས་སོགས་ལ་ཡང་བཀའ་མོལ་ལྷུག་པོ་བྱུང་བ་དང་བཅས་ཚོགས་འཛོམས་དེ་བཞིན་ལེགས་འགྲུབ་བྱུང་འདུག
