༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༣ ཉིན་བོད་མི་མང་སྤྱི་འཐུས་དགེ་བཤེས་རྔ་བ་གངས་རི་ལགས་དང་། སྤྱི་འཐུས་ཚེ་རིང་དབྱངས་ཅན་ལགས། སྤྱི་འཐུས་བསྟན་འཛིན་འཇིགས་བྲལ་ལགས། ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཕ་རན་སི་རྒྱལ་ཁབ་ནང་ཉིན་གྲངས་གསུམ་རིང་གི་བོད་དོན་ཞུ་སྐུལ་གྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད་འདུགདེ་ཡང་ཕྱི་ཚེས་ ༢༣ ཉིན་གྱ་ིསྔ་དྲོ་བོད་མི་མང་སྤྱི་འཐུས་རྣམ་པས་ཕ་རན་སིའི་རྒྱལ་ས་པ་རི་སེའི་གྲོང་ཁྱེར་སྤྱི་ཁྱབ་གཞོན་པ་སྐུ་ཞབས་ཇེན་ ལེག་ རཱོ་མེ་རཱོ་ (Jean-Luc Romero, Deputy Mayor of Paris) ལགས་དང་། གྲོང་ཁྱེར་ལྷན་ཚོགས་ཀྱི་འཐུས་མི་ལྕམ་སྐུ་ཇེ་ནེ་ཝིབ་ གྷ་རེག་ (Geneviève Garrigues) ལགས་རྣམ་གཉིས་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་སྐོར་དང་། ས་གནས་བོད་མིའི་བདེ་སྡུག་སྐོར་སྙན་སེང་ཞུས་གནང་འདུག
དེ་རྗེས་ཕ་རན་སི་སྤྱི་ཚོགས་རིང་ལུགས་ཚོགས་པའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་ལྕམ་སྐུ་ཌཡེ་ནཱ་བྷ་ ཌཡེ་ཨོབ་ (Dieynaba Diop) ལགས་དང་། ཚོགས་མི་ལྕམ་སྐུ་པ་སེ་ཀལ་ གྷོཊ་ (Pascale Got) ལགས། ཚོགས་མི་སྐུ་ཞབས་སེ་ཊིབ་ནེ་ ཧབ་ལོཊ་ (Stéphane Hablot) ལགས། ཚོགས་མི་སྐུ་ཞབས་པི་རེ་ པི་རི་བྷི་ཊི་ཆི་ (Pierre Pribetich) ལགས་བཅས་དང་ལྷན་མཇལ་འཕྲད་གནང་སྟེ། བོད་ནང་གི་ད་ལྟའི་ཛ་དྲག་གནས་སྟངས་སོགས་སྙན་སེང་ཞིབ་ཕྲ་ཞུས་པ་མ་ཟད། གྲོས་ཚོགས་འོག་མའི་ནང་བོད་དོན་རྒྱབ་སྐྱོར་ཚོགས་པ་ཞིག་དེ་སྔ་བཞིན་བསྐྱར་གསོ་ཡོང་ཐབས་ཀྱི་རེ་སྐུལ་ནན་པོ་ཞུས་གནང་སྟེ། ཐེངས་འདིའི་ཡུ་རོབ་ཕ་རན་སིའི་རྒྱལ་ས་པེ་རི་སི་ཁུལ་གྱི་གཞུང་འབྲེལ་བོད་དོན་ཞུ་སྐུལ་གྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད་པ་བཅས། །
