༄༅། །ཕྱི་ལོ་ ༢༠༢༤ བོད་རྒྱལ་ལོ་ ༢༡༥༡ ཤིང་ཕོ་འབྲུག་ལོའི་བོད་ཟླ་ ༡ ཚེས་ ༣ ཉིན་གྱི་སྔ་དྲོའི་ཆར་བལ་ཡུལ་སྐུ་ཚབ་དོན་གཅོད་ཁང་ནས་གོ་སྒྲིག་གི་འཇོ་ཁེལ་བསམ་གྲུབ་གླིང་བོད་མིའི་གཞིས་ཆགས་སུ་གཞུང་འབྲེལ་བལ་ཡུལ་བོད་ཀྱི་ལོ་གསར་དུས་སྟོན་སྲུང་བརྩི་ཞུ་སྐབས་སྐུ་མགྲོན་གཙོ་བོར་༧སྐྱབས་རྗེ་ཤྲཱི་ཆུ་བཟང་རིན་པོ་ཆེ་མཆོག་དང་། དམིགས་གསལ་སྐུ་མགྲོན་བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས། བོད་མི་མང་སྤྱི་འཐུས་དང་སྤྱི་ཟུར་རྣམ་པ། བལ་དོན་དྲུང་ཆེ་སོགས་ས་གནས་འཐུས་ཚོགས་དང་ས་གནས་འགོ་འཛིན་ཁག དེ་བཞིན་རང་བདེན་ཚོགས་གཙོ་བཅས་གཞུང་འབྲེལ་དང་གཞུང་འབྲེལ་མིན་པའི་སྐུ་ཚབ། གཞན་ཡང་དགོན་སྡེ་ཁག་གི་མཁན་རིན་པོ་ཆེ་རྣམས་དང་། ལྷག་པར་བལ་ཡུལ་ནང་གི་ཨོསྟྲེ་ལི་ཡཱའི་གཞུང་ཚབ་ཆེན་མོ་དང་། ཨ་རིའི་གཞུང་ཚབ་གཞོན་པས་གཙོས་གཞུང་ཚབ་མང་པོའི་སྐུ་ཚབ་སྡེ་ཚན་ལས་བྱེད་པ་སོགས་སེར་སྐྱ་མི་མང་འདུ་ཐོག་བལ་གཞུང་གི་དམ་བསྒྲགས་གང་ཡང་མེད་པར་ཆོས་ཕྱོགས་དང་འཁྲབ་གཞས་ཀྱི་མཛད་སྒོ་ལེགས་པར་བསྒྲུབས་མཚམས་བལ་མཆོད་ཉེ་འདབས་སྲོང་བཙན་བལ་བཟའ་གཏན་ཉིན་མཐོ་སློབ་ཏུ་བལ་ཡུལ་བོད་ཀྱི་ལྷ་མོ་ཚོགས་པས་ལྷ་གཞུང་དྲི་མེད་ཀུན་ལྡན་གྱི་རྣམ་ཐར་འཁྲབ་སྟོན་ཟབ་རྒྱས་གནང་བ་བཅས།།