༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། པོ་ཀྲེ་ལན་ཊ་ནི་ཨ་རིའི་ནུབ་བྱང་ཁུལ་དུ་ཆགས་པའི་གྲུ་ཁའི་གྲོང་ཁྱེར་ཞིག་ཡིན་པ་དང་། མཛེས་སྡུག་ལྡན་པའི་གྲོང་ཁྱེར་དེའི་ནང་ནུབ་བྱང་བོད་མིའི་རིག་གཞུང་ཚོགས་པ་ (NWTCA) ཞེས་པ་ཞིག་ལོ་མང་པོའི་སྔོན་ནས་དབུ་བརྙེས་ཤིང་། དེ་ནི་ང་ཚོས་རྣམ་ཀུན་བརྗོད་བཞིན་པའི་པོ་ཀྲི་ལན་ཊ་བོད་རིགས་སྤྱི་མཐུན་ཚོགས་པའི་ཁྱབ་ཁོངས་ཀྱི་གཟའ་མཇུག་སློབ་གྲྭ་རེད། 
པོ་ཀྲེ་ལན་ཊ་བོད་རིགས་སྤྱི་མཐུན་ཚོགས་པས། བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་སྐུ་མགྲོན་གཙོ་བོ་དང་། བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག སྤྱི་ཟུར་དབང་ཕྱུག་རྡོ་རྗེ་ལགས་སོགས་བོད་པའི་སྐུ་མགྲོན་ཁག་ཅིག་དང་། དེ་བཞིན་ཁྲིམས་དཔོན་ཚེ་རིང་ (Tsering Cornell) ལགས། གྲོང་ཁྱེར་སྤྱི་ཁྱབ་ (Steve Hogan) ལགས་སོགས་ས་གནས་ཀྱི་དཔོན་རིགས་ཁག་ཅིག་སྐུ་མགྲོན་དུ་གདན་ཞུས་ཐོག་ས་གནས་སེར་སྐྱང་མང་ཚོགས་ ༣༠༠ ལྷག་ཙམ་མགྲོན་འབོད་ཀྱིས་ཟླ་བ་འདིའི་ཚེས་ ༡༦ ཉིན་ནུབ་བྱང་བོད་མིའི་རིག་གཞུང་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༣༠ འཁོར་བའི་མཛད་སྒོ་གཟབ་རྒྱས་ཤིག་སྤྱི་མཐུན་ཚོགས་པའི་བོད་ཁང་དུ་ཚོགས། 
སྐུ་མགྲོན་རྣམ་པ་དང་། སྤྱི་མཐུན་ཚོགས་པའི་ཚོགས་གཙོས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་དཀར་གཙང་མཇལ་དར་སྒྲོན་འབུལ་དང་། བཀྲ་ཤིས་ཞོལ་པ་གཟིགས་འབུལ་སོགས་བོད་ལུགས་ཀྱི་རྣམ་པའི་ཐོག་ནས་མཛད་སྒོ་དབུ་འཛུགས་གནང་རྗེས། མཛད་སྒོ་གྲ་སྒྲིག་འགན་ཁུར་གནང་མཁན་བོད་རིགས་སྤྱི་མཐུན་ཚོགས་པའི་ཚོགས་གཙོ་འཕྱོར་ཚང་འཇམ་དབྱངས་བཀྲ་ཤིས་ལགས་ནས་དགའ་བསུའི་གསུང་བཤད་གནང་། སྤྱི་མཐུན་ཚོགས་པར་ཡུན་རིང་དཔལ་འབྱོར་གྱི་རྒྱབ་སྐྱོར་ཤུགས་ཆེ་གནང་མཁན་ (Eric Lemelson) ལགས་དང་ཁོང་གི་ཁྱིམ་ཚང་བཅས་མཛད་བྲེལ་རྐྱེན་པས་ཕེབས་ཐུབ་མེད་སྟབས། ཐུགས་བརྩེ་བ་ཆེན་པོའི་སྒོ་ནས་ཚོགས་པར་ཡིག་ཐོག་འཚམས་འདྲི་གནང་ཡོད།
ས་གནས་ནས་གནས་ཚུལ་མཁོ་སྤྲོད་གནང་བར་གཞིགས་ན། ཚོགས་གཙོས་གསུང་བཤད་གནང་སྐབས། རིག་གཞུང་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༣༠ སོང་ཞིང་། དུས་ཡུན་དེའི་རིང་ས་གནས་མང་ཚོགས་ནང་ཁུལ་འཆམ་མཐུན་ཆིག་སྒྲིལ་ཐོག་ཚོགས་པའི་ལས་དོན་ཁག་ལ་གཞན་གྱིས་བསྔགས་འོས་པའི་གྲུབ་འབྲས་ཐོབ་པ་ནི་གཙོ་བོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རིན་ཐང་བྲལ་བའི་བཀའ་སློབ་ལམ་སྟོན། རྒྱུན་ལས་རིམ་བྱུང་དང་གཟའ་མཇུག་སློབ་གྲྭའི་དགེ་ལས་རིམ་བྱུང་གཙོས་འབྲེལ་ཡོད་ཚང་མའི་འབད་བརྩོན་ལྷོད་མེད་ལ་བརྟེན་ནས་བྱུང་ཞིང་། ཕྱི་རྒྱལ་སྦྱིན་བདག་ཆེ་ཆུང་རྣམས་ཀྱི་རྒྱབ་སྐྱོར་དང་ཡང་ཁ་བྲལ་ཐབས་མེད་སྟབས། མཛད་སྒོ་འདི་བརྒྱུད་ཁོང་རྣམ་པར་བཀའ་དྲིན་རྗེས་དྲན་ཞུ་གི་ཡོད། ཅེས་གསུང་འདུག ཚོགས་གཙོས་ད་དུང་། སྤྱི་མཐུན་ཚོགས་པ་དང་དེའི་ཁྱབ་ཁོངས་གཟའ་མཇུག་སློབ་གྲྭའི་ལས་དོན་ཡར་རྒྱས་ལ་མཐའ་མེད་པས་རྒྱུན་ལས་གཙོས་འབྲེལ་ཡོད་ཚང་མས་སྔར་ལྷག་ནུས་པ་མཉམ་སྤུངས་ཀྱིས་འབད་བརྩོན་ལྷོད་མེད་གནང་དགོས་པའི་རེ་འདུན་ཡང་གནང་ཡོད་པ་རེད། 
ཐེངས་འདིའི་འདུ་འཛོམས་ཐོག་མི་རབས་རྒན་པ་རྣམས་ཀྱིས་བོད་བསྟན་སྲིད་མི་རིགས་སླད་དུ་སྐུ་ལས་ཚད་མེད་བཀྱོན་པའི་མཛད་རྗེས་ལ་ཡི་རངས་མངོན་བསྟོད་མཚོན་ཆེད། བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་ལ་མཛད་སྒོའི་ཐོག་ཆེ་བསྟོད་གཟེངས་བསྟོད་གནང་ཡོད། སྐུ་མགྲོན་གཙོ་བོ་སྐུ་ཚབ་དོན་གཅོད་འབུམ་རམས་ལ་རྣམ་རྒྱལ་ཆོས་གྲུབ་ལགས་ནས་གསུང་བཤད་གནང་སྐབས། པོ་ཀྲེ་ལན་ཊ་བོད་རིགས་སྤྱི་མཐུན་ཚོགས་པ་དབུ་བརྙེས་ནས་ལོ་ ༣༠ འཁོར་བའི་མཛད་སྒོར་དངོས་སུ་བཅར་ཐུབ་པར་དགའ་སྤོབས་དང་འབྲེལ་ཚོགས་པའི་འགན་ཁུར་བ་ཡོངས་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུས་པ་དང་ཆབས་ཅིག་ དོན་གཅོད་ཀྱིས། བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་བོད་གཞུང་མང་སྐུ་ངལ་ཆེ་བའི་དུས་སུ་སྒེར་དོན་བློས་གཏོང་གིས་ཕྱག་ལས་སྣ་མང་གནང་ཡོད་པར་ངོས་འཛིན་མཚོན་ཆེད། དེ་རིང་ཆེ་བསྟོད་གནང་བར་རྗེས་སུ་ཡི་རངས་གནང་ཞིང་། ཚོགས་པའི་རྒྱུན་ལས་ལས་ཟུར་ཡོངས་ཀྱིས་ཕྱག་ལས་ཧུར་ཐག་གནང་བར་བསྔགས་བརྗོད་གནང་བ་མ་ཟད། གྲོལ་མ་ཐག་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ལ་ས་གནས་ཀྱི་རྒྱུན་ལས་གསུམ་མཉམ་ཞུགས་གནང་ཐུབ་པ་པ་དང་། རིང་མིན་པོ་ཀྲེ་ལན་ཊ་ས་གནས་སུ་སཱི་ཤེས་ཡོན་སློབ་གསོའི་ཟབ་སྦྱོང་གོ་སྒྲིག་གནང་རྒྱུའི་ཞལ་བཞེས་གནང་བར་ཡང་ཐུགས་རྗེ་ཆེ་ཞུས། དོན་གཅོད་ཀྱིས། ཚོགས་ཆེན་གྱི་གྲོས་ཆོད་དགོངས་དོན་ལྟར། གཟའ་མཇུག་སློབ་གྲྭའི་ལས་དོན་དང་། བོད་དོན་ཞུ་གཏུག་ལས་འགུལ། བོད་དོན་འཐབ་རྩོད་རྒྱུན་སྐྱོང་ཐུབ་ཆེད་གཞོན་སྐྱེས་གསོ་སྐྱོང་བྱ་རྒྱུ་སོགས་ཀྱི་ལས་དོན་ཁག་ལ་སྔར་ལྷག་ཤུགས་སྣོན་དགོས་པའི་ཐུགས་རེ་གནང་། དེ་རྗེས་སྐུ་ཚབ་དོན་གཅོད་ཀྱིས་མཛད་སྒོར་ཆེད་ཕེབས་ཕྱི་རྒྱལ་སྐུ་མགྲོན་རྣམས་ལ་དམིགས་ཏེ་ཨིན་སྐད་ཐོག་ནས་འཚམས་འདྲི་དང་གསུང་བཤད་མདོར་བསྡུས་གནང་།
གྲོས་ཚོགས་གོང་མའི་འཐུས་མི་སྐུ་ཞབས་མེག་ལེ་ (Jeffrey A. Merkley) དངོས་སུ་མཛད་སྒོར་ཕེབས་ཁོམ་མ་བྱུང་ཡང་། ཡིག་ཐོག་ནས་འཚམས་འདྲིའི་གསུང་བཤད་ཅིག་བསྐུར་ཡོད་པའི་ནང་ ” ༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་འཕྲིན་ལ་ཡི་རངས་མངོན་བསྟོད་མཛད་ཡོད་པ་མ་ཟད། པོ་ཀྲེ་ལན་ཊ་ས་གནས་བོད་མི་དང་། འཛམ་གླིང་ས་གནས་གཞན་དུ་གནས་པའི་བོད་མི་ཚོས་བོད་ཀྱི་རིག་གཞུང་སྲུང་སྐྱོབ་གནང་བའི་ལས་དོན་གྱིས་ངོས་རང་ལ་སེམས་འགུལ་ཐེབས་བྱུང་། ངོས་ནས་བོད་ཀྱི་རིག་གཞུང་སྲུང་སྐྱོབ་ཀྱི་ལས་དོན་ལ་མུ་མཐུད་ནས་རྒྱབ་སྐྱོར་ཞུ་རྒྱུ་ཡིན། “ ཅེས་བཀོད་གནང་འདུག་པ་མ་ཟད། ཁོང་གིས་ཨ་རིའི་གྲོས་ཚོགས་ནང་བོད་དོན་ཁྲིམས་འཆར་གསར་པར་རྒྱབ་སྐྱོར་ཞུ་དགོས་པའི་རྒྱུ་མཚན་ཡང་གསལ་བཀོད་གནང་འདུག
ཤེས་རྟོགས་བྱུང་བར་གཞིགས་ན། པོ་ཀྲེ་ལན་ཊ་ས་གནས་སུ་ཟླ་བ་འདིའི་ཚེས་ ༢༢ ཉིན་༸རྒྱལ་བའི་བཀའ་དྲིན་རྗེས་དྲན་མཚོན་ཆེད། དོ་སྣང་ཅན་ཁག་ཅིག་གིས་ཞྭ་གསེར་བསྟན་པའི་གསལ་བྱེད་སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དང་། དེ་མིན་གྱི་དགེ་བཤེས་དང་མཁས་དབང་ཁག་ཅིག་གདན་ཞུས་ཀྱིས་ཐུགས་བསྐྱེད་དམ་བཅའ་བཞི་དང་འབྲེལ་བའི་སྐོར་ལ་གོ་རྟོགས་སྤེལ་བའི་གསུང་བཤད་གྲ་སྒྲིག་གནང་འདུག་པ་བཅས་ཀྱི་གནས་ཚུལ་དུ།།
