༄༅། །དེང་སྐབས་གོ་ལ་སྤྱི་ཡོངས་དང་ཡང་སྒོས་ཏོག་དབྱིབས་གཉན་རིམས་ཁྱབ་གདལ་རྗེས་གཞོན་སྐྱེས་གཙོ་གྱུར་མི་མང་པོའི་སེམས་ཁམས་ལ་དཀའ་ངལ་འཕྲད་བཞིན་པ་མངོན་གསལ་ཇེ་དོད་ལ་སོང་། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་རྒྱ་གར་གྱི་གྲོང་ཁྱེར་ཁག་ཏུ་སློབ་སྦྱོང་དང་ལས་རིགས་གཉེར་བཞིན་པའི་གཞོན་སྐྱེས་ཁག་གཅིག་ལ་སེམས་ཁམས་འཕྲོད་བསྟེན་གོ་རྟོགས་ཀྱི་ལས་གཞི་ཞིག་སྤེལ་བཞིན་ཡོད་པ་རེད། དེ་ཡང་ཐེངས་འདིར་འཕྲོད་བསྟེན་ལས་ཁུངས་དང་རྒྱ་གར་ལྷོ་ཕྱོགས་བྷེང་ལོར་ནང་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་། སྤྱི་སེམས་ཚོགས་པ་དང་མཉམ་ལས་ཐོག་སེམས་ཁམས་འཕྲོད་བསྟེན་སྐོར་གོ་རྟོགས་སྤེལ་ཡོད། བྷེང་ལོར་དུ་འཕྲོད་བསྟེན་ལས་ཁུངས་ཀྱིས་མཐུན་གྱུར་དང་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་བ་ ༠༦ ཚེས་ ༡༠ ཉིན་ (The Richmond Fellowship Society) ཚོགས་པས་གཞོན་སྐྱེས་གྲངས་ ༥༥ ལ་སེམས་ཁམས་འཕྲོད་བསྟེན་སྐོར་ཟབ་སྦྱོང་ཕུལ་ཡོད། དེ་ལྟར་ལྡི་ལིར་འཕྲོད་བསྟེན་ལས་ཁུངས་ཀྱི་མཐུན་འགྱུར་འོག་སྤྱི་སེམས་ཚོགས་པས་ཕྱི་ལོ་ ༢༠༢༢ ཟླ་བ་ ༠༦ ཚེས་ ༢༦ ཉིན་གཞོན་སྐྱེས་གྲངས་ ༡༠༠ ཙམ་ལ་ལྡི་ལི་བསམ་ཡས་གླིང་བོད་མིའི་གཞིས་སྒར་དུ་ཆགས་པའི་བོད་ཕྲུག་ཁྱིམ་སྡེའི་ཉིན་སློབ་ཏུ་སེམས་ཁམས་འཕྲོད་བསྟེན་གོ་རྟོགས་དང་དེ་འབྲེལ་ལས་གཞི་ཁག་གཅིག་གོ་སྒྲིག་ཞུས་ཡོད་པ་རེད། 

ཟབ་སྦྱོང་དེ་དག་ལ་ཨ་རིའི་པི་ཨར་ཨེམ་གྱིས་དཔལ་འབྱོར་མཐུན་འགྱུར་གནང་ཡོད་པ་བཅས།།