༄༅། །ཕྱི་ལོ་ ༢༠༢༢ ཟླ་བ་ ༠༦ ཚེས་ ༠༡ ཉིན་རྒྱ་གར་གྱི་རྒྱལ་ས་ལྡི་ལིའི་གཱཾདྷཱིའི་ཞི་བདེ་ཐེབས་རྩའི་ཚོགས་ཁང་དུ་༧སྐྱབས་རྗེ་སློབ་དཔོན་ཟམ་གདོང་རིན་པོ་མཆོག་གིས་སྐུ་ཞབས་ཅནྡྲབྷཱུཥཎ་ལགས་ཀྱི་བརྩམས་པའི་དཔེ་དེབ་ ༼ ཁྱེད་ཀྱི་མིང་གང་ཡིན་ནམ། བོད། ༽ ཅེས་པ་དབུ་འབྱེད་གནང་ཡོད།

དེ་ཡང་མཛད་སྒོའི་སྐུ་མགྲོན་གཙོ་བོར་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གདན་ཞུས་ཐོག གཞན་ཡང་སྐུ་མགྲོན་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་འབྲེལ་མཐུད་པ་སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས་དང་། གཱཾ་དྷཱི་དྲན་རྟེན་བསྟི་གནས་ཁང་གི་འགན་འཛིན་སྐུ་ཞབས་རཱམ་ཅནྡྲ་རཱཧཱི་ལགས། གསར་འགོད་པ་སྐུ་ཞབས་བེད་པྲ་ཏཱབ་བཻ་དིཀ་ལགས། གཙུག་ལག་སློབ་དཔོན་ཧ་རཱིཤ་ཁནྣཱ་ལགས། གཱན་དྷཱི་ཞི་བདེའི་ཐེབས་རྩའི་དྲུང་ཆེ་སྐུ་ཞབས་ཨ་ཤོཀ་ཀུ་མཱར་ལགས་སོགས་ཕེབས་ཡོད། རྩོམ་པ་པོ་ཅནྡྲ་བྷཱུ་ཥཎ་ལགས་ཀྱིས་དཔེ་དེབ་ངོ་སྤྲོད་གནང་བའི་སྐབས་རྒྱ་ནག་གཞུང་གིས་བོད་ཀྱི་ཁོར་ཡུག་གཏོར་བཅོམ་དང་། རིག་གཞུང་བཙན་སྒྱུར། མི་རིགས་ཀྱི་ངོ་བོ་རྩ་མེད་གཏང་རྒྱུའི་འཆར་གཞིའི་སྐོར་ངོ་སྤྲོད་དང་འབྲེལ། ཁོང་ཉིད་ཕྱི་ལོ་ ༢༠༡༥ ལོའི་གསར་འགོད་པའི་བསྐོར་སྐྱོད་པའི་ཁོངས་སུ་ཡོད་པས་ལྷ་ས་དང་། ཁྲིན་ཏུ་སོགས་བོད་ཀྱི་ས་གནས་ཁག་ཏུ་བསྐྱོད་རྒྱུའི་གོ་སྐབས་བྱུང་ཡོད་སྐོར་འགྲེལ་བརྗོད་སྐྱོན། དེ་བཞིན་ཁོང་གིས་བོད་ནང་གི་དངོས་ཡོད་གནས་སྟངས་དང་རྒྱ་གཞུང་གིས་དྲག་གནོན་དང་བཙོན་འཇུག་སོགས་ཇི་ལྟར་བྱས་ཀྱང་གཞིས་བཞུགས་བོད་མི་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ལ་དད་པ་དང་ཡིད་ཆེས་བརྟན་པོ་ཡོད་པའི་སྐོར་ངོ་སྤྲོད་གནང་ཡོད། སྐུ་མགྲོན་གཙོ་བོ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དཔེ་དེབ་དབུ་འབྱེད་དང་འབྲེལ་ནས་ཐོག་མར་རྩོམ་པ་པོར་འཚམས་འདྲི་ལེགས་གསོལ་དང་བཅས་དཔེ་དེབ་འདི་ནི་འགྲུལ་བཞུད་ཉིན་དེབ་ཙམ་མ་ཡིན་པར་དེའི་ནང་བོད་ཀྱི་རིག་གཞུང་དང་། ལོ་རྒྱུས། དེ་བཞིན་རྒྱ་གར་གྱི་མཁན་པོ་ཞི་བ་འཚོ་དང་། སློབ་དཔོན་པདྨ་འབྱུང་གནས། ཇོ་བོ་རྗེ་དཔལ་ལྡན་ཨ་ཏི་ཤ རཱ་ཧུལ་སཱན་ཀྲྀཏྱཱ་ཡན། དགེ་འདུན་ཆོས་འཕེལ་ལ་སོགས་བོད་དང་འབྲེལ་བའི་ལོ་རྒྱུས་མི་སྣ་མང་པོའི་སྐོར་གསལ་ཡོད་སྐོར་དང་། བོད་ཀྱི་སྐོར་ཤེས་འདོད་ཡོད་རིགས་ནས་དེབ་དེ་བཀླག་དགོས་པའི་རེ་སྐུལ་གནང་ཡོད། གཞན་ཡང་རིན་པོ་ཆེ་མཆོག་གིས་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་གྱི་སྐོར་ངོ་སྤྲོད་དང་། བོད་རྒྱ་གྲོས་མོལ་ཐད་གསུང་བཤད་གནང་སྟེ་དབུ་མའི་ལམ་གྱི་གོ་བ་གཏིང་ཟབ་རྟོགས་པར་གཱཾ་དྷཱིས་མཛད་པའི་རང་སྲིད་རང་སྐྱོང་ཞེས་པའི་ཕྱག་དེབ་ཀློག་དགོས་པའི་ལམ་སྟོན་གནང་། གཞན་ཡང་མཛད་སྒོའི་ཐོག་སྐུ་ཞབས་རཱམ་ཅནྡྲ་ར་ཧི་ལགས་དང་། སྐུ་ཞབས་བེད་པྲ་ཏཱབ་བཻ་དིཀ་ལགས། གཙུག་ལག་སློབ་དཔོན་ཧ་རཱིཤ་ཁནྣཱ་ལགས། སྐུ་ཞབས་ཨ་ཤོཀ་ཀུ་མཱར་ལགས། སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས་ཀྱིས་ཀྱང་གསུང་བཤད་གནང་ཡོད་པ་དང་། སྐབས་དེར་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་དང་། དྲུང་ཆེ་དོན་གྲུབ་རྒྱལ་པོ་ལགས། ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་ས་གནས་འགོ་འཛིན་རྡོ་རྗེ་ཚེ་རིང་ལགས། འཚེ་མེད་ཞི་བ་ཚོགས་པའི་དོ་དམ་པ་ཏན་ཊོན་ལགས། གསར་འགོད་པ་བགྲེས་པ་སྐུ་ཞབས་བི་ཇཡ་ཀྲཱནྟཱི་ལགས། བོད་ཀྱི་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་བོད་མི་དང་རྒྱ་གར་བོད་དོན་རྒྱབ་སྐྱོར་བ་བརྒྱ་ལྷག་མཉམ་ཞུགས་གནང་ཡོད་པ་རེད། 

ཐེངས་འདིའི་དཔེ་དེབ་དབུ་འབྱེད་མཛད་སྒོ་དེ་བཞིན་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་དང་། རྩོམ་པ་པོ་ཅནྡྲ་བྷཱུ་ཥཎ་ལགས། གཱཾདྷཱིའི་ཞི་བདེའི་ཐེབས་རྩ་བཅས་མཉམ་འབྲེལ་གྱིས་གོ་སྒྲིག་གནང་ཡོད་པ་བཅས།།