༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༠༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཁེ་ན་ཊ་ཁུལ་གྱི་འཚམས་གཟིགས་ཉིན་གཉིས་པར་ཨོ་ཊ་ཝ་ཁུལ་གྱི་བོད་རིགས་མང་ཚོགས་ལ་བོད་དོན་འཐབ་རྩོད་དང་འབྲེལ་བའི་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་དང་ལྷན་དུ་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱང་ལྷན་བཅར་ཞུས་ཡོད་པ་རེད། 

སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མང་ཚོགས་ལ་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་མཆོག་ངོ་སྤྲོད་དང་སྦྲགས། ༸ཀུན་གཟིགས་པཎ་ཆེན་རིན་པོ་ཆེ་མཆོག་གི་གནད་དོན་གསལ་སྟོན་དང་། སྐབས་བཅུ་དྲུག་པའི་བཀའ་ཤག་གི་བཞེངས་ཕྱོགས། སྒྲིག་འཛུགས་ཚགས་ཚུད་ཡོང་ཆེད་ཕྱི་གསལ་ནང་གསལ་དང་འཇོན་ཐང་ནུས་ཚད་ཧ་ཅང་གལ་གནད་ཆེན་པོ་ཡིན་པ་གསུངས།ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་དེང་སྐབས་བཙན་བྱོལ་བོད་མིའི་སྤྱི་ཚོགས་ཁྲོད་ཕྲུ་གུ་སྐྱེ་ཚད་ཉུང་དུ་འགྲོ་བཞིན་པའི་གནས་སྟངས་ལ་ཐུགས་འཚབ་དང་འབྲེལ་བཙན་བྱོལ་བོད་མིའི་གཞིས་ཆགས་དང་སློབ་གྲྭ་ཁག་སྲ་བརྟན་ཆེད་མི་འབོར་ཤུགས་ཆེ་དགོས་སྐོར་གསུངས་པ་མ་ཟད། བོད་མིའི་འཐབ་རྩོད་སྲ་བརྟན་ཡོང་ཆེད་བོད་མི་མི་རེ་ངོ་རེས་ཞབས་འདེགས་ཞུ་དགོས་པ་དང་། བཞུགས་སྒར་རྡ་སར་ཆགས་པའི་བོད་མིའི་སྒྲིག་འཛུགས་འདི་བཞིན་བོད་མི་རྣམས་ཀྱིས་ཁྱིམ་ཚང་ཆེ་བ་ཞིག་ཏུ་ངོས་འཛིན་ཐོག་རང་ངོས་ནས་ས་གནས་ས་ཐོག་ནས་བོད་དོན་འཐབ་རྩོད་ཤུགས་ཆེ་རུ་གཏོང་བར་འབད་འབུངས་སྔར་ལྷག་དགོས་པའི་གཞེན་སྐུལ་གནང་ཡོད་པ་བཅས།།