༄༅། །ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བའི་དུས་ཆེན་སྲུང་བརྩིའི་ཐོག་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་དང་ལས་བྱེད་བཅས་ཆེད་བཅར་གནང་ཡོད། མཛད་སྒོ་དེ་བཞིན་སྐབས་བསྟུན་གྱིས་ཕྱི་སྣུར་བྱས་ཏེ་ཕྱི་ལོ་ ༢༠༢༡ ཟླ་བ་ ༡༢ ཚེས་ ༡༨ རེས་གཟའ་སྤེན་པ་ཉིན་གོ་སྒྲིག་ཞུས་ཡོད་ཅིང་། མཛད་སྒོའི་ཐོག་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་སྐུ་མགྲོན་གཙོ་བོར་གདན་ཞུས་ལྟར་ཕེབས་ཏེ་བཀའ་ཤག་གི་གསུང་འཕྲིན་སྒྲོགས་སྦྱང་ཞུས་པ་དང་སྦྲགས། ཁོང་གིས་དུས་ཆེན་འདི་བརྒྱུད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེའི་ཆེད་སྐུ་ངལ་ཇི་ཙམ་མཛད་ཡོད་པ་རྗེས་སུ་དྲན་དགོས་སྐོར་དང་། བཀའ་ཤག་གིས་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱའི་དཀའ་རྙོག་བསལ་རྒྱུའི་དམ་བཅའ་བརྟན་པོ་ཡོད་པའི་སྐོར་དང་། དེ་བཞིན་ཁོང་གིས་གཞོན་སྐྱེས་གཙོ་བོར་གྱུར་པའི་ཨ་རི་ནང་ཡོད་པའི་བོད་མི་རྣམས་ནས་བོད་མིའི་སྒྲིག་འཛུགས་ཀྱིས་དབུ་འཛུགས་གནང་པའི་དང་བླངས་བོད་དོན་ཞུ་གཏུག་ལས་གཞིའི་ནང་མཉམ་ཞུགས་གང་མང་གནང་རོགས་ཞེས་འབོད་སྐུལ་ཞུས་པ་མ་ཟད། མང་ཚོགས་ནས་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་ཀློག་དགོས་པ་དང་། བོད་མིའི་བདེན་དོན་གསལ་ཆེད་ཚང་མས་ནུས་པ་མཉམ་དུ་སྤུངས་དགོས་པ་གསུངས། ཕྱོགས་མཚུངས་སྐུ་ཚབ་དོན་གཅོད་ཀྱིས་ཨ་རི་གཞུང་སྤྱི་དང་བྱེ་བྲག་ཏིུ་ཕྱི་ལོ་ ༢༠༢༡ ཟླ་བ་ ༡༢ ཚེས་ ༡༤ཉིན་དྲུང་གཞོན་ཨ་ཛ་ར་ཛེ་ཡ་ལགས་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་གཏན་འཁེལ་བ་མཁྱེན་རྟོགས་བྱུང་རྗེས་གྲོས་ཚོགས་འཐུས་མི་ ༦༠ ཡིས་ཁོང་མོར་ཕྱག་བྲིས་ཕུལ་གནང་བར་ཐུགས་རྗེ་ཆེ་ཞུས་གནང་འདུག 

མཛད་སྒོའི་ཐོག་ཏུ་བཀའ་ཟུར་བཀྲས་ཐོང་བསྟན་འཛིན་རྣམ་རྒྱལ་མཆོག་དང་། རྒྱལ་སྤྱི་བོད་དོན་ལས་འགུལ་ཁང་གི་བར་བརྒལ་ཚོགས་གཙོ་བུ་ཆུང་ཚེ་རིང་ལགས། ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ཚོགས་གཞོན་བསྟན་འཛིན་འཇིགས་མེད་ལགས། བསྟན་འཛིན་ཚེ་གྲུབ་ལགས་བཅས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དང་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གསུང་བཤད་གནང་། བཀའ་ཟུར་བཀྲས་ཐོང་བསྟན་འཛིན་རྣམ་རྒྱལ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་རྟོགས་པར་མགོན་པོ་གང་ཉིད་མཆོག་གིས་ལྗགས་རྩོམ་གནང་བའི་ཕྱག་དེབ་ངོས་ཀྱི་ཡུལ་དང་ངོས་ཀྱི་མི་མང་། གནའ་བོའི་ཤེས་རིག་དང་དེང་རབས་ཀྱི་འཛམ་གླིང་། སྟོང་ལོ་གསར་པའི་བཟང་སྤྱོད་སོགས་ཀློག་དགོས་སྐོར་གསུངས་པ་མ་ཟད། མ་ཎི་འདོན་པ་དང་མཆོད་གཤོམ་ནང་དཔེ་ཆ་བསྒྲིགས་ནས་བཞག་པ་ལས་༧གོང་ས་མཆོག་གི་བཀའ་སློབ་རྣམས་ཉིན་རེར་ཉམས་ལེན་བྱ་རྒྱུ་གལ་ཆེ་བ་ཡིན་ཞེས་གསུངས། 

རྒྱལ་སྤྱི་བོད་དོན་ལས་འགུལ་ཁང་གི་བར་བརྒལ་ཚོགས་གཙོ་བུ་ཆུང་ཚེ་རིང་ལགས་ཀྱིས་ཕྱི་ཡུལ་ན་ཡོད་པའི་བོད་མི་རྣམས་ནས་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་འབྲེལ་བའི་གནས་ཚུལ་དང་། དེ་བཞིན་གཞིས་བྱེས་བོད་མི་དང་འབྲེལ་བའི་མུ་མཐུད་འགྲེལ་བརྗོད་ལོག་པ་རྒྱག་གི་ཡོད་པས། དེ་དག་སུན་འབྱིན་པའི་ཆེད་༧གོང་ས་མཆོག་གི་བཀའ་སློབ་གསུང་ཆོས་རྣམས་བོད་ནང་གང་ཐུབ་ཅི་ཐུབ་སྤེལ་ཐབས་གནང་དགོས་ཞེས་རེ་སྐུལ་ཞུས་ཡོད། དེ་ནས་ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭའི་སློབ་ཕྲུག་རྣམས་ནས་ནོ་ཝེལ་བསྟོད་དབྱངས་འབུལ་ལམ་ཞུས་ཤིང། དེ་རྗེས་ནོ་ཝེལ་ཞི་བདེའི་གཟེངས་རྟགས་དང་འབྲེལ་བའི་འདྲི་གླེང་འགྲན་སྡུར་ཞིག་གོ་སྒྲིག་ཞུས་མཐར་ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ཚོགས་གཙོས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲོལ་ཡོད་བཅས།།