གསར་ལས་ཁང་གི་གསར་འགོད་པས།

ཕྱི་ལོ་ ༢༠༢༠ ཟླ་ ༡༢ ཚེས་ ༢༢ རེས་གཟའ་མིག་དམར། 

 

༄༅། །ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ (Tibetan Policy and Support Act of 2020 ) དེ་བཞིན་ཕྱི་ལོ་ ༢༠༢༠ ཟླ་ ༡༢ ཚེས་ ༢༡ ཉིན་ཨ་རིའི་གྲོས་ཚོགས་གོང་མའི་ནང་སྤྱི་མོས་ཐོག་གཏན་འབེབས་གནང་ཡོད།

ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེ་ད་ཆ་ཨ་རིའི་གཞུང་གི་གཞུང་འབྲེལ་སྲིད་བྱུས་ཤིག་ཆགས་ཟིན་པ་དང་། ཁྲིམས་འཆར་དེའི་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་གྱི་འགན་དབང་མགོན་པོ་གང་ཉིད་མཆོག་དང་བོད་མི་ཚོར་ཡོད་པ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་བཀོད་ཡོད། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་འབྲེལ་ཡོད་ལས་བྱེད་དེ་དག་ལ་དམ་བསྒྲགས་བཀའ་ཆད་ལྕི་མོ་གཅོད་རྒྱུ་ཡིན་པ་རེད།

ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་མཇུག་སྐྱོང་ཆེད་དུ་ཕྱི་ལོ་ ༢༠༢༠ ཟླ་ ༡༡ ནང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིར་ཆེད་ཕེབས་གནང་ཡོད། དཔལ་ལྡན་སྲིད་སྐྱོང་མཆོག་གིས། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེ་སྤྱི་མོས་ཐོག་གཏན་འབེབས་གནང་བ་དེས་བོད་ཀྱི་གནད་དོན་དེ་ཨ་རིའི་གཞུང་གིས་གལ་ཆེན་པོ་ཞིག་ལ་རྩི་བཞིན་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ལ་མུ་མཐུད་རྒྱབ་སྐྱོར་གནང་བཞིན་ཡོད་པའི་བརྡ་ལན་གསལ་པོ་ཞིག་བསྟན་ཡོད་པ་དང་། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་སྤྱི་མོས་ཐོག་གཏན་འབེབས་གནང་བ་དེས་བོད་མིའི་རང་དབང་འཐབ་རྩོད་ཁྲོད་ལོ་རྒྱུས་རང་བཞིན་ལྡན་པ་ཞིག་བསྐྲུན་ཡོད། ཅེས་གསུངས།

ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེས་བོད་མིའི་སྒྲིག་འཛུགས་དང་དེའི་འགོ་ཁྲིད་སྲིད་སྐྱོང་མཆོག་ངོས་འཛིན་གནང་ཡོད་པ་མ་ཟད། བོད་མཐོ་སྒང་གི་ཁོར་ཡུག་དང་ཆུའི་འབྱུང་ཁུངས་ལ་སྲུང་སྐྱོབ་གནང་རྒྱུ་དང་། ཨ་རིའི་མི་སེར་དང་བཟོ་ཚོང་ཁང་སོགས་ཀྱིས་བོད་ནང་ཚོང་ལས་གཉེར་དགོས་ཚེ་རྒྱལ་ཚོགས་ཀྱིས་ཚོང་དང་འགྲོ་བ་མིའི་ཐོབ་ཐང་སྐོར་ལམ་སྟོན་གནང་བ་ཁག་ལ་སྲུང་བརྩི་ཞུ་དགོས། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེས་བོད་རང་སྐྱོང་ལྗོངས་དང་བོད་རིགས་གནས་སའི་ས་ཁུལ་གཞན་གྱི་བོད་མི་ཚོའི་ཆེད་དུ་ཨ་སྒོར་ས་ཡ་བརྒྱད་དང་། རྒྱ་གར་དང་བལ་ཡུལ་ནང་གི་བོད་མི་ཚོའི་ཆེད་དུ་ཨ་སྒོར་ས་ཡ་དྲུག  བོད་མིའི་ཚོགས་པ་སྒྲིག་འཛུགས་ཁག་དང་། མང་གཙོ། འཛིན་སྐྱོང་བཅས་ཚགས་ཚུད་དང་། ཉམས་ཞིབ་སོགས་ཀྱི་ཆེད་དུ་ཨ་སྒོར་ས་ཡ་གསུམ། བོད་དང་བོད་མིའི་གནས་ཚུལ་མཁོ་གཏོང་བྱེད་བཞིན་པའི་ཨ་རིའི་རླུང་འཕྲིན་ཁང་ལ་ཨ་སྒོར་ས་ཡ་གསུམ་དང་ཁྲི་བཞི། ཨེ་ཤི་ཡ་རང་དབང་རླུང་འཕྲིན་ཁང་ལ་ཨ་སྒོར་ས་ཡ་བཞི། དེ་བཞིན་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་ཁུངས་ཀྱི་ཆེད་དུ་ཨ་སྒོར་ས་ཡ་གཅིག་བཅས་རོགས་དངུལ་བཀའ་འཁྲོལ་གནང་ཡོད། 

ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེས་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཁང་འཛུགས་དགོས་པའི་འབོད་སྐུལ་དང་། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཁང་འཛུགས་མ་ཐུབ་བར་ཨ་རིའི་ཕྱི་སྲིད་ལྷན་ཁང་ནས་རྒྱ་ནག་གཞུང་ལ་རྒྱ་ནག་གཞུང་ཚབ་ཁང་གསར་པ་ཨ་རིའི་ནང་འཛུགས་པར་བཀའ་འཁྲོལ་གནང་མི་ཆོག་པ་བཀོད་ཡོད།  ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེ་བཞིན་ཐོག་མར་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་། ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་ཚོགས་མི་སྐུ་ཞབས་མར་ཁོ་རུ་བྷིའོ་ (Marco Rubio) མཆོག་གིས་ངོ་སྤྲོད་གནང་ཡོད།  ཁྲིམས་འཆར་དེར་ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་བྷེན་ཁར་ཌིན་ (Ben Cardin) མཆོག་དང་གྲོས་ཚོགས་འོག་མའི་འཐུས་མི་སྐུ་ཞབས་ཁེ་རེཡ་ས་སི་མི་ཐི་ (Chris Smith) མཆོག་སོགས་ཀྱིས་རྒྱབ་སྐྱོར་གནང་ཡོད།
ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་དང་གྲོས་ཚོགས་གོང་མའི་མང་མོས་འགོ་ཁྲིད་སྐུ་ཞབས་མག་ཁོན་ནེལ་ (Mitch McConnell) མཆོག  ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེམ་སི་ (James E. Risch) མཆོག གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་མི་ནན་ཌེ་ཛི་ (Robert Menendez) མཆོག  མང་གཙོ་ཚོགས་པའི་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཨེ་ལོ་ཡིཌ་ཨེན་ཇེལ་ (Eliot Engel) མཆོག གྲོས་ཚོགས་འོག་མའི་འཐུས་མི་སྐུ་ཞབས་མའི་ཀལ་མེག་ཀོལ་ (Michael McCaul) མཆོག་སོགས་དང་། དེ་བཞིན་བོད་རྒྱབ་སྐྱོར་བ་དང་བོད་རིགས་སྤྱི་མཐུན་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་། ས་གནས་གཞོན་ནུ། བོད་རང་བཙན་སློབ་ཕྲུག་ཚོགས་པ་སོགས་ནས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་རྒྱབ་སྐྱོར་གནང་བར་དཔལ་ལྡན་སྲིད་སྐྱོང་མཆོག་གིས་ཐུགས་རྗེ་ཆེ་ཞུས་ཡོད། །

  •  
  •  
  •  
  •  
  •