ཟླ་བ་ ༡༠ ཚེས ༣༠ ༢༠༢༠
 གསར་ལས་ཁང་གི་གསར་འགོད་པས།

ཕྱི་ལོ ༢༠༢༠ ཟླ་ ༡༠ ཚེས་ ༣༠ རེས་གཟའ་པ་སངས།

༄༅། །རྒྱ་ནག་གཞུང་གིས་བོད་ཁམས་འབྲི་རུ་རྫོང་ནས་ཡིན་པ་གླུ་བ་ལྷུན་གྲུབ་གྲགས་ལགས་སུ་མི་ལོ་ ༦ གི་དུས་བཀག་བཙོན་འཇུག་གི་ཁྲིམས་ཐག་བཅད་འདུག  བཙོན་འཛུག་བྱེད་དོན་ནི་ཁོང་གིས་བོད་ལྗོངས་ནག་ཆུ་གྲོང་ཁྱེར་འབྲི་རུ་རྫོང་སྲིད་གཞུང་གི་དྲག་གནོན་སྲིད་བྱུས་ལ་སྐྱོན་བརྗོད་ཀྱི་གླུ་བླངས་བར་ཁ་གཡར་བ་ཞིག་རེད་འདུག 

དེ་ཡང་བོད་ཀྱི་འགྲོ་བ་མིའི་ཐབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་གནས་ཚུལ་སྤེལ་གསལ་ལྟར།  རྒྱ་གཞུང་གིས་བོད་ཀྱི་གཞོན་སྐྱེས་གླུ་བ་ལྷུན་གྲུབ་གྲགས་པ་ཞུ་བར་མི་ལོ་ ༦ གི་དུས་བཀག་བཙོན་འཇུག་གི་ཁྲིམས་ཆད་བཅད་ཅིང་། ཁོང་བཙོན་འཇུག་བྱེད་དོན་གཙོ་བོ་ཁོང་གིས་བོད་ལྗོངས་ནག་ཆུ་གྲོང་ཁྱེར་འབྲི་རུ་རྫོང་སྲིད་གཞུང་གི་དྲག་གནོན་སྲིད་བྱུས་ལ་སྐྱོན་བརྗོད་ཀྱི་གླུ་བླངས་བར་ཁ་གཡར་བ་ཞིག་རེད། དེ་ཡང་ཕྱི་ཟླ་ ༣ པའི་ནང་གླུ་བ་གྲགས་པས་ ༼ ཞྭ་མོ་ནག་པོ། ༽ ཞེས་པའི་གླུ་གཞས་དེ་བླངས་ནས་ཟླ་ ༢ ཙམ་གྱི་རྗེས་ཏེ། ཕྱི་ལོ་༢༠༡༩ ཟླ་ ༥ བའི་ནང་ཁོང་བཀག་བསྐྱིལ་བྱས་ཤིང་། འདི་ལོའི་ཕྱི་ཟླ་༦ པའི་ནང་ཁོང་ལ་ཁྲིམས་ཐག་བཅད་འདུག དུས་ཡུན་མི་ལོ་༡ ལྷག་ལ་བཀག་ཉར་བྱས་ཪིང་ཁོང་ལ་ཁྲིམས་ཀྱི་འགྲོ་ལུགས་གཞིར་བྱས་ཀྱི་ཁྲིམས་རྩོད་པ་གླ་བཅུག་མེད་ཁར་དྲང་བདེན་གྱི་ཁྲིམས་ཞིབ་ཐོབ་ཐང་སྤྲད་མེད་པ་རེད།

འདས་པའི་ལོ་ངོ་བདུན་རིང་བཙན་བྱོལ་བོད་མིས་འབྲི་རུ་རྫོང་གི་དངོས་ཡོད་གནས་སྟངས་ལ་རྒྱུན་ལོན་བྱས་པའི་གནས་ཚུལ་ཁག་གི་ནང་དུ། རྒྱ་གཞུང་གིས་བོད་མི་ཚོ་བཀག་བསྐྱིལ་གྱིས་མནར་གཅོད་བཏང་ནས་དམར་གསོད་བྱས་དང་བྱེད་བཞིན་པ་དེ་ནི། རྒྱ་གཞུང་རང་གི་དབང་སྒྱུར་གྱི་ཆབ་སྲིད་ལྟ་སྤྱོད་དང་མི་མཐུན་མཁན་ཚང་མར་དྲག་གནོན་བྱེད་ཐབས་ཀྱི་སྲིད་ཇུས་ཤིག་ཡིན་པ་གསལ་ཡོད། འབྲི་རུ་རྫོང་དམར་ཤོག་དྲུང་ཆེས་བཀོད་ཁྱབ་བཏང་བ་ལྟར། ཕྱི་ལོ་༢༠༡༤ ཟླ་༡༡ པའི་ནང་གཡང་ཤོག་ཡུལ་ཚོའི་༼རྒྱ་ཤོད་སེན་ཚ་ཡུལ་ཚོ།༽དབུ་གཞུང་གྲོང་སྡེའི་འགོ་ཁྲིད་འབའ་ཆེན་རྒྱལ་བ་༼ངག་དབང་སྨོན་ལམ་ཡང་ཟེར།༽འཛིན་བཟུང་དང་གཞན་བོད་མི་ཁག་ཅིག་དམར་གསོད་བཏང་བ་དང་། ཕྱི་ལོ་༢༠༡༣ ཟླ་༡༢ བའི་ནང་རྒན་ངག་དབང་འཇའ་དཔལ་བཀག་ཉེར་གྱིས་མནར་གཅོད་བཏང་ནས་ཟླ་གཅིག་མ་ཟིན་ཙམ་གྱི་རྗེས་སུ་དམར་གསོད་བཏང་བ་རེད། དེ་བཞིན་དུ་ཕྱི་ལོ་༢༠༡༤ ཟླ་༡ བའི་ནང་འབྲི་རུ་ཞང་ལྕམ་རམ་གྲོང་གི་ན་གཞོན་དཀོན་མཆོག་གྲགས་པ་ཞུ་བ་ཞིག་དུས་ཡུན་བདུན་ཕྲག་ཁ་ཤས་རིང་འཛིན་བཟུང་གིས་ཡུལ་མི་ཚོར་བརྡ་ལན་ཙམ་ཡང་མ་སྤྲད་པར་ཉེན་རྟོག་ཁང་དུ་བཀག་ཉར་གྱིས་མནར་གཅོད་བཏང་ནས་དམར་གསོད་བྱས་པ་དང་། ཕྱི་ལོ་༢༠༡༦ གི་ལོ་སྟོད་ཙམ་ནང་མོག་ཁམས་གྲོང་ཚོ་ནས་ཡིན་པའི་ཁྲི་རྒྱལ་ལ་མི་ལོ་༡༣ གྱི་དུས་དཀག་བཙོན་འཇུག་གི་ཁྲིམས་ཆད་བཅད་ནས་ལོ་༢ ཀྱི་རྗེས་སུ་འདས་གྲོངས་ཕྱིན་པ་རེད། ཉེས་མེད་མི་སྒེར་ལ་ཐེབས་པའི་འཚེ་བའི་བསམ་སྦྱོར་འདི་དག་ནི་སྔར་བྱུང་མ་མྱོང་བ་ཞིག་གཏན་ནས་མ་ཡིན་པར། གནས་སྟངས་འདིས་བོད་ས་ཡོངས་ཀྱི་ཆབ་སྲིད་བཙོན་པ་ཚོར་སྡུག་སྦྱོང་མནར་གཅོད་གཏོང་བཞིན་པའི་རྒྱ་གཞུང་གི་བསམ་སྦྱོར་དངོས་གསལ་འགྲེལ་བྱས་ཡོད། བོད་མི་འདི་དག་གིས་བོད་ནང་ལོགས་ཀྱི་དངོས་ཡོད་གནས་སྟངས་ཐད་ཀྱི་རྒྱ་གཞུང་གི་འཁྱོག་བཤད་དྲིལ་བསྒྲགས་ཐེར་འདོན་དང་འགྲོ་བ་མིའི་ཐོབ་ཐང་དགོས་པའི་ཞི་འབོད་གནང་ཡོད་ཅིང་། རྒྱ་གཞུང་གིས་ཁོང་ཚོར་ནག་མེད་བསྙོན་འཛུགས་ཀྱི་མནར་གཅོད་བཏང་བ་དེ་ནི། རྒྱ་གཞུང་གིས་བོད་ས་ཡོངས་སུ་དམ་དྲག་སྟངས་འཛིན་བྱེད་ཐབས་སུ། རྒྱ་གཞུང་རང་གི་ཆབ་སྲིད་ལྟ་སྤྱོད་དང་མི་མཐུན་མཁན་ཚང་མ་ཚར་གཅོད་གཏོང་ཐབས་ཀྱི་ལས་འགུལ་གྱི་ཆ་ཤས་ཤིག་རེད།