ཟླ་བ་ ༧ ཚེས ༢༣ ༢༠༢༠
 གསར་ལས་ཁང་གི་གསར་འགོད་པས།

ཕྱི་ལོ་ ༢༠༢༠ ཟླ་ ༧ ཚེས་ ༢༣ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༧ ཚེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་རྒྱ་བརྒྱུད་རྒྱ་གར་གྱི་རིགས་རྒྱུད་དུ་གཏོགས་པའི་རྒྱལ་སྤྱིའི་སྨན་པའི་ལྷན་ཚོགས་དང་། གཙུག་ལག་རབ་འབྱམས་པའི་སྨན་པའི་ཤེས་ཡོན་དང་ཞིབ་འཇུག་བསྟི་གནས་ཁང་། རྒྱ་གར་གྱི་ཡོ་ག་ཚོགས་པ་བཅས་ཀྱི་སྨན་པ་དང་། མཁས་དབང་། ཚོགས་མི་བཅས་ལ་སྨན་བཅོས་བྱེད་སྐབས་བྱམས་པ་དང་སྙིང་རྗེའི་ཉམས་ལེན་བྱེད་སྟངས་ཀྱི་བརྗོད་གཞི་དང་འབྲེལ་བའི་སྐོར་བཀའ་སློབ་སྩལ་དོན།
མཁས་དབང་རྣམ་པ་ཚོ་དང་ལྷན་བགྲོ་གླེང་བྱེད་རྒྱུའི་གོ་སྐབས་བྱུང་བར་ངོས་རང་དངོས་གནས་དྲང་གནས་དགའ་པོ་བྱུང་། དུས་རབས་ཁ་ཤས་གོང་བོད་པའི་མཁས་པ་ཞིག་གིས། སངས་རྒྱས་ཀྱི་གོ་འཕང་མ་ཐོབ་བར་དུ་ང་ཚོས་རྒྱུན་དུ་སློབ་སྦྱོང་བྱེད་དགོས། ཞེས་གསུངས་ཡོད། ངོས་ཀྱིས་ཁོང་གི་གསུང་དེར་ཡིད་ཆེས་བྱེད་ཀྱི་ཡོད། ང་ཚོའི་འཕྲོད་བསྟེན་ཟེར་བ་དེ་སེམས་དང་སེམས་ཚོར། གཟུགས་པོ་བཅས་ལ་འབྲེལ་བ་ཡོད། བྱམས་བརྩེ་དང་གཞན་ཕན་གྱི་བློ་ཡོད་ན་ནང་སེམས་ལ་ཞི་བདེ་དང་བློ་སྟོབས་འཕེལ་གྱི་ཡོད་པ་མ་ཟད། སེམས་བག་ཕེབས་པ་ཞིག་ཡོང་གི་ཡོད། ཐ་ན་རང་ཉིད་ལ་དཀའ་ངལ་འཕྲད་པ་དང་། མི་གཞན་ཞིག་གིས་རང་ཉིད་ལ་སྐྱོན་བརྗོད་བྱེད་སྐབས་ཕ་རོལ་པོ་དེ་བཀའ་དྲིན་ཆེན་པོ་དང་དགེ་རྒན་ལྟ་བུར་བརྩི་དགོས་པ་ལས་འཁོན་ལན་སློག་རྒྱུ་མེད།

སེམས་ཁྲལ་དང་ཁོང་ཁྲོའི་གཉེན་པོ་བསྟེན་སྟངས་ཡག་ཤོས་སྙིང་རྗེ་ཡིན། ཡོ་ག་ཉམས་ལེན་བྱེད་སྐབས་དབུགས་གཏོང་ལེན་བྱེད་ཐུབ་ན། སྙིང་གི་འཕར་ཚད་དལ་དུ་འགྲོ་གི་ཡོད། ལྷག་པར་སྙིང་གི་འཕར་ཚད་ཀྱི་དཀའ་ངལ་དང་སེམས་ཁྲལ་ཆེན་པོ་ཡོད་མཁན་གྲས་ཚོས་དབུགས་གཏོང་ལེན་སྦྱོང་བརྡར་བྱེད་ཐུབ་ན་ཏན་ཏན་ཕན་ཐོགས་འབྱུང་ངེས་རེད། ཡོ་གའི་སྲོལ་རྒྱུན་རིག་གཞུང་ནི་གནའ་བོ་རྒྱ་གར་གྱི་ཆོས་ལུགས་ལས་བྱུང་བ་བཤད་ཀྱི་ཡོད། འོན་ཀྱང་ང་ཚོས་ཡོ་གའི་སྲོལ་རྒྱུན་རིག་གཞུང་དེ་དག་ཤེས་ཡོན་གྱི་སྡེ་ཚན་ཁོངས་གཏོགས་སུ་བརྩི་དགོས། ཡོ་ག་ཟེར་བ་དེ་སངས་རྒྱས་ཀྱི་གོ་འཕང་དང་སྐྱེ་བ་ཕྱི་མ་མི་ཚེ་བཟང་པོ་སྐྱེ་རྒྱུའི་སྐད་ཆ་མ་རེད། ཡོ་ག་ཟེར་བ་དེ་གཟུགས་པོའི་འཕྲོད་བསྟེན་ཡག་པོ་ཡོང་ཆེད་ཁོ་ན་རེད། ཡོ་གས་སེམས་ཁྲལ་ཡང་ཉུང་དུ་གཏོང་ཐུབ་ཀྱི་ཡོད།

ངོས་ཀྱིས་འདས་པའི་ལོ་ངོ་བཅུ་ཕྲག་ཁ་ཤས་རིང་ཚན་རིག་པ་ཚོ་དང་ལྷན་བགྲོ་གླེང་བྱས་མྱོང་། ངོས་ཀྱིས་བགྲོ་གླེང་བྱེད་སའི་ཚན་རིག་པ་དེ་དག་ཕལ་ཆེ་བ་ནུབ་ཕྱོགས་ཡུལ་གྲུ་ཁག་ནས་རེད། ཁོང་ཚོ་ཚང་མར་ནུབ་ཕྱོགས་པའི་རིག་གཞུང་དང་གོམས་སྲོལ་ཡོད་མཁན་ཤ་སྟག་རེད། ཁོང་ཚོ་ཚང་མ་མི་ཚེ་ཧྲིལ་པོ་ཕྱི་དངོས་པོ་རྐྱང་རྐྱང་གི་ཁྲོད་ནས་འཚར་ལོངས་བྱུང་བ་མ་ཟད། ཁོང་ཚོའི་སློབ་སྦྱོང་དེ་ཡང་ཕྱི་དངོས་པོ་རྐྱང་རྐྱང་རེད། ཡིན་ཡང་ཚན་རིག་པ་དེ་དག་གིས་སེམས་ཁམས་རིག་པ་དང་འབྲེལ་བའི་རྒྱ་གར་གྱི་གནའ་བོའི་ལེགས་བཤད་དེ་དག་ལ་རྗེས་སུ་ཡི་རངས་ཞུ་གི་འདུག དེང་སང་ངོས་ཀྱིས་ལུས་པོའི་འཕྲོད་བསྟེན་དང་སེམས་ཀྱི་འཕྲོད་བསྟེན་སྐོར་རྗོད་ཀྱི་ཡོད། ལུས་པོའི་འཕྲོད་བསྟེན་དང་སེམས་ཀྱི་འཕྲོད་བསྟེན་ངེས་པར་ཟུང་དུ་འབྲེལ་ནས་འགྲོ་དགོས། ཞེས་སོགས་ཀྱི་བཀའ་སློབ་སྩལ།།