གསར་ལས་ཁང་གི་གསར་འགོད་པས།

ཕྱི་ལོ་ ༢༠༡༩ ཟླ་ ༡༡ ཚེས་ ༨ རེས་གཟའ་པ་སངས།

༄༅། །བོད་ཁམས་ཤག་རོང་པོ་རྟར་ཆེན་ཡུལ་ཚོ་ནས་ཡིན་པའི་བོད་མི་ལྷ་དར་ཞུ་བ་ཞིག་རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ཏེ་ཉིན་གྲངས་མང་པོ་འགྲོ་བཞིན་ཡོད་ནའང་ད་ལྟ་གང་དུ་ཡོད་མེད་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་དང་། ཁོང་འཛིན་བཟུང་བྱས་དོན་གཙོ་བོ་ནི་གསང་བ་ཕྱིར་བསྒྲགས་བྱས་པའི་ཉེས་འཛུགས་འོག་ཡིན་པར་ཚོད་དཔག་བྱེད་བཞིན་ཡོད་འདུག

དེ་ཡང་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་གསལ་ལྟར་ན། ཕྱི་ལོ་ ༢༠༡༩ ཟླ་ ༡༠ ཚེས་ ༨ ཙམ་ལ་བོད་ནག་ཆུ་ས་ཁུལ་ཤག་རོང་པོ་རྟར་ཆེན་ཡུལ་ཚོ་ས་ལྷི་གྲོང་ཚོ་ནས་ཡིན་པའི་བོད་མི་ལྷ་དར་ལགས་རྒྱ་ནག་གཞུང་གིས་འཛིན་བཟུང་བྱས་ཏེ། ད་ལྟའི་ཆར་ཁོང་གང་དུ་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་ཡོད། ད་ལྟ་རང་ལོ་ ༣༦ ཡིན་པའི་ལྷ་དར་ལགས་ནི་རྒྱུན་དུ་རྒྱ་གཞུང་གིས་བོད་ནང་ཆབ་སྲིད་སློབ་གསོ་དང་བོད་མིའི་འགྲོ་སྐྱོད་ཐོག་ལ་སུན་གཙེར་བཟོ་བཞིན་པ་སོགས་ལ་མཐའ་གཅིག་ཏུ་འདོད་མོས་མེད་པའི་རྣམ་འགྱུར་སྟོན་མཁན་ཞིག་དང་། དད་པ་ཟབ་ཅིང་ཡིད་ཆེས་བརྟན་པའི་བོད་མི་ལ་རྒྱ་ཅན་ཞིག་ཡིན་འདུག  ཕྱི་ལོ་ ༢༠༡༣ ལོར་རྒྱ་ནག་གཞུང་གིས་བཙན་གྱིས་ཤག་རོང་པོ་དགོན་པར་ཆོས་ལུགས་ཀྱི་བྱེད་སྒོ་སྤེལ་མཚམས་འཇོག་ཏུ་བཅུག་ནས་སྒོ་རྒྱག་སྐབས། ཁོང་ཚུད་པའི་ཡུལ་མི་ཚོས་སྲིད་གཞུང་གི་མི་སྣར་རེ་སྐུལ་ཞུ་སྐབས་ཏོག་ཙམ་ཁ་རྩོད་ཤོར་ནས་ཉུང་མཐར་མི་གྲངས་ ༤༠ འཛིན་བཟུང་དང་བཀག་ཉར། རྡུང་རྡེག་བྱས་ཏེ་ཟླ་གཅིག་ལྷག་རིང་བཀག་ཉར་བྱས་རྗེས་ཀློད་གྲོལ་བཏང་ཡོད་ཀྱང་མུ་མཐུད་དམིགས་བཀར་ལྟ་རྟོག་འོག་བཞག་ཡོད་འདུག །

Share with your friends










Submit