ཟླ་བ་ ༡༡ ཚེས ༡༦ ༢༠༡༩
 གསར་ལས་ཁང་གི་གསར་འགོད་པས།

ཕྱི་ལོ་ ༢༠༡༩ ཟླ་ ༡༡ ཚེས་ ༡༦ རེས་གཟའ་སྤེན་པ།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༡ ཚེས་ ༧ ནས་ ༡༤ བར་ཉིན་གྲངས་ ༨ རིང་བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་རྒྱུན་ལས་ཁང་ནས་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་རྒྱ་གར་བྱང་ཤར་ཀ་རྡོར་སྒང་གསུམ་དང་། ར་ཝང་ལ་ཀུན་ཕན་གླིང་གཞིས་ཆགས་བཅས་ཀྱི་ས་གནས་མི་མང་རྣམས་ལ་ “མང་གཙོ་དང་ཆིག་སྒྲིལ་“ ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུར་གདན་ཞུས་ལྟར་ཆེད་ཕེབས་གནང་ཡོད་པ་དང་བསྟུན། ཀ་རྡོར་སྒང་གསུམ་དང་ར་ཝང་ལ་ཀུན་ཕན་གླིང་གཞིས་ཆགས་བཅས་ཀྱི་ས་གནས་འགོ་འཛིན་སོ་སོའི་གོ་སྒྲིག་འོག་དཔལ་ལྡན་ཚོགས་གཞོན་མཆོག་གིས་རྒྱ་གར་གྲོས་ཚོགས་གོང་འོག་གི་འཐུས་མི་ལས་ཟུར་དང་། བོད་དོན་རྒྱབ་སྐྱོར་བ་སོགས་གནད་ཡོད་མི་སྣ་ཁག་གཅིག་མཇལ་འཕྲད་གནང་ཡོད་འདུག

ཕྱི་ཚེས་ ༧ ནས་ ༡༤ བར་རིམ་པས་རྡོར་གླིང་རྫོང་དཔོན་ལྕམ་སྐུ་དྷི་བྷབ་པིར་ཡ་པི་ Smt. Deepap Priya P,district magistrate of Darjeeling མཆོག་དང་། ར་ཝང་ལ་ས་ཁུལ་མངའ་སྡེའི་གྲོས་ཚོགས་འཐུས་མི་བྷོ་ཊི་ཡ་བཀྲ་ཤིས་དོན་གྲུབ་མཆོག  འབྲས་ལྗོངས་ས་ཁུལ་གྱི་རྒྱ་གར་དབུས་གྲོས་ཚོགས་འོག་མའི་འཐུས་མི་སྐུ་ཞབས་ཨིན་དྷ་ར་ཧང་སུ་བྷ་ Shri Indra Hang Subba,MP from Sikkim མཆོག རྒྱ་གར་དབུས་གྲོས་ཚོགས་གོང་མའི་འཐུས་མི་ཟུར་པ་དང་བོད་དོན་རྒྱབ་སྐྱོར་བ་སྐུ་ཞབས་པི་ཊི་རྒྱམ་མཚོ་ P.T.Gyamtso,Former Rajya Sabha Member མཆོག རྒྱ་གར་གྲོས་ཚོགས་འོག་མའི་འཐུས་མི་ཟུར་པ་སྐུ་ཞབས་པི་ཌི་རཡེ་ Shri P.D Rai,Former MP མཆོག  གྲོས་ཚོགས་འོག་མའི་འཐུས་མི་ཟུར་པ་སྐུ་ཞབས་ན་ཀུལ་དྷ་ས་རཡེ་ Nakul Das Rai, Former MP མཆོག

ཀ་སྦུག་སྐོར་སྲུང་བ་སྤྱི་ཁྱབ་སྐུ་ཞབས་སུར་ཡ་པར་ཏབ་  Shri Surya Pratap Yadav,IPS,SP,Kalimpong མཆོག ཀ་སྦུག་གྲོང་སྡེ་ལས་ཁུངས་ཀྱི་སྤྱི་ཁྱབ་ར་བྷི་པྲ་དཱན་ Shri Rabi Pradhan,Municipality Chairman of Kalimpong མཆོག བྷེང་གྷལ་བྷོ་ཊི་ཡ་ཡར་རྒྱས་ཚོགས་པའི་སྤྱི་ཁྱབ་གཞོན་པ་སྐུ་ཞབས་དགྲ་འདུལ་རིན་ཆེན་བྷོ་ཊི་ཡ་   Shri Lt.col (Reid) Dadul Rinchen Bhutia,Vice Chairman, West Bengal Bhutia Development Board མཆོག   བོད་དོན་རྒྱབ་སྐྱོར་བ་དང་རྒྱ་གར་དབུས་གཞུང་གི་གསང་བའི་ལས་ཁུངས་ཀྱི་ལས་བྱེད་ཟུར་པ། དེ་བཞིན་ཀ་སྦུག་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་པི་ཊི་བྷོ་ཊི་ཡ་ Shri P.T. Bhutia, President, ITFS (Kalimpong)མཆོག ༸རྒྱལ་བའི་སྐུ་སྲུང་བ་ཟུར་པ་ཉི་མ་དབང་འདུས་མཆོག་བཅས་ཁག་སོ་སོར་མཇལ་འཕྲད་གནང་ཡོད་འདུག

མཇལ་འཕྲད་སྐབས་སོ་སོར་དཔལ་ལྡན་ཚོགས་གཞོན་མཆོག་གིས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་བྱུང་རིམ་གནས་སྟངས་དང་།  ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་དུ་ཕྱི་ལོ་ ༢༠༠༩ ནས་ཕྱི་ལོ་ ༢༠༡༨ བར་བོད་ནང་བོད་མིའི་རྩ་དོན་ཆེད་སྐུ་ལུས་མེར་སྲེག་གནང་མཁན་བོད་མི་གྲངས་ ༡༥༣ བྱུང་ཡོད་ཚུལ། ཉེ་ཆར་འཚོགས་པའི་དམིགས་བསལ་ཚོགས་ཆེན་ཐོག་རྒྱ་ནག་དམར་གཞུང་གིས་༧སྐུའི་ཡང་སྲིད་སྐོར་ལ་ཐེ་བྱུས་བྱེད་བཞིན་པར་ངོས་ལེན་མེད་པའི་སྤྱི་མོས་གྲོས་ཆོད་འཇོག་གནང་མཛད་པའི་སྐོར།

ད་བར་རྒྱ་གར་གཞུང་དང་མི་མང་བཀའ་དྲིན་ཆེན་པོ་ཡིན་པ་མ་ཟད་བོད་དོན་རྒྱབ་སྐྱོར་གནང་མཁན་གནད་ཡོད་མི་སྣ་རྣམས་ལ་ཐུགས་རྗེ་ཆེ་ཞུས་པ་དང་ཆབས་ཅིག མུ་མཐུད་བོད་དོན་སྤྱི་དང་། ལྷག་དོན་ས་གནས་སོ་སོའི་འབྲེལ་ཡོད་ས་གནས་འགོ་འཛིན་བརྒྱུད་ས་གནས་བོད་མི་རྣམས་ལ་རོགས་མགོན་ངེས་པར་གནང་སྐྱོང་ཡོང་བའི་འབོད་སྐུལ་ཡང་ཞུས་གནང་ཡོད་པ་དང་། དེ་བཞིན་རྒྱ་གར་འབྲེལ་ཡོད་དཔོན་རིགས་ཚོས་ཀྱང་བོད་དོན་ཐོག་ཐུགས་སྣང་དང་རྒྱབ་སྐྱོར་སྔར་ལྷག་གནང་རྒྱུའི་ཞལ་བཞེས་གནང་ཡོད་འདུག

ཕྱི་ཚེས་ ༡༤ ཉིན་རྒྱབ་ཀ་སྦུག་ས་གནས་ནས་ཕེབས་ཐོན་གྱིས་ས་ལུ་གྷར་མི་འཐུས་རྣམས་ལ་ “མང་གཙོ་དང་ཆིག་སྒྲིལ་“ ཞེས་པའི་བརྗོད་གཞིའི་ཐོག་གསུང་བཤད་དང་། ཕྱི་ཚེས་ ༡༥ ཉིན་གུང་ཆུ་ཚོད་ ༡༢ ཡོལ་ཙམ་ལ་ཀ་སྦུག་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་བྷག་ཌོ་ར་གནམ་ཐང་བར་ཕེབས་སྐྱེལ་དང་བཅས་རྒྱ་གར་བྱང་ཤར་ཁུལ་གྱི་ལས་རིམ་ཡོངས་སུ་ལེགས་གྲུབ་གནང་སྟེ། བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དང་དབུས་རྒྱུན་བཅས་ཀྱི་ལྷན་རྒྱལ་ས་ལྡི་ལིར་ཕྱིར་ཕེབས་གནང་ཡོད་པ་བཅས། །

 

 

Share with your friends










Submit