ཟླ་བ་ ༨ ཚེས ༡༠ ༢༠༡༩
 གསར་ལས་ཁང་གི་གསར་འགོད་པས།

ཕྱི་ལོ་ ༢༠༡༩ ཟླ་ ༨ ཚེས་ ༡༠ རེས་གཟའ་སྤེན་པ།

པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

༄༅། །ཕྱི་ལོ་ ༢༠༡༩ ཟླ་ ༨ ཚེས་ ༡༠ རེས་གཟའ་སྤེན་པ་ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མ་ན་ལིར་ཆིབས་སྒྱུར་སྐྱོང་སྐབས་དད་ལྡན་སེར་སྐྱ་མང་ཚོགས་རྣམས་ཀྱིས་དཀར་གཙང་མཇལ་དར་དང་། མེ་ཏོག བདུག་སྤོས་སོགས་མཆོད་པའི་ཡོ་བྱད་སྣ་ཚོགས་ཐོགས་ཏེ་དགའ་དད་སྤྲོ་གསུམ་སྒོ་ནས་ཕེབས་བསུ་གཟབ་རྒྱས་ཞུས་ཡོད།

པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡།༢༠ ཙམ་ལ་མགོན་པོ་གང་ཉིད་མཆོག་མ་ན་ལིར་རྟེན་གཞིས་བྱས་པའི་དཔལ་ལྡན་འོན་མངའ་རིས་གྲྭ་ཚང་དུ་༧ཞབས་སོར་བདེ་བར་འཁོད་མཚམས་མཁན་པོ་བློ་བཟང་བསམ་གཏན་ལགས་དང་། ཀུ་ལུ་ས་གནས་འགོ་འཛིན་གྱིས་མཎྡལ་རྟེན་གསུམ་འདེགས་འབུལ་ཞུས་གྲུབ་མཚམས་གསོལ་ཇ་འབྲས་བསིལ་འདེགས་འབུལ་ཞུས། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།

དེ་རིང་འདིར་བྱེས་ཀྱི་མངའ་རིས་གྲྭ་ཚང་དུ་འབྱོར་བ་རེད། དྭགས་པོ་གྲྭ་ཚང་ཕར་ཕྱོགས་སུ་ཡོད། རིན་པོ་ཆེ་མཆོག་གིས་མངའ་རིས་གྲྭ་ཚང་ཞིག་འཛུགས་ཐུབ་ན་ཞེས་པར་འདིར་མ་ན་ལིར་དགེ་ལུགས་དགོན་པ་ཞིག་ཡོད་པ་དེ་མངའ་རིས་གྲྭ་ཚང་བཟོ་ན་ཞེས་ཉམས་པ་སླར་གསོ་བྱུང་བ་རེད། མངའ་རིས་གྲྭ་ཚང་འདི་མངའ་དྭགས་རྒྱལ་གསུམ་ཞེས་༧རྒྱལ་དབང་སྐུ་ཕྲེང་རིམ་བྱོན་དང་དམིགས་བསལ་འབྲེལ་བ་ཡོད་པ་རེད། མངའ་རིའི་དག་སྣང་ནི་དགེ་འདུན་རྒྱ་མཚོས་གསར་དུ་ཕྱག་བཏབ་པ་ཞིག་དང་། དེ་ཡང་མངའ་རིས་ཕྱོགས་ནས་གྲྭ་རྒྱུན་གང་ཙམ་ཡོད། དགེ་འདུན་རྒྱ་མཚོས་བོད་དུ་གསར་བཙུགས་གནང་བའི་འོན་མངའ་རིས་གྲྭ་ཚང་ཞེས་པ་འདི་བྱུང་བ་ཡིན་པ་རེད། རིན་པོ་ཆེ་བགྲེས་སོང་རེད་དེ་ཧུར་ཐག་འབད་ཐག་གནང་སྟེ་ཧ་ཅང་ཡག་པོ་བྱུང་འདུག  ཐུགས་རྗེ་ཆེ་ཞེས་ཞུ་གི་ཡིན། བཀྲ་ཤིས་བདེ་ལེགས་ཡོད།

པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

སངས་རྒྱས་པའི་ཆོས་ལ་དད་པ་ཡོད་མཁན་སྐྱ་སེར་ཕོ་མོ་དབྱེ་བ་མེད་པར་སློབ་སྦྱོང་བྱེད་རྒྱུ་དང་། སློབ་སྦྱོང་དང་འབྲེལ་ནས་སངས་རྒྱས་པའི་ཆོས་ཀྱི་གནད་འགག་ཤེས་པ་ཡིན་ན། ཉམས་ལེན་བྱེད་རྒྱུ་ཡོང་གི་རེད། དེར་བརྟེན་སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོག་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་པ། སྒྲུབ་པ་བྱེད་པ་ཁོ་ན་ཡིན། ཞེས་པ་དེ་མཐའ་ཅིག་ཏུ་རབ་བྱུང་ཁོ་ནར་གསུང་གི་མེད། སྐྱ་སེར་ཕོ་མོ་དབྱེ་བ་མེད་པར་ཚང་མས་ནང་པའི་ཆོས་ལ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད་འདུག

 པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

ང་ཚོ་ནང་པ་ཚོ་དུས་རབས་ ༢༡ པའི་ནང་པ་བྱེད་དགོས་ཞེས་ངོས་ཀྱིས་དེང་སྐབས་འདི་ལྟར་བཤད་ཀྱི་ཡོད། དེང་སྐབས་ང་ཚོ་མང་པོ་ཞིག་དད་པ་ཡོད་ཀྱང་སློབ་སྦྱོང་དེ་ཙམ་མེད་པར་དད་པ་ཁོ་ནའི་འགྲིག་གི་ཡོད་པའི་བཟོ་འདྲ་ཞིག་འདུག སྤྱིར་སངས་རྒྱས་པའི་ཆོས་འདི་དད་པ་ཁོ་ན་མིན་པར་བཅོམ་ལྡན་འདས་ཁོ་རང་མངོན་པར་རྫོགས་པར་སངས་རྒྱས་མ་ཐག་ཏུ་ཟབ་ཞི་སྤྲོས་བྲལ་འོད་གསལ་འདུས་མ་བྱས།། བདུད་རྩི་ལྟ་བུའི་ཆོས་ཤིག་ཁོ་བོས་རྙེད།། སུ་ལ་བསྟན་ཀྱང་གོ་བར་མི་ནུས་པས།། མི་སྨྲ་ནགས་ཀྱི་འདབས་སུ་གནས་པར་བྱ།། ཞེས་བཅོམ་ལྡན་འདས་ཁོ་རང་གི་ཆོས་འདི་ཟབ་ཞིང་རྒྱ་ཆེ་བ་ཆགས་སྟབས། འདི་མིའི་ཧ་ཅང་གོ་ཐུབ་ཀྱི་མ་རེད། རེ་ཞིག་ཆོས་གསུང་རྒྱུའི་ཐུགས་འདོད་མེད།

པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

དེར་བརྟེན་ལས་སླ་པོ་མེད་པའི་རྟགས་རེད། ཅེས་བཀའ་སློབ་སྩལ་རྗེས་གྲྭ་ཆུང་རྣམས་གང་ནས་ཡིན་པ་དང་། དཔེ་ཆ་གང་བློ་འཛིན་བྱེད་ཀྱི་ཡོད་སྐོར་བཀའ་ཕེབས་པར་མངོན་རྟོགས་རྒྱན་ཡིན་སྐོར་སྙན་སེང་ཞུས་པར་མགོན་པོ་གང་ཉིད་མཆོག་གིས་མུ་མཐུད་བཀའ་སློབ་སྩལ་དོན། འགྲིག་འདུག བྱམས་ཆོས་སྡེ་ལྔ་ནང་ནས་མངོན་རྟོགས་རྒྱན་ནི་ཤེར་ཕྱིན་གྱི་མན་ངག་ཅེས་གསུང་ཡོད། ཧ་ཅང་གལ་ཆེན་པོ་རེད། ང་ཚོའི་གྲྭ་ས་ཚོ་ལའང་དབུ་ཕར་ཧ་ཅང་གལ་ཆེན་པོ་རྩི་ཡི་འདུག དབུ་མས་སངས་རྒྱས་པའི་ཐུན་མོང་མ་ཡིན་པའི་ལྟ་གྲུབ་སྐོར་གསུང་གི་ཡོད། ཧ་ཅང་གལ་ཆེན་པོ་རེད་འདུག སང་ཉིན་ངལ་གསོ་རྒྱག་དགོས་མིན་ནམ་བསམ་བཞིན་ཡོད། གནངས་གཞེས་ཐུག་གི་རེད། བཀྲ་ཤིས་བདེ་ལེགས་ཞེས་བཀའ་སློབ་སྩལ།

པར་པ། ཡེ་ཤེས་ཀུན་གྲགས་ལགས། ཕྱི་དྲིལ་ལས་ཁུངས།

སྐབས་དེར་དཔལ་ས་སྐྱ་ཕུན་ཚོགས་ཕོ་བྲང་གི་གདུང་སྲས་ཨ་སངྒ་བཛྲ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ། ཧི་མ་ཅལ་མངའ་སྡེའི་ཁྲིམས་ཞིབ་པ་ཆེ་བ་མཆོག་སོགས་བཅར་འདུག་པ་བཅས། །

Share with your friends










Submit