ཟླ་བ་ ༨ ཚེས ༡༤ ༢༠༡༩
 གསར་ལས་ཁང་གི་གསར་འགོད་པས།

ཕྱི་ལོ་ ༢༠༡༩ ཟླ་ ༨ ཚེས་ ༡༤ རེས་གཟའ་ལྷག་པ། 

ཐུབ་པ།

༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་རྣམ་གཉིས་ཀྱིས་བཏང་གནས་ནང་འཁོད་དོན།  ཕྱི་ལོ་༢༠༡༩ ཟླ་ ༧ ཚེས་ ༣༠ ཡས་མས་ཤིག་ལ་ཀིརྟི་དགོན་པའི་གྲྭ་བློ་བཟང་ཐབས་མཁས།  རང་ལོ་ ༣༧ ཙམ་ཡིན་པ་ཁོང་ལ་རྒྱ་གཞུང་གིས་ལོ་བཞི་ཡི་བཙོན་འཇུག་ཁྲིམས་ཐག་བཅད་ཡོད་ཀྱང་། ནག་ཉེས་ག་རེ་བཙུགས་ཡོད་མེད་དང་། ས་གནས་གང་དུ་ཡོད་མེད་སོགས་ཞིབ་ཕྲ་གང་ཡང་ཤེས་རྟོགས་མ་བྱུང་། ཁོང་འཛིན་བཟུང་གི་དུས་ཚོད་ལོ་སྔོན་མའི་ནང་ཡིན་པ་ཙམ་ལས་གསལ་པོ་ཤེས་རྟོགས་མ་བྱུང་། ཁོང་ནི་ལྷ་སྡེ་གོང་མའི་བློ་ཁོའི་བུ་ཡིན་པ་དང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་གྲྭ་པ་བྱས།  དེ་སྔོན་རྒྱ་གཞུང་གིས་སྒོ་བརྒྱབ་པའི་ནང་བསྟན་གཞོན་ནུའི་རིག་སློབ་ཁང་གི་སྐབས་གསུམ་པའི་མཐར་ཕྱིན་སློབ་མ་ཡིན་པ་དང་། རྗེས་སུ་མཚན་ཉིད་གྲྭ་ཚང་དུ་གཞུང་ཆེན་སློབ་སྦྱོང་གིས་དེང་སྐབས་དབུ་མའི་འཛིན་གྲྭར་སླེབས་ཡོད་འདུག

རྡོ་རྗེ།

དེ་མིན་ཕྱི་ལོ་ ༢༠༡༧ ལོའི་ལོ་མཇུག་ཙམ་ལ་རྔ་པ་རྫོང་སྤྲོ་ཚིགས་དགོན་པའི་གྲྭ་ཐུབ་པ། རང་ལོ་ ༣༢ ཡིན་པ་ཁོང་རྒྱ་གཞུང་གི་ཉེན་རྟོག་པས་མཚན་མོ་རང་ཤག་ནས་བཙན་ཁྲིད་བྱས་ཡོད་པ་དང་། དེ་ནས་བཟུང་ད་བར་གར་ཡོད་ཅི་བྱུང་གི་གནས་ཚུལ་ཙམ་ཡང་ཤེས་རྟོགས་མེད་པར་ལྷག་ཡོད། ཁོང་ནི་སྤྲོ་ཚིགས་ཐང་བ་མའི་མགར་བ་ཚང་གི་ཡིན་པ་དང་། ཁོང་གི་ཕ་སྐལ་བཟང་ལགས་ཀྱང་ཕྱི་ལོ་༢༠༡༡ ཟླ་ ༣ ཚེས་ ༡༦ ཉིན་ངོ་རྒོལ་སྐད་འབོད་བྱས་པའི་རྐྱེན་ཀྱིས་འཛིན་བཟུང་གིས་བཙོན་འཇུག་ལོ་ཐག་བཅད་མྱོང་ཡོད་འདུག ཐུབ་པ་ལགས་ཆུང་ཆུང་སྐབས་ནས་སྤྲོ་ཚིགས་དགོན་པར་ཆོས་ཞུགས་བྱས། ཕྱི་ལོ་༢༠༠༨ ཟླ་ ༣ ཚེས་ ༡༦ ཉིན་སྤྲོ་ཚིགས་ཡུལ་ཚོའི་ཐོག་ནས་ངོ་རྒོལ་སྐད་འབོད་དང་རྒྱའི་དར་དམར་མེར་སྲེག་བཏང་བའི་ཉེས་མིང་གཡོག་ནས་ལོ་༡ དང་ཟླ་ ༦ ལ་ངལ་རྩོལ་བསྒྱུར་བཀོལ་གྱི་མིིང་ཐོག་ནས་བཙོན་འཇུག་བྱས་ཡོད་འདུག

ཐབས་མཁས།

དེ་བཞིན་ཕྱི་ལོ་ ༢༠༡༨ ཟླ་ ༨ ཡས་མས་ཤིག་ལ་རྔ་པ་ཀིརྟི་དགོན་པའི་གྲྭ་བློ་བཟང་རྡོ་རྗེ། རང་ལོ་ ༣༦ ཙམ་ཡིན་པ་ཁོང་མཚན་མོ་རང་ཤག་ནས་ཉེན་རྟོག་པས་བཙན་ཁྲིད་བྱས་ཡོད་པ་དང་། དེ་ནས་བཟུང་ད་བར་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་ཡོད། ཁོང་ནི་རྔ་པ་རྫོང་ཕྱུགས་ལས་འགབ་མའི་ཕ་སངས་རིས་ཀྱི་བུ་ཡིན་པ་དང་། ཕྱི་ལོ་༢༠༡༡ ལོར་འཛིན་བཟུང་གིས་བཙོན་འཇུག་ལོ་གསུམ་བྱས་ཡོད་པའི་ཆབ་སྲིད་བཙོན་ཟུར་ཞིག་ཡིན་འདུག་པ་བཅས། །

Share with your friends










Submit