ཟླ་བ་ ༧ ཚེས ༢ ༢༠༡༩
Published By ngawang thokmey

༢༠༡༩ ཟླ་ ༧ ཚེས་ ༢ རེས་གཟའ་མིག་དམར།

 

༄༅། །ནོར་ཝེ་བོད་ཀྱི་རླུང་འཕྲིན་ཁང་ནས་གནས་ཚུལ་སྤེལ་བ་ལྟར་ན།  རྒྱ་ནག་གི་ནང་རིང་མིན་ཕྱི་ཟླ་ ༨ ཚེས་ ༡༢ ཉིན་འཚོགས་གཏན་ཁེལ་བའི་ Gothia Cup ཞེས་པའི་རྒྱལ་སྤྱིའི་གཞོན་སྐྱེས་རྐང་སྤོལ་རྩེད་འགྲན་ཐོག་ཕ་བོད་མི་ཡིན་པ་ NewZealand གྱི་ན་གཞོན་རྐང་སྤོལ་རྩེད་འགྲན་པ་ཉི་མ་ཚེ་རིང་ལགས་འགྲན་སྡུར་དེར་ཞུགས་རྒྱུར་བདམས་ཐོན་བྱུང་ཡོད་ཀྱང་། རྒྱ་གཞུང་གིས་ཁོང་ལ་མཐོང་མཆན་མ་སྤྲད་པར་བཀག་འགོག་བྱེད་བཞིན་ཡོད་པ་རེད།

ཁ་ཉིན་ New Zealand Herald བརྒྱུད་ལམ་ཐོག་གནས་ཚུལ་སྤེལ་བར་རང་ལོ་ ༡༤ ཡིན་པ་ཉི་མ་ཚེ་རིང་ལགས་དེ་སྔོན་སྒེར་གྱི་རྐང་སྤོལ་ཆེད་སྦྱོང་ལྟེ་གནས་ཁང་ཞིག་གིས་རིང་མིན་རྒྱ་ནག་ནང་འཚོགས་གཏན་ཁེལ་བའི་ Gothia Cup རྐང་སྤོལ་རྩེད་འགྲན་ཐོག་མཉམ་ཞུགས་གནང་རྒྱུར་བདམས་ཐོན་གནང་ཡོད་ནའང་། རྒྱ་གཞུང་གིས་ཁོང་ལ་མཐོང་མཆན་མ་སྤྲད་པར་འགོག་རྐྱེན་མང་དག་ཅིག་བཟོ་བཞིན་ཡོད་སྟབས་ཁོང་རྐང་སྤོལ་ཆེད་སྦྱོང་ལྟེ་གནས་ཁང་གི་རུ་ཁག་ནས་ཕྱིར་འཐེན་བྱས་ཡོད་པ་རེད་འདུག

ཁོང་གི་ཨ་མ་ Megan Tsering Young ལགས་ཀྱིས་བརྒྱུད་ལམ་ཁག་ལ་གནད་དོན་དེའི་སྐོར་འགྲེལ་བརྗོད་གནང་བར་རྩ་བའི་ལྟེ་གནས་ཁང་ལ་དུས་ཚོད་སོགས་ཀྱི་དཀའ་ངལ་འཕྲད་རྐྱེན་ཁོང་གི་བུ་རུ་ཁག་ནས་ཕྱིར་འཐེན་གནང་རྒྱུ་མ་གཏོགས་ཐབས་གཞན་མ་མཆིས་ཀྱང་། རྒྱ་ནག་གཞུང་ཚབ་ལས་ཁུངས་ནས་རྩེད་འགྲན་པ་གཞན་ཚང་མར་དུས་ཚོད་མ་འགྱངས་པར་མཐོང་མཆན་སྤྲད་ཡོད་པ་དང་། ཉི་མ་ཚེ་རིང་ལགས་གཅིག་པོའི་ཞུ་སྙན་དེ་རྒྱ་ནག་ཏུ་སྔོན་ནས་བཏང་ཡོད་ཀྱང་རྒྱ་ནག་གིས་ཉི་མ་ལགས་ཀྱི་པཱ་ལགས་བོད་རིགས་ཡིན་པའི་དབང་གིས་ཁོང་གི་མཐོང་མཆན་དེ་དུས་འགྱངས་བྱས་མེད་པས་དེ་ནི་མི་རིགས་དབྱེ་འབྱེད་ཀྱི་རྣམ་པ་ཞིག་ཡིན་པ་གསུངས་འདུག

རྩ་བའི་དེ་སྔོན་ཉི་མ་ཚེ་རིང་ལགས་ཀྱི་ཨ་མ་ལགས་དང་ནང་མི་རྣམས་བོད་ནང་ཕེབས་སྐབས་སུ་མཐོང་མཆན་ཞུས་པར་དུས་ཚོད་མང་པོ་འགྱངས་པ་སོགས་ཀྱི་དཀའ་ངལ་འཕྲད་མྱོང་ཡོད་རྐྱེན་ཁོང་གི་ཨ་མ་ལགས་ཀྱིས་མཐོང་མཆན་སྙན་ཞུ་དེ་རྩེད་འགྲན་པ་གཞན་ལས་སྔོན་ལ་བཏང་ཡོད་ནའང་། སྙན་ཞུ་དེ་རྒྱ་ནག་ལ་གཏོང་དགོས་ཚུལ་སོགས་ཀྱི་འོག་ད་བར་དུས་ཚོད་འགྱངས་ནས་བཞག་པ་དང་། བདུན་ཕྲག་སྔོན་མར་ཁོང་ལ་ཡི་གེ་ཞིག་འབྱོར་བའི་ནང་ཉི་མ་ལགས་ཀྱིས་རྐང་སྤོལ་རྩེད་འགྲན་ལ་ཞུགས་པ་ཙམ་ལས་བྱ་བཞག་གཞན་གང་གི་ནང་དུ་ཡང་འཛུལ་ཞུགས་མི་བྱེད་པའི་ཁས་ལེན་ཡི་གེ་ཞིག་བྲིས་པ་ཡིན་ན། ཁོང་ལ་མཐོང་མཆན་སྤྲོད་རྒྱུར་བསམ་བློ་གཏོང་གི་ཡིན་ཚུལ་བརྗོད་ཡོད་པ་རེད།

ཉི་མ་ལགས་ཀྱི་ཨ་མ་ལགས་ཀྱིས་རང་ལོ་བཅུ་བཞི་ཡིན་པའི་བྱིས་པ་ཞིག་གིས་བྱ་འགུལ་གང་སྤེལ་སྲིད་པ་དང་ཉེན་ཁ་གང་ཡོད་མེད་ཚོད་དཔག་གནང་དཀའ་སྐོར་གསུངས་པ་དང་འབྲེལ། ཁོང་གི་ནང་མིའི་ངོས་ནས་གནད་དོན་དེ་དྲང་ལྡན་ཞིག་མིན་པར་གཟིགས་ཀྱི་ཡོད་ཀྱང་ཁོང་གི་བུས་ཡི་གེ་དེ་བྲིས་རྒྱུ་ཡིན་པ་གསུངས་འདུག

ཁོང་གིས་ད་ལྟ་བོད་ནང་ཉི་མ་ཚེ་རིང་ལགས་ཀྱི་སྤུན་ཉེ་འབྲེལ་ ༡༣ ཙམ་ཡོད་པ་དེ་ལྟར་ཡང་། ཁོང་རྣམས་དང་མཇལ་འཕྲད་དང་འབྲེལ་བ་གནང་རྒྱུ་ཧ་ཅང་ཁག་པོ་ཆགས་ཡོད་སྐོར་གསུངས་པ་དང་འབྲེལ། ནིའུ་ཛ་ལན་ཌིར་སྐྱེས་པའི་བོད་རིགས་རྐང་སྤོལ་རྩེ་འགྲན་པ་ཞིག་ལ་དཀའ་ངལ་དེ་ལྟར་འཕྲད་ཀྱི་ཡོད་ཚེ་བོད་ནང་གི་བོད་མི་མང་ཚོགས་རྣམས་ཀྱི་གནས་སྟངས་གང་འདྲ་ཡོད་དམ་ཞེས་དྲི་བ་ཞིག་ཀྱང་གནང་འདུག

རྩ་བའི་ Gothia Cup ཞེས་པའི་རྩེད་འགྲན་དེ་ཕྱི་ལོ་ ༡༩༧༥ ལོར་ཐོག་མར་དབུ་འཛུགས་གནང་ཡོད་ཅིང་། ད་བར་འཛམ་གླིང་རྒྱལ་ཁབ་འདྲ་མིན་ ༡༤༣ ཙམ་ནས་རྩེད་འགྲན་པ་ས་ཡ་གཅིག་ལྷག་ནས་དེའི་ནང་མཉམ་ཞུགས་གནང་བའི་ཁྲོད་  FIFA ཞེས་རྒྱལ་སྤྱིའི་རྐང་སྤོལ་ལྷན་ཚོགས་ཀྱི་ངོས་ནས་ཕྱི་ལོ་ ༢༠༠༧ ལོར་རྩེ་འགྲན་དེར་འཛམ་གླིང་གཞོན་སྐྱེས་རྐང་སྤོལ་རྩེད་འགྲན་ཞེས་མཚན་གནས་ཕུལ་ཡོད་པ་རེད། འདི་ལོའི་རྩེད་འགྲན་འདི་བཞིན་རྒྱ་ནག་གི་ཁྲིན་ཡང་གྲོང་ཁྱེར་དུ་ཕྱི་ཟླ་ ༨ ཚེས་ ༡༢ ནས་ ༢༠ བར་ཉིན་གྲངས་ ༨ རིང་རྩེད་འགྲན་གནང་གི་ཡོད་པ་རེད། འོན་ཀྱང་བོད་རིགས་ཉི་མ་ཚེ་རིང་ལགས་ཀྱི་པཱ་ལགས་བོད་མི་ཡིན་པར་བརྟེན་ཁོང་ཐེངས་འདིའི་རྩེད་འགྲན་ལ་ཞུགས་ཐུབ་མི་འདུག

Share with your friends










Submit