ཕྱི་ལོ་ ༢༠༡༩ ཟླ་ ༧ ཚེས་ ༣ རེས་གཟའ་ལྷག་པ།
༄༅། །འདི་གར་སུད་སིའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༤༡ པ་འཚོགས་བཞིན་པའི་སྐབས་དང་བསྟུན། ཕྱི་ལོ་ ༢༠༡༩ ཟླ་ ༧ ཚེས་ ༢ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་བཙན་ཁྲིད་བྱས་ཏེ་ད་བར་གར་སོང་ཆ་མེད་དུ་གྱུར་ཡོད་པའི་སྐོར་རྒྱལ་ཚོགས་སུ་ཟུར་དུ་ཚོགས་འདུ་བསྐོངས་ནས་གླེང་སློང་ཤུགས་ཆེ་གནང་ཡོད།
དེ་ཡང་ཚོགས་འདུའི་སྟེང་པཎ་ཆེན་ཨེར་ཏེ་ནི་ཞབས་ཞུ་ལས་དོན་ལྟེ་གནས་ཁང་གི་ངེས་སྟོན་པ་དང་མགྲིན་ཚབ་པ་གྲྭ་བློ་བཟང་རྡོ་རྗེ་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སན་ཊི་མ་ཊན་ Vincent Matten ལགས། སུད་སིའི་སྐུ་ཚབ་དོན་གཅོད་ཁང་གི་འགྲོ་བ་མིའི་ཐོབ་ཐང་གི་དམིགས་བསལ་འབྲེལ་མཐུད་པ་དཀོན་མཆོག་ཡག་ལྷ་ལགས་བཅས་ཕེབས་ཡོད།
ཚོགས་འདུའི་ཐོག་པཎ་ཆེན་ཨེར་ཏེ་ནི་ཞབས་ཞུ་ལས་དོན་ལྟེ་གནས་ཁང་གི་ངེས་སྟོན་པ་དང་མགྲིན་ཚབ་པ་གྲྭ་བློ་བཟང་རྡོ་རྗེ་ལགས་ཀྱིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་པཎ་ཆེན་རིན་པོ་ཆེ་སྐུ་ཕྲེང་རིམ་བྱོན་བར་ཐུན་མོང་མ་ཡིན་པའི་བླ་སློབ་ཀྱི་འབྲེལ་བ་ཡོད་པའི་སྐོར་དང་།
རྒྱ་གཞུང་གིས་བོད་ས་ཡོངས་རྫོགས་དབང་སྒྱུར་བྱས་རྗེས། ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་བོད་ཀྱི་ཆོས་དང་རིག་གཞུང་། སྐད་ཡིག སྤྱི་ཚོགས། དཔལ་འབྱོར་ཡར་རྒྱས། ལྷག་པར་སྐད་ཡིག་འཛིན་སྐྱོང་སྤེལ་གསུམ་ཆེད་སྐུ་ལས་བསྐྱོན་ཏེ་རླབས་ཆེན་གྱི་མཛད་རྗེས་བཞག་གནང་མཛད་ཡོད་པ་མ་ཟད། ཐ་ན་བཙོན་ཁང་ནང་ལོ་ངོ་དགུ་ལྷག་གི་རིང་མནར་སྤྱོད་མྱངས་མྱོང་ཡོད། ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས། རྒྱ་ནག་གཞུང་གིས་བོད་ཐོག་བཟུང་བའི་སྲིད་བྱུས་དེས་བོད་གངས་ཅན་ལྗོངས་ལ་ཕན་ལས་གནོད་མང་བ་བསྐྱལ་འདུག་ཅེས་རྒྱ་གཞུང་ལ་ལོ་རྒྱུས་རང་བཞིན་ལྡན་པའི་སྐྱོན་བརྗོད་ཤུགས་ཆེ་གནང་བའི་ཉིན་བཞིའི་རྗེས་ཏེ། ཕྱི་ལོ་ ༡༩༨༩ ཟླ་ ༡ ཚེས་ ༢༨ ཉིན་གློ་བུར་དུ་གཞིས་ཀྱི་གདན་ས་བཀྲ་ཤིས་ལྷུན་པོར་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་ཐོན་ཡོད། ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་རྒྱ་གཞུང་གིས་དུག་དྲངས་ཏེ་བཀྲོངས་ཡོད་པ་ང་ཚོས་ཡིད་ཆེད་བྱེད་ཀྱི་ཡོད། ཅེས་དང་།
ཀུན་གཟིགས་པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་དང་ཡབ་ཡུམ་བཅས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་བཙན་ཁྲིད་བྱས་ཏེ་ད་བར་གར་སོང་ཆ་མེད་དུ་གྱུར་ཡོད་པ་དང་། རྒྱལ་ཚོགས་ཀྱི་ངོས་ནས་ཀུན་གཟིགས་པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་གིས་གཙོས་ཡབ་ཡུམ་རྣམ་པ་དང་། དེ་བཞིན་ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་རྩད་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་མཆོག་བཅས་གང་དུ་ཡོད་མེད་དང་། ཁོང་རྣམ་པ་སྐུ་གཟུགས་གསལ་ཐང་ཡིན་མིན་ཐད་ལ་གནས་ཚུལ་ཁ་གསལ་ཞིག་ཡོང་ཆེད་རྒྱ་གཞུང་ལ་གནོན་ཤུགས་སྤྲོད་དགོས་ཞེས་འབོད་སྐུལ་ཤུགས་ཆེ་གནང་།
སྐུ་ཞབས་ཝིན་སན་ཊི་མ་ཊན་ལགས་ཀྱིས། རྒྱ་གཞུང་གིས་བོད་ནང་ཆོས་ལུགས་རང་དབང་ཐོག་དྲག་གནོན་བྱེད་བཞིན་པའི་སྐོར་གསུང་བ་མ་ཟད། རྒྱལ་སྤྱིའི་ཚོགས་སྡེ་དང་ལྷག་པར་རྒྱལ་ཚོགས་ཀྱི་འཐུས་མི་རྒྱལ་ཁབ་ཚོས་རྒྱ་ནག་གཞུང་གིས་མ་འོངས་པར་སྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་འདེམས་སྒྲུག་བྱས་ཚེ། དེར་ངོས་ལེན་བྱ་རྒྱུ་མིན་པའི་བརྡ་ལམ་གསལ་པོ་ཞིག་རྒྱ་ནག་གཞུང་ལ་སྤྲོད་དགོས་པའི་འབོད་སྐུལ་གནང་འདུག་པ་བཅས།།
