ཟླ་བ་ ༦ ཚེས ༥ ༢༠༡༩
Published By སྐལ་བཟང་བདེ་སྐྱིད།

ཕྱི་ལོ་ ༢༠༡༩ ཟླ་ ༦ ཚེས་ ༥ རེས་གཟའ་ལྷག་པ།

༄༅། །བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་རྫོང་དཀར་ཆོས་སྡེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས། ཕྱི་ལོ་ ༢༠༡༩ ཟླ་ ༦ ཚེས་ ༥ རེས་གཟའ་ལྷག་པའི་ཉིན་བོད་རིགས་ན་གཞོན་གཙོ་བོར་གྱུར་བའི་སེར་སྐྱ་མི་མང་དང་། དེ་བཞིན་ཕྱི་རྒྱལ་ཡུལ་གྲུ་ཁག་ནས་བཅར་བའི་ཆོས་ཞུ་བ་བཅས་ཁྱོན་མི་གྲངས་སྟོང་ཕྲག་བརྒལ་བར་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་སྩལ་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བསྐྱངས་ཏེ་བཞུགས་ཁྲིར་༸ཞབས་སོར་འཁོད་མཚམས།  མགོན་པོ་གང་ཉིད་མཆོག་གིས་ཐོག་མར་མང་ཚོགས་རྣམས་ལ་བཀའ་སློབ་སྩལ་དོན། དེ་རིང་གཙོ་བོ་འཆར་ཅན་ས་ག་ཟླ་བའི་སྐབས་སུ་མ་ནི་དུང་སྒྲུབ་གསོག་སྲོལ་ཡོད་པ་ལྟར། མ་ཎི་རིལ་བུ་དེ་དག་ཕྱོགས་མཚམས་མང་པོ་ཞིག་ལ་འགྲོ་ཡི་ཡོད་སྟབས། གསོན་པོ་ཚོར་བྱིན་བརླབས་དང་། འཆི་ལ་ཉེ་བ་ཚོར་བྱིན་རྟེན་གྱི་འདུ་ཤེས་ཐོག་ནས་ཟ་ཡི་ཡོད་པར་བརྟེན་མ་ཎ་རིལ་བུ་དེ་ཧ་ཅང་གལ་ཆེན་པོ་ཞིག་མཐོང་གི་འདུག  དེ་རིང་འདིར་རྫོང་དཀར་ཆོས་སྡེ་ནས་གསོལ་འདེབས་ལྟར་སྤྱན་རས་གཟིགས་འཇིག་རྟེན་དབང་ཕྱུག་གི་དབང་བྱ་རྒྱུ་རེད། བསམ་བློ་གཏོང་སྟངས་གཙོ་བོ་དེ་མོས་པ་རེད། གལ་ཆེ་ཤོས་ནི་མ་ཎི་གསོག་སྒྲུབ་བྱེད་རྒྱུ་དང་།  འཕགས་པ་སྤྱན་རས་གཟིགས་ལ་རྩེ་གཅིག་ཏུ་གུས་པའི་བཏུད་ནས་མ་ཎི་གསག་དགོས་ཀྱི་ཡོད།

འཕགས་པ་སྤྱན་རས་གཟིགས་ནི།

སངས་རྒྱས་ཀུན་གྱིས་རབ་ཏུ་སྔགས།

།ཡོན་ཏན་དམ་པ་ཀུན་ནས་བསགས།

།སྤྱན་རས་གཟིགས་ཞེས་མཚན་གསོལ་པའི།

།རྟག་པར་བརྩེ་ལ་ཕྱག་འཚལ་ལོ། 

འཕགས་པ་སྤྱན་རས་གཟིགས་དེ་བཞིན་སྙིང་རྗེའི་ལྷ་མཆོག་ལ་བརྩི་བཞིན་ཡོད། སྙིང་རྗེ་ཟེར་བ་ནི་དབུ་མ་འཇུག་པའི་མཆོད་བརྗོད་ལས་གསུང་པ་ལྟར་རེད། ཕྱོགས་མཚུངས་མགོན་པོ་ཀླུ་སྒྲུབ་ཀྱི་རྩ་བ་ཤེས་རབ་ཀྱི་མཇུག་ཏུ་སྟོན་པའི་བཀའ་དྲིན་དྲན་པའི་སྒོ་ནས་བསྟོད་ཕྱག་མཛད་སྐབས།

གང་གིས་ཐུགས་བརྩེས་ཉེར་བཟུང་ནས།

།ལྟ་བ་ཐམས་ཅད་སྤངས་པའི་ཕྱིར།

།དམ་པའི་ཆོས་ནི་སྟོན་མཛད་པ།

།གཽ་ཏམ་དེ་ལ་ཕྱག་འཚལ་ལོ། ། 

གང་ལྟར་སྤང་རྟོགས་མཐར་ཕྱིན་པའི་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་དེ་དག་རྩ་བ་སྙིང་རྗེ་ལས་བྱུང་བ་རེད།

སྤྱིར་སངས་རྒྱས་ཀྱི་བསྟན་པ་ལ་མདོ་ལམ་རྐྱང་རྐྱང་ནས་འགྲོ་སྟངས་ཤིག་ཡོད། དེ་རྣམས་བསྟན་པ་སྤྱི་བཙན་ཡིན། ཆོས་ཀྱི་འཁོར་ལོ་དང་པོ་དང་འཁོར་ལོ་བར་པ། འཁོར་ལོ་མཐའ་མ་རྣམས་བསྟན་པ་སྤྱི་བཙན་གྱི་ཐོག་ནས་གསུང་ཡོད། དེ་ནས་འདུལ་བྱ་ལས་དག་པ་ཚོར་བཅོམ་ལྡན་འདས་དཀྱིལ་འཁོར་གྱི་བདག་པོའི་རྣམ་པ་ལ་ཤར་ནས་ལྷ་ཡི་རྣམ་པའི་ཐོག་ནས་ཆོས་འཁོར་བསྐོར་བ་བྱུང་འདུག འདི་གང་ཟག་སྒོས་བཙན་བརྗོད་ན་འོས་པོ་ཧ་ཅང་འདུག   ཐ་སྙད་འདི་བཞིན་ངོས་ཀྱི་གསར་པ་བཟོས་པ་ཞིག་མིན། གཉན་མགོན་གསུང་རབ་པས་ཐ་སྙད་དེའི་སྐོར་གསུང་ཡོད།

ངོས་ཀྱིས་ཐ་སྙད་དེ་ཚུར་སྦྱར་ནས་མདོ་ལམ་དེ་བསྟན་པ་སྤྱི་བཙན་དང་། སྔགས་ལམ་ནི་གང་ཟག་སྒོས་བཙན་ལ་བཞག་ཡིན། རྒྱུད་སྡེ་སོ་སོའི་གསུང་སའི་འདུལ་བྱ་རེ་རེའི་ཁམས་དང་མོས་པ་དེ་ཚོ་དང་བསྟུན་ནས་གསུང་བཞག་པ་རེད། ཅེས་སོགས་བཀའ་སློབ་སྩལ་རྗེས་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་དངོས་སུ་དབུ་འཛུགས་སྩལ་བ་བཅས། །

Share with your friends










Submit