ཕྱི་ལོ་ ༢༠༡༩ ཟླ་ ༤ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༦ ཉིན་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ Constitution Club ཞེས་པའི་ཚོགས་ཁང་དུ་རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་གཤེགས་དམ་པ་ཇོར་ཇ་ཕར་ནན་ཌེས་ George Fernandes མཆོག་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཟུར་པ་དང་སྤྱི་འཐུས་ཚོགས་ཟུར་བཀའ་ཟུར་རྒྱ་རི་བློ་གྲོས་རྒྱལ་མཚན་དམ་པ་རྣམ་གཉིས་ཀྱིས་རང་དབང་དང་མང་གཙོ། འདྲ་མཉམ་གྱི་ཐོབ་ཐང་ཆེད་སྐུ་ཚེ་ཧྲིལ་པོའི་རིང་འཐབ་རྩོད་གནང་བར་དཔའ་བོའི་མཚན་གནས་ཐོག་ནས་རྗེས་དྲན་ཞུས་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤ ཙམ་ལ་མཛད་སྒོའི་སྐུ་མགྲོན་གཙོ་བོ་ཀར་ན་ཊ་ཀའི་མངའ་སྡེའི་སྲིད་སྐྱོང་ཟུར་པ་སྐུ་ཞབས་ T. N. Chaturvedi མཆོག་དང་། བཀའ་བློན་ཁྲི་ཟུར་སློབ་དཔོན་སྐྱབས་རྗེ་ཟམ་གདོང་རིན་པོ་ཆེ་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག བོད་མིའི་སྒྲིག་འཛུགས་བཀའ་ཤག་གི་སྐུ་ཚབ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག ལྡི་ལི་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག བཀའ་ཟུར་རྒྱ་རི་སྒྲོལ་མ་མཆོག རྒྱ་གར་རྒྱལ་ཡོངས་དང་ཞབས་ཚོགས་པའི་འགན་འཛིན་བགྲེས་པ་སྐུ་ཞབས་ཨིན་དེ་རེཤ་ཀུ་མར་ Indresh Kumar མཆོག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མ་ཐེའོ་མ་ཁཱ་སི། Matteo Mecacci མཆོག ལྕམ་སྐུ་ཇ་ཡ་ཇེ་ཌི་ལི་ Smt. Jaya Jaitley མཆོག ལ་དྭགས་བླ་མ་བློ་བཟང་ཡེ་ཤེས་མཆོག བླ་མ་ཆོས་འཕེལ་བཟོད་པ་མཆོག དེ་བཞིན་ལྡི་ལི་ཁུལ་གྱི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་མི་མང་། ལྡི་ལི་བསམ་ཡས་གླིང་བོད་ཕྲུག་ཁྱིམ་སྡེའི་དགེ་རྒན་དང་སློབ་ཕྲུག་སོགས་ལྷན་འཛོམས་ཀྱིས་ཐོག་མར་གནད་ཡོད་མི་སྣ་ཁག་གཅིག་གིས་སྐུ་གཤེགས་དམ་པ་ཇོར་ཇ་ཕར་ནན་ཌེས་མཆོག་དང་། རྒྱ་རི་བློ་གྲོས་རྒྱལ་མཚན་མཆོག་རྣམ་གཉིས་ཀྱི་འདྲ་པར་མདུན་སྣང་གསལ་མར་མེ་ཞལ་ཕྱེ་གནང་གྲུབ་མཚམས་ལྡི་ལིར་རྟེན་གཞིས་བྱས་པའི་ས་སྐྱ་ཆོས་སྡེའི་དགེ་འདུན་པ་རྣམས་ཀྱིས་དམ་པ་ཁོང་གཉིས་ཀྱི་ཆེད་སྨོན་ལམ་གསུང་འདོན་གནང་།
དེ་ནས་ལྡི་ལི་ནེ་རུ་མཐོ་སློབ་ཀྱི་གཙུག་ལག་སློབ་དཔོན་སྐུ་ཞབས་ Anand Kumar ལགས་ཀྱིས་མཛད་སྒོ་ངོ་སྤྲོད་གནང་བསྟུན་རིམ་བཞིན་སྐུ་མགྲོན་རྣམས་ཀྱིས་གསུང་བཤད་གནང་། སྐབས་དེར་སྐུ་མགྲོན་གཙོ་བོ་སྐུ་ཞབས་ T. N. Chaturvedi མཆོག་གིས་སྐུ་གཤེགས་དམ་པ་ཇོར་ཇ་ཕར་ནན་ཌེས་མཆོག་དང་། རྒྱ་རི་བློ་གྲོས་རྒྱལ་མཚན་མཆོག་རྣམ་གཉིས་ནི་མང་ཚོགས་ཁྲོད་ཀྱི་དཔའ་བོ་ཞིག་ཡིན་ཞིང་། ཁོང་རྣམ་གཉིས་ཀྱི་སྐུ་ཚེ་ཧྲིལ་པོའི་རིང་འགྲོ་མིའི་བདེ་ཐབས་དང་། མང་གཙོའི་ལམ་ལུགས་གོང་འཕེལ། དེ་བཞིན་རང་དབང་སྲུང་སྐྱོབ་ཆེད་འཐབ་རྩོད་ཧ་ཅང་གནང་ཡོད་པ་དང་། གཞན་ཡང་རྒྱ་རི་བློ་གྲོས་རྒྱལ་མཚན་མཆོག་ནི་མཁྱེན་རྒྱ་ཆེ་བ་ཞིག་དང་། ལྷག་པར་ཕྱི་འབྲེལ་སྲིད་བྱུས་ཐོག་བྱང་ཆུབ་པའི་མི་སྣ་ཞིག་ཡིན་པ་མ་ཟད། མི་མང་དཀྱུས་མ་ཚོ་དང་ལྷན་དུ་འབྲེལ་བ་བཟང་པོ་ཡོད་མཁན་ཞིག་ཡིན་སྐོར་གསུངས།
ཕྱོགས་མཚུངས་དམ་པ་ཇོར་ཇ་ཕར་ནན་ཌེས་མཆོག་ནི་མང་ཚོགས་ཀྱི་འགོ་ཁྲིད་ཡིན་སྐོར་དང་སྦྲགས་ང་ཚོས་དམ་པ་ཁོང་གཉིས་ཀྱི་ལས་འཕྲོ་མཇུག་སྐྱོང་དགོས་པའི་རེ་སྐུལ་ཡང་གནང་འདུག
དེ་ནས་བཀའ་བློན་ཁྲི་ཟུར་སློབ་དཔོན་སྐྱབས་རྗེ་ཟམ་གདོང་རིན་པོ་ཆེ་མཆོག་གིས་གསུང་དོན། དམ་པ་ཁོང་གཉིས་ནི་ངའི་གྲོགས་པོ་ཉེ་ཤོས་གྲས་ཤིག་ཡིན་སྟབས་དམ་པ་དེ་ཉིད་སྐོར་ལ་སྐད་ཆ་ཤོད་རྒྱུ་དཀའ་ལས་ཁག་པོ་ཞིག་འདུག དམ་པ་ཇོར་ཇ་ཕར་ནན་ཌེས་མཆོག་ལ་མཚོན་ན་རྒྱ་གར་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་ཆེས་ཐོག་མ་གསར་འཛུགས་གནང་མཁན་ཡིན། ད་ལྟ་དང་འབྱུང་འགྱུར་འགོ་ཁྲིད་གསར་པ་མང་པོ་ཞིག་ཕེབས་པའི་ཁྲོད་དམ་པ་ཁོང་ལྟ་བུ་བོད་མི་དང་བོད་དོན་ཐོག་ཞལ་ཞེ་གཉིས་མེད་ཐོག་ནས་རྒྱབ་སྐྱོར་གནང་མཁན་ཧ་ཅང་དཀོན་པོ་རེད། དམ་པ་ཁོང་གི་ད་བར་སྡིངས་ཆ་འདྲ་མིན་ཐོག་བོད་དོན་སླད་རྒྱབ་སྐྱོར་ཤུགས་ཆེ་གནང་ཡོད།
ཕྱོགས་མཚུངས་རྒྱ་རི་བློ་གྲོས་རྒྱལ་མཚན་ཞིང་གཤེགས་མཆོག་ནི་ངའི་ཕྱག་སྦྲེལ་རེད། ཅེས་དང་སྐུ་ཞབས་རྒྱ་རི་བློ་གྲོས་རྒྱལ་མཚན་མཆོག་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཡིན་སྐོར་དང་དེ་བཞིན་ཁོང་སྐུ་འཚོ་བཞུགས་སྐབས་བོད་རྒྱ་འབྲེལ་མོལ་ཐེངས་དགུ་བྱུང་ཡོད་པ་སོགས་བོད་དོན་ཆེད་སྐུ་ལས་ཧ་ཅང་སྐྱོན་ཡོད་སྐོར་སོགས་གསུངས།
འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་སྐུ་གཤེགས་ཇོར་ཇ་ཕར་ནན་ཌེས་མཆོག་ནི་བོད་མིའི་གྲོགས་པོ་སྙིང་ཉེ་ཤོས་ཤིག་དང་། དམ་པ་ཁོང་གི་མི་ཚེ་ཧྲིལ་པར་བོད་དོན་རྒྱ་སྐྱོར་བྱེད་ཡོད་སྐོར་སོགས་གསུང་བཤད་གནང་། དེ་ནས་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་དང་། སྐུ་ཞབས་ཨིན་དེ་རེཤ་ཀུ་མར་མཆོག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མ་ཐེའོ་མ་ཁཱ་སི་མཆོག་བཅས་གིས་གསུང་བཤད་གནང་།
སྐབས་དེར་བཀའ་ཟུར་འབྲོང་ཆུང་དངོས་གྲུབ་མཆོག་གིས་མཛད་སྒོའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་གསུང་འཕྲིན་སྒྲོགས་སྦྱང་ཞུས་ཡོད་པ་བཅས། །
