གསར་ལས་ཁང་གི་གསར་འགོད་པས།

ཕྱི་ལོ་ ༢༠༡༩ ཟླ་ ༣ ཚེས་ ༢༦ རེས་གཟའ་མིག་དམར།

His Holiness the Dalai Lama speaking to a group of young professionals from Mongolia at his residence in Dharamsala, HP, India on March 25, 2019. Photo by Tenzin Choejor

༄༅། །ཕྱི་ལོ་ ༢༠༡༩ ཟླ་ ༣ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་རུ་སོག་བོད་ཀྱི་སྐུ་ཚབ་དོན་ཁང་དང་ན་རོ་པཎ་ཆེན་ནང་པའི་བསྟི་གནས་ཁང་ཐུན་མོང་གི་གོ་སྒྲིག་འོག་ཁྱད་ལས་པའི་ཟབ་སྦྱོང་ཐེངས་དང་པོར་བཅར་བའི་སོག་ཡུལ་གྱི་ཤེས་ལྡན་མི་སྣ་དང་། ཆབ་སྲིད་པ། སྨན་པ་སོགས་ཁྱོན་མི་གྲངས་ ༤༧ ཙམ་ལ་དམིགས་གསལ་མཇལ་ཁ་དང་བཀའ་སློབ་སྩལ་དོན། བོད་དང་སོག་པོར་ཐུན་མོང་མ་ཡིན་པའི་འབྲེལ་བ་ཡོད་པ་རེད། ཕལ་ཆེར་གོམས་གཤིས་སོགས་ཀྱི་ཐོག་ནས་བལྟས་པ་ཡིན་ན། ནང་ཆོས་མ་དར་གོང་ནས་བོད་དང་སོག་པོར་ས་མཚམས་ཀྱི་ཐོག་ནས་འབྲེལ་བ་ཡོད་པ་མ་ཟད། འབྲོག་པ་ལྟ་བུ་བྱས་ཏེ་བོད་སོག་གཉིས་འབྲེལ་བ་ཧ་ཅང་ཤུགས་ཆེན་པོ་རེད། རྒྱ་ནག་གི་གོང་མ་ཐང་གི་སྐབས་སུ་རྒྱ་ཡིག་ཐོག་ཐང་ཧྲུའི་ཟེར་བའི་ལོ་རྒྱུས་ཀྱི་དེབ་ཅིག་ཡོད། རྒྱ་མི་མཁས་དབང་ཞིག་གིས་ལོ་རྒྱུས་དེའི་ནང་གསལ་བ་ལྟར་ན། སྔ་མོ་རྒྱ་ཧོར་བོད་གསུམ་ཞེས་བོད་ཆོས་ལྡན་རྒྱལ་ཁབ་དང་། སོག་པོའམ་ཧོར་ནི་གཙོ་བོ་དམག་གི་ཐོག་ནས་ཤུགས་ཡོད་པ་ཞིག་དང་། རྒྱ་མི་ཚོ་ཆབ་སྲིད་ཀྱི་ཐོག་ནས་དོ་སྣང་ཡོད་པ་ཞིག་ཡིན་པ་བཤད་ཀྱི་འདུག གང་ལྟར་ང་རང་ཚོ་བོད་དང་སོག་པོ་ཐུན་མོང་མ་ཡིན་པའི་འབྲེལ་བ་ཡོད། ང་ཚོ་བོད་པའི་གོམས་གཤིས་མང་པོ་ཞིག་དང་། དེའི་ནང་དུ་སྟོད་གོས་ནི་སོག་ཡུལ་གནམ་གཤིས་གྲང་མོ་ཡིན་པ་དང་བོད་ཀྱང་གྲང་མོ་ཡོད་པས་སོག་པོའི་སྟོད་གོས་དེ་ང་ཚོར་ཡང་རན་པོ་ཡོད་པ་རེད། 

His Holiness the Dalai Lama greeting members of a group of young professionals from Mongolia as he arrives for their meeting as his residence in Dharamsala, HP, India on March 25, 2019. Photo by Tenzin Choejor

མཁན་ཆེན་ཞི་བ་འཚོ་བོད་ལ་ཕེབས་ནས་བཟུང་སྟེ་ང་ཚོས་ཆོས་དེ་རྒྱ་གར་ལ་དཔེ་བལྟས་ཡོད་པ་རེད། སྐད་ཡིག་ནི་མཁན་ཆེན་ཞི་བ་འཚོ་མ་བྱུང་གོང་གི་དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོའི་སྐབས་ནས་རྒྱ་གར་གྱི་ཡི་གེར་དཔེ་བལྟས་ནས། ཀ་ཁ་ག་ང་། ཅ་ཆ་ཇ་ཉ། ཞེས་དབྱངས་དང་གསལ་བྱེད་ཡོད་པའི་ཡི་གེ་ཞིག་བཟོས་པ་རེད། དུས་རབས་བརྒྱད་པའི་ནང་ལ་བོད་ཀྱི་བཙན་པོ་ཁྲི་སྲོང་ལྡེ་བཙན་གྱིས་རྒྱ་གར་གྱི་མཁན་ཆེན་ཞི་བ་འཚོ་གདན་ཞུ་གནང་ནས་ནང་པའི་ཆོས་སྤྱི་དང་། ལྷག་པར་དུ་ནཱ་ལེནྡྲའི་ཆོས་བརྒྱུད་བོད་ལ་བཙུགས་གནང་བ་རེད། དེར་བརྟེན། མཁན་ཆེན་ཞི་བ་འཚོ་གདན་འདྲེན་ཞུས་ནས་རྒྱ་གར་མཁས་པའི་ནཱ་ལེནྡྲའི་ཆོས་བརྒྱུད་རང་བཟུང་ཡོད། ངོས་ཀྱིས་ནམ་རྒྱུན་པཎ་གྲུབ་བཅུ་བདུན་ཞེས་བཤད་བཞིན་པ་དེ་ང་ཚོའི་དགེ་རྒན་རང་རེད། པཎ་གྲུབ་བཅུ་བདུན་གྱིས་མཛད་པའི་གཞུང་དག་ང་ཚོའི་སློབ་དེབ་ཆགས་ནས་ལྟ་བཞིན་ཡོད།

A member of the audience asking His Holiness the Dalai Lama a question during the meeting with young professionals from Mongolia at his residence in Dharamsala, HP, India on March 25, 2019. Photo by Tenzin Choejor

རིམ་བཞིན་སོག་ཡུལ་དུ་སངས་རྒྱས་པའི་བསྟན་པ་སྔ་དར། བར་དར། ཕྱི་དར་ཟེར་བ་ཞིག་བཤད་རྒྱུ་འདུག ཕལ་ཆེར་དར་གོས་ཚོང་ལམ་ Silk Road ཟེར་བ་དེ་བརྒྱུད་ནས་ཐང་སིན་སོགས་རྒྱ་གར་ལ་ཕེབས་པ་ནས་སོག་ཡུལ་ལ་ཐོག་མར་ནང་ཆོས་ལ་དོ་སྣང་ཞིག་བྱུང་བ་ཡིན་འདུག དེ་ལ་བསྟན་པ་སྔ་དར་དང་།  དེ་ནས་འགྲོ་མགོན་ཆོས་རྒྱལ་འཕགས་པ་དང་ཀུབ་ལི་ཁང་གི་དབུ་བླ་གནང་ནས་དཔལ་ས་སྐྱ་བའི་ཆོས་བརྒྱུད་དར་བ་དེ་ལ་བར་དར་ཟེར་གྱི་འདུག  དེ་ནས་བསྟན་པ་ཕྱི་དར་ནི་ཐམས་ཅད་མཁྱེན་པ་བསོད་ནམས་རྒྱ་མཚོ་སོག་ཡུལ་དུ་ཕེབས་ནས་གཙོ་བོ་འཇམ་མགོན་བླ་མའི་བསྟན་པ་འདི་སོག་པོའི་ཡུལ་ཁམས་ཀུན་ཏུ་ཁྱབ་པ་རེད། དེ་ལྟ་བུའི་ཐོག་ནས་སོག་པོའི་མཁས་པ་ཧ་ཅང་མང་པོ་བྱུང་བ་རེད། དཔེར་ན། ཕྱི་ལོ་ ༡༩༥༩ ལོར་ངོས་ཀྱིས་ལྷ་རམས་དམ་བཅའ་འཇོག་པའི་སྐབས་སུ་སྒོ་མང་དུ་སོག་པོའི་མཁས་པ་མང་པོ་ཡོད། སྐབས་དེར་སྒོ་མང་མཁན་པོ་སོག་པོ་ལེགས་ལྡན་ཕལ་ཆེར་ Buryat ནས་ཡིན་པ་ཡོད། ངོས་ཀྱིས་བསྐོས་པ་ཡིན། དཔེ་ཆ་ཧ་ཅང་ཡག་པོ་ཡོད་པ་རེད།

མཁན་པོ་ཐུབ་བསྟན་ཉི་མ་ཁོང་ཡང་དཔེ་ཆ་ཧ་ཅང་ཡག་པོ་ཡོད། དེ་བཞིན་སེ་ར་བྱེས་ལ་མགོ་སྟོད་ཟང་ངེ་ཟིང་ངེ་ཡོང་བའི་སྐབས་སུ་བསྟན་དར་ཟེར་བ་ཞིག་ཡོད། སོག་པོ་རེད། སེ་ར་བྱེས་ཀྱི་མཁན་པོ་རེད། དཔེ་ཆ་ཧ་ཅང་ཡག་པོ་ཡོད། དེ་ནས་དངོས་གྲུབ་ཚོགས་གཉིས་ངོས་ཀྱི་དགེ་རྒན་རེད། ཕྱི་ལོ་ ༡༩༥༩ ལོར་སོག་པོའི་མཁས་པ་མང་པོ་འདུག ང་ཚོས་སོག་རིགས་ཞེས་གཅིག་པ་བརྩི་ཡི་ཡོད་པ་རེད། གང་ལྟར་སོག་པོ་རང་བཙན་གྱི་རྒྱལ་ཁབ་དང་། ནང་སོག དེ་ནས་བྷོ་རི་ཡཏ། ཐུ་བ། སོག་པོ་ཡང་དག་ཟེར་བ་ཞིག་ཡོད། ཁོང་ཐུ་བ་ནས་རེད། ཨུ་རུ་སུའི་སྐད་ཡག་པོ་ཡོད་པ་ཞིག་ཡིན་པས་ཁ་ཤས་དོགས་པའང་བྱུང་བ་རེད། གང་ལྟར་བོད་སོག་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་རེད། ཅེས་དང་། 

འཛམ་བུ་གླིང་བྱམས་བརྩེས་ཕོངས་ནས་དཀའ་ངལ་འདི་དག་ཡོང་བཞིན་ཡོད། ཡི་ཤེའི་ཆོས་དང་ཁ་ཆེའི་ཆོས། འཇེའུ་ཆོས་ལུགས་བཅས་ཀྱིས་དཀོན་མཆོག་བྱམས་བརྩེའི་བདག་ཉིད་རེད། ང་ཚོ་དཀོན་མཆོག་གིས་བཀོད་པ་རེད། དེར་བརྟེན་ང་ཚོ་ལའང་བྱམས་བརྩེ་དགོས་པ་རེད་ཅེས་རྒྱུ་མཚན་དེ་ལྟར་བཤད། བྱམས་བརྩེ་སེམས་ཁམས་རིག་པ་དང་འབྲེལ་ནས་བསམ་བློའི་ནང་དུ་ཞི་བདེ་ཡོང་གི་ཡོད་པ་དང་། བསམ་བློའི་ཞི་བདེ་དཀྲུགས་མཁན་ཁོང་ཁྲོ་དང་ང་རྒྱལ་གྱིས་བྱེད་ཀྱི་ཡོད། སེམས་འཁྲུགས་པའི་བསམ་བློའི་ནང་གི་སྐྱོན་ནམ། ང་ཚོའི་སེམས་དཀྲུགས་མཁན་གྱི་སེམས་དེ་དག་གཙོ་བོ་མ་རིག་པ་ལ་བརྟེན་ཡོད། དེར་བརྟེན་རྩ་བ་ཐུག་ས་ལོག་ཤེས་ལ་བརྟེན་ཡོད། བྱམས་པ་དང་སྙིང་རྗེ། ཆོག་ཤེས། བཟོད་པ་བཅས་ནི་ཚད་མ་ལ་བརྟེན་ཡོད། ཚད་མའི་རྒྱབ་རྟེན་འདུག དེ་དག་ལ་སློབ་སྦྱོང་ཡག་པོ་བྱས་ཏེ་ཤེས་པ་ཡིན་ན་ཆོས་ཁས་བླངས་ཀྱང་མ་བླངས་ཀྱང་མིའི་སེམས་སྐྱིད་པོ་ཞིག་ཡོང་གི་རེད། མཁྱེན་སོང་ངམ།

ཆོས་མེད་པ་དང་། བྱམས་བརྩེ་ལ་དོ་སྣང་མ་བྱས་པར་དངུལ་རྐྱང་རྐྱང་ལ་བསམ་བློ་བཏང་ནས་བསྡད་ན་དེང་གི་འཛམ་གླིང་འདིར་དཀའ་ངལ་དང་རྙོག་དྲ་ཧ་ཅང་མང་པོ་ཞིག་འདུག དེ་དག་སྨོན་ལམ་བརྒྱབ་ནས་སེལ་ཐུབ་ཐབས་མེད། དང་པོ་རིམ་བཞིན་སློབ་སྦྱོང་གི་ནང་དུ་སེམས་ཁམས་རིག་པ་ཏོག་ཙམ་སླེབ་ཐུབ་པ་བྱེད་དགོས། ཕྲུ་གུ་ཆུང་ཆུང་ཚུན་ནས་ཚང་མས་ཞི་བདེ་དང་བདེ་སྐྱིད་འདོད་ཀྱི་ཡོད། བདེ་སྐྱིད་ཀྱི་རྩ་བ་སེམས་ཀྱི་ཞི་བདེ་རེད། དེར་བརྟེན་སློབ་སྦྱོང་སྤྲད་ནས་བྱེད་ཐུབ་པ་ཞིག་འདུག མཁྱེན་སོང་ངམ། ཞེས་སོགས་ཀྱི་བཀའ་སློབ་སྩལ་ཡོད་པ་བཅས། ། 

Share with your friends










Submit