ཟླ་བ་ ༣ ཚེས ༡༢ ༢༠༡༩
Published By ngawang thokmey

༢༠༡༩ ཟླ་ ༣ ཚེས་ ༡༢ རེས་གཟའ་མིག་དམར།

༄༅། །རྒྱ་གར་བྱང་ཕྱོགས་འཕགས་བོད་ས་མཚམས་ལ་དྭགས་བྱང་ཐང་ས་ཁུལ་དུ་འཚོ་བ་སྐྱེལ་བཞིན་པའི་བོད་མི་འབྲོག་པ་རྣམས་དགུན་དུས་གྲང་ངར་ཆེ་ཞིང་། ཁ་བའི་བུ་ཡུག་ཧ་ཅང་ཚུབ་པ་སོགས་ཀྱི་རྐྱེན་པས་ར་ལུག འབྲི་གཡག་སོགས་ལ་རྩྭ་ཐང་གི་སྐལ་བའི་དབེན་པར་བརྟེན་ལོ་ལྟར་དཀའ་ངལ་ཧ་ཅང་འཕྲད་བཞིན་ཡོད་པ་མ་ཟད།   འདི་ལོའི་དགུན་དུས་སྐབས་སྔར་དང་མི་འདྲ་བའི་གྲང་ངར་ཆེ་ཞིང་། ཁ་བ་ཧ་ཅང་མཐུག་པོ་བབ་པར་བརྟེན་འབྲོག་པའི་ར་ལུག་དང་འབྲི་གཡག་སོགས་ལྟོགས་ཤི་ཐེབས་པའི་ཛ་དྲག་གི་དཀའ་ངལ་ཧ་ཅང་འཕྲད་བཞིན་ཡོད་འདུག  དེར་བརྟེན་ལ་དྭགས་བསོད་ནམས་གླིང་ས་འགོ་ལས་ཁུངས་དང་ནང་སྲིད་ལས་ཁུངས་ནས་འཛམ་གླིང་ཁྱོན་དུ་གནས་པའི་བོད་རིགས་གཙོ་གྱུར་ཉམས་ཐག་དུད་འགྲོར་བརྩེ་སེམས་ཅན་གྱི་སྐྱེ་བོ་མཆོག་དམན་ཀུན་ལ་ཐེངས་འདིར་ལ་དྭགས་བྱང་ཐང་གི་བོད་མི་འབྲོག་པ་རྣམས་ལ་ངལ་སེལ་རོགས་རམ་གནང་ཆེད་ཛ་དྲག་འབོད་སྐུལ་ཞུ་བཞིན་འདུག 

སྤྱིར་ལ་དྭགས་ཁུལ་དུ་བོད་མི་བཙན་བྱོལ་བ་ ༧༥༤༦ ཡོད་ཁོངས་ནས་བོད་མི་ ༢༣༥༠ བྱང་ཐང་ཁུལ་དུ་གནས་པའི་བོད་མི་འབྲོག་པ་ཡིན་འདུག   ལ་དྭགས་བསོད་ནམས་གླིང་ས་འགོས་བྱང་ཐང་ས་ཁུལ་གཉིས་ཏེ་གསུམ་མདོ་དང་ས་སྨད་དུ་ཕེབས་ནས་བོད་མི་འབྲོག་པ་རྣམས་ཀྱི་དངོས་ཡོད་གནས་སྟངས་རྟོག་ཞིབ་རྒྱུས་ལོན་གནང་འདུག

བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཛ་དྲག་ངལ་སེལ་རོགས་རམ་ཆེད་ཧིན་སྒོར་འབུམ་ལྔ་གནང་འདུག  འོན་ཀྱང་ཛ་དྲག་གནས་སྟངས་མུ་མཐུད་གནས་བཞིན་ཡོད་པར་བརྟེན་རོགས་རམ་དགོས་པ་ཛ་དྲག་ཆགས་འདུག  བོད་མི་འབྲོག་པ་རྣམས་ལ་སྒོ་ཕྱུགས་ཤི་བ་རྣམས་ཀྱི་ཚབ་གསར་ཉོ་རྒྱུ་དང་། ད་ཡོད་ཕྱུགས་ལྷག་མ་རྣམས་ལ་གཟན་ཆག་ཉོ་རྒྱུ་དང་། གཟན་ཆག་འོར་འདྲེན་སོགས་ཀྱེད་ཆེད་རོགས་རམ་དགོས་མཁོ་ཧ་ཅང་ཡོད་འདུག 

གཤམ་འཁོད་ནང་སྲིད་ལས་ཁུངས་ཛ་དྲག་ངལ་སེལ་དངུལ་ཁང་ཨང་གྲངས་ཐོག་ནས་རྒྱ་གར་དང་ཕྱི་རྒྱལ་ཡལ་གྲུ་ཁག་ནས་འབྲེལ་བ་གནང་རོགས་ཞུ། 

རྡ་ས་ས་གནས་དངུལ་ཁང་ཁང་གྲངས། 

Account No. 105510953-99 FC Account No. 105510953-22
State Bank of India, Kotwali Bazar State Bank of India, Kotwali Bazar
Dharamsala-176215, H.P. India Dharamsala-176215, H.P. India
Bank Code: 0634, Bank IFSC Code: SBIN0000634 Bank Code: 0634, Bank Swift Code: SBININBB277

 

 ཛ་དྲག་གནས་སྟངས་དང་འབྲེལ་བའི་དྭོགས་འདྲི་རིགས་དང་ཞལ་འདེབས་གཏོང་སྟངས་སོགས་ནང་སྲིད་དྲུང་ཆེའི་དྲ་རྒྱའི་ཁ་བྱང་[email protected] ཐོག་ཐད་ཀར་འབྲེལ་བ་གནང་འཐུས།། 

Share with your friends










Submit