ཕྱི་ལོ་ ༢༠༡༩ ཟླ་ ༣ ཚེས་ ༡༡ རེས་གཟའ་ཟླ་བ། 

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མིའི་གསུམ་བཅུའི་དུས་དྲན་ཐེངས་ ༦༠ པ་སྲུང་བརྩིའི་མཛད་སྒོའི་ཐོག་ཕེབས་པའི་ཡུ་རོབ་དང་། འཇར་མ་ནི།  ཁེ་ན་ཌ།  ཨི་ཊ་ལི།  སི་ལོ་ཝ་ཀི་ཡ། ཐེ་ཝན།   ཀེན་ཡ། པི་རུ། ལྷོ་ཨ་ཕི་རི་ཀ།  ཨུ་རུ་སུ་  རྒྱལ་ཁབ་བཅས་ཀྱི་གྲོས་ཚོགས་འཐུས་མི་རྣམ་པ་ཕྱི་ལོ་ ༢༠༡༩ ཟླ་ ༣ ཚེས་ ༡༠ ཉིན་གྱི་ཕྱི་དྲོ་ཆུ་ཚོད་ ༤།༤༥ ཐོག་བོད་མི་མང་སྤྱི་འཐུས་ལྷན་ཁང་དུ་ཕེབས་སྐབས་དཔལ་ལྡན་ཚོགས་གཙོ་པདྨ་འབྱུང་གནས་མཆོག་གིས་གྲོས་ཚོགས་ཀྱི་ཚོགས་ཁང་ནང་སྣེ་ལེན་འཚམས་འདྲི་དང་སྦྲགས། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་། གྲོས་ཚོགས་ཚོགས་དུས་གཉིས་ཀྱི་སྐོར། དེ་བཞིན་བོད་མི་མང་སྤྱི་འཐུས་རྒྱུན་ལས་ཀྱི་ལས་དོན་ཁག་ངོ་སྤྲོད་གནང་རྗེས། སྐུ་མགྲོན་རྣམ་པས་སྲིད་སྐྱོང་དང་། སྤྱི་འཐུས་ཀྱི་འོས་བསྡུའི་སྐོར་དྲི་བ་ཕུལ་བར་དཔལ་ལྡན་ཚོགས་གཙོ་མཆོག་གིས་ལན་འདེབས་གསལ་བཤད་གནང་ཡོད་པ་དང་། དེ་ནས་ཕྱི་དྲོ་ཆུ་ཚོད་ ༧ པར་བོད་མི་མང་སྤྱི་འཐུས་ལྷན་ཚོགས་ནས་ནོར་བུ་གླིང་ཁའི་གསོལ་མགྲོན་ཁང་དུ་གྲོས་ཚོགས་འཐུས་མི་རྣམ་པར་དགོང་དྲོའི་གསོལ་སྟོན་ཞིག་གོ་སྒྲིག་ཞུས་གནང་སོང་།

སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་ཐོག་མར་ཕྱིའི་རྒྱལ་ཁབ་ཁག་འདྲ་མིན་ནས་ཕེབས་པའི་གྲོས་ཚོགས་འཐུས་མི་རྣམ་པར་འཚམས་འདྲི་དང་སྦྲགས། གསུང་དོན། དེ་རིང་ནི་བོད་ཀྱི་ལོ་རྒྱུས་ཐོག་ཤིན་ཏུ་ནས་གལ་འགངས་ཆེ་བའི་ཉིན་མོ་སྟེ་བོད་མིའི་རང་དབང་སྒེར་ལངས་གསུམ་ཅུའི་དུས་དྲན་ཐེངས་ ༦༠ པ་སྲུང་བརྩིའི་ཐོག་ཁྱེད་རྣམས་བཞུགས་སྒར་དུ་ཕེབས་པར་ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམས་མཛད་བྲེལ་ཧ་ཅང་ཆེན་པོ་ཡིན་ཡང་། དེ་རིང་གི་དུས་ཚོད་དམིགས་བསལ་ཅན་འདིར་བོད་དོན་ཐོག་རྒྱབ་སྐྱོར་དང་། གདུང་སེམས་མཉམ་སྐྱེད་སླད་འདིར་ཕེབས་པར་དམིགས་བསལ་གྱིས་བཀའ་དྲིན་ཆེ་ཞེས་ཞུ་རྒྱུ་ཡིན།ཁྱེད་རྣམ་པའི་རྒྱབ་སྐྱོར་གྱིས་ང་ཚོར་བོད་ཀྱི་གནད་དོན་དབུ་མའི་ལམ་གྱི་ཐོག་ནས་གསལ་རྒྱུར་བློ་སྟོབས་སྤེལ་བ་དང་ཕན་ཐོགས་ཆེན་པོ་ཡོད།

བོད་མི་མང་སྤྱི་འཐུས་ལྷན་ཚོགས་དང་རྒྱལ་ཁབ་ཁག་འདྲ་མིན་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཁག་ཟུང་སྦྲེལ་ཐོག་རྒྱལ་ཁབ་འདྲ་མིན་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་སྐོང་འཚོགས་གནང་བཞིན་ཡོད་པ་དང་། ད་བར་རྒྱལ་ཁབ་འདྲ་མིན་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༦ ཚོགས་གནང་ཡོད། ཚོགས་ཆེན་ཐེངས་དང་པོ་ཕྱི་ལོ་ ༡༩༩༤ ལོར་རྒྱ་གར་རྒྱལ་ས་ལྡི་ལིར་ཚོགས་གནང་ཡོད་པ་དང་། གཉིས་པ་ཕྱི་ལོ་ ༡༩༩༥ ལོར་ལི་ཐུ་ཝེ་ནི་ཡའི་གྲོང་ཁྱེར་ཝིལ་ནི་ཡ་ས་དང་། གསུམ་པ་ཕྱི་ལོ་ ༡༩༩༧ ལོར་ཨ་རིའི་རྒྱལ་ས་ཝ་ཤིང་ཊོན། བཞི་པ་ཕྱི་ལོ་ ༢༠༠༥ ལོར་སི་ཀོ་ཊི་ལེན་ཌིའི་རྒྱལ་ས་ཨི་ཌིན་བྷར། ལྔ་པ་ཕྱི་ལོ་ ༢༠༠༩ ལོར་ཨི་ཊ་ལི་རྒྱལ་ས་རོམ། དྲུག་པ་ཕྱི་ལོ་ ༢༠༡༢ ལོར་ཁེ་ན་ཌའི་རྒྱལ་ས་ཨོ་ཊ་ཝ་བཅས་ལ་ཚོགས་གནང་ཡོད།

ཕྱི་ལོ་ ༢༠༡༩ ཟླ་ ༥ ཚེས་ ༧ ནས་ ༡༠ བར་ལ་ཊི་ཝི་ཡའི་རྒྱལ་ས་རི་གར་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༧ པ་དེ་བཞིན་གོ་སྒྲིག་གནང་འཆར་ཡོད་པ་དང་། ཁྱེད་རྣམ་པ་ཁག་ཅིག་གིས་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐོག་མཉམ་ཞུགས་གནང་མྱོང་ཡོད་པ་དང་། ཚོགས་ཆེན་སྐོར་ལ་མཁྱེན་རྟོགས་ཡོད་པ་རེད། ཚོགས་ཆེན་འདིའི་དམིགས་ཡུལ་གཙོ་བོ་ནི་ཕན་ཚུན་གནས་ཚུལ་སྤེལ་རིས་དང་། ད་ལྟའི་གནས་སྟངས་ལ་བསྐྱར་ཞིབ།གྲོས་ཚོགས་བརྒྱུད་བོད་ཀྱི་གནད་དོན་རྒྱལ་སྤྱིའི་ནང་ཁྱབ་སྤེལ་དང་། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་གྲོས་མོལ་ཐོག་ནས་བོད་ཀྱི་གནད་དོན་ཞི་འགྲིག་ཡོང་རྒྱུར་རྒྱལ་ཁབ་ཁག་གི་གཞུང་གི་ངོས་ནས་རྒྱབ་སྐྱོར་ཚད་ལྡན་ཡོང་ཐབས་དང་། དེ་བཞིན་བོད་ནང་འགྲོ་བ་མའི་ཐོབ་ཐང་ཉམས་རྒུད་དུ་འགྲོ་བཞིན་པ་སོགས་ད་ལྟའི་བོད་ནང་གི་ཛ་དྲག་གནས་སྟངས་དང་། བོད་ཀྱི་ཁོར་ཡུག་ཉམས་ཉེས་སུ་འགྲོ་བཞིན་པའི་སྐོར་བཅས་ཀྱི་ཐོག་ལའང་བཀའ་བསྡུར་གནང་གི་ཡོད།

གཞན་ཡང་ཚོགས་ཆེན་དེ་བརྒྱུད་འབྱུང་འགྱུར་རྒྱ་ནག་གཞུང་གི་འགོ་འཁྲིད་ལ་འགྱུར་བ་ཕྱིན་རྗེས། བོད་དོན་ཐོག་ཤུགས་རྐྱེན་གང་ཐེབས་མིན་ཐད་དཔྱད་ཞིབ་བྱ་རྒྱུར་ཡང་གལ་ཆེན་པོ་ཆགས་ཀྱི་ཡོད། གྲོས་ཚོགས་འཐུས་མི་རྣམ་པ་མཛད་བྲེལ་ཆེ་བའི་རྐྱེན་གྱིས། ཚོགས་ཆེན་དེ་ཉན་གཉིས་རིང་འཚོགས་ཀྱི་ཡོད། བྱས་ཙང་ངས་ཁྱེད་རྣམ་པ་ལ་ཊི་ཝི་ཡར་འཚོགས་གཏན་འཁེལ་བའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༧ པའི་ཐོག་མཉམ་ཞུགས་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན།  ཁྱེད་རྣམས་རྡ་སར་ཕེབས་ནས་གསུམ་བཅུའི་དུས་དྲན་ཐོག་མཉམ་ཞུགས་གནང་བ་དང་། བོད་དོན་ཐོག་མུ་མཐུད་རྒྱབ་སྐྱོར་གནང་བར་སླར་ཡང་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་གནང་སོང་།

དགོང་དྲོའི་གསོལ་སྟོན་ཐོག་ 

༡) བྷོཌ་སྭ་ན་ཡུལ་གྱི་སྲིད་འཛིན་ཟུར་པ་འབུམ་རམས་པ་སྐུ་ཞབས་ཨེ་ཡན་ཁ་མ་ Ian Khama མཆོག་དང་།

༢) ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མ་སི་མན་ Thomas Mann མཆོག 

༣) འཇར་མ་ནིའི་གྲོས་ཚོགས་འཐུས་མི་སྐུ་ཞབས་མེ་ཁལ་བྷརནྜ་ Mr. Michael  Brand མཆོག

 ༤) ཨི་ཊ་ལིའི་གྲོས་ཚོགས་འཐུས་མི་ལྕམ་སྐུ་ཨེན་ཊོ་ནི་ལ་ཨིན་ཅར་ཏི་ Ms. Antonella Incerti མཆོག 

 ༥) གླིང་ཆེན་ཨ་ཕི་རི་ཀའི་ཀེན་ཡ་རྒྱལ་ཁབ་ཀྱི་གྲོས་ཚོགས་འཐུས་མི་སྐུ་ཞབས་སིལ་ཝ་སི་ཨ་ན་མི་ Mr.Silverse Anami མཆོག   

༦) ཁེ་ན་ཌའི་གྲོས་ཚོགས་འཐུས་མི་སྐུ་ཞབས་གར་ནེ་ཌི་ཇི་ནེ་སི་ Mr. Garneti Genius མཆོག་དང་། 

༧) ཁེ་ན་ཌའི་གྲོས་ཚོགས་འཐུས་མི་ལྕམ་སྐུ་ལིན་ཌ་ཌུང་ཀན་ Ms. Linda Duncan མཆོག 

 ༨) སི་ལོ་ཝ་ཀི་ཡའི་ Slovakia གྲོས་ཚོགས་འཐུས་མི་ལྕམ་སྐུ་ལུ་ཤི་ཡ་ ཌུ་རི་སི་ ནི་ཀོལ་སོ་ནོ་ཝ་ Ms. Lucia  Duris Nicholsonova མཆོག་དང་།

 ༩) སི་ལོ་ཝ་ཀི་ཡའི་གྲོས་ཚོགས་འཐུས་མི་སྐུ་ཞབས་མར་ཊིན་ པོ་ལི་ཡ་ཅིག་ Mr.Martin Poliacik མཆོག    

༡༠) པི་རུ་རྒྱལ་ཁབ་ཀྱི་གྲོས་ཚོགས་འཐུས་མི་སྐུ་ཞབས་ཨེལ་བྷེ་ཊོ་ ཌི་ བྷི་ལན་ཌི་ Mr. Albeto de Belaunde མཆོག    

༡༡) ལྷོ་ཨ་ཕི་རི་ཀའི་གྲོས་ཚོགས་འཐུས་མི་ལྕམ་སྐུ་སེན་ཌི་ཀལ་ཡཱན་ Ms. Sandy Kalyan མཆོག 

 ༡༢) ཐེ་ཝན་གྱི་གྲོས་ཚོགས་འཐུས་མི་ལྕམ་སྐུ་མེ་ནུ་ཡུ་ Ms.Mei Nu Yu མཆོག  

༡༣) ཨུ་རུ་སུའི་གྲོས་ཚོགས་འཐུས་མི་སྐུ་ཞབས་ Mr. Mikhail Mutulov མཆོག་བཅས་དང་། དཔལ་ལྡན་ཚོགས་གཙོ་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ་ཕེབས་གནང་ཡོད་པ་བཅས། །