༢༠༡༩ ཟླ་ ༣ ཚེས་ ༢༠ རེས་གཟའ་ལྷག་པ།

༄༅། །ཨ་རིའི་ཕྱི་སྲིད་དྲུང་ཆེ་སྐུ་ཞབས་མ་ཡིག་པོམ་པེའོ་Mike Pompeoམཆོག་བལ་ཡུལ་དུ་གཞུང་འབྲེལ་ཕྱོགས་ཕེབས་སྐབས་བལ་ཡུལ་ཕྱི་སྲིད་བློན་ཆེན་པྲ་དཱིབ་གྱ་ཝ་ལི་Pradeep Gyawaliམཆོག་དང་མཇལ་འཕྲད་གནང་འདུག  སྐབས་དེར་ཕྱི་སྲིད་དྲུང་ཆེ་མཆོག་གིས་བལ་གཞུང་གིས་རྒྱལ་སྤྱིའི་ཁྲིམས་ལུགས་ལ་བརྩི་བཀུར་ཐོག་བོད་མི་བཙན་བྱོལ་བ་རྣམས་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་དབང་། སྐད་ཡིག་སྲུང་སྐྱོབ་དང་འགྲུལ་བཞུད་རང་དབང་། དེ་བཞིན་མཐོ་སློབ་ནང་བོད་ཕྲུག་འཛུལ་ཞུགས་ཆོག་པའི་ཐོབ་ཐང་བཅས་ཀྱི་གནད་དོན་ཐོག་བཀའ་མོལ་བྱུང་བར།  བལ་གཞུང་ཕྱི་སྲིད་བློན་ཆེན་མཆོག་གིས་བོད་མི་བཙན་བྱོལ་བ་རྣམས་བལ་ཡུལ་ནས་བོད་དུ་ཕྱིར་སློག་གཏོང་རྒྱུ་མིན་པའི་ཁས་ལེན་གནང་འདུག 

སྤྱིར་ཨ་རིའི་ཕྱི་སྲིད་དྲུང་ཆེ་མཆོག་བལ་ཡུལ་སྲིད་བློན་ཀེ་པི་ཤརྨཱ་ཨོ་ལི་ KP Sharma Oli མཆོག་གིས་སྲིད་བློན་གྱི་ལས་འཁུར་ཞུས་ནས་ལོ་གཅིག་འཁོར་བའི་དུས་ཚིགས་ལ་འཚམས་འདྲི་ཞུ་ཆེད་ཕེབས་པ་ཞིག་ཡིན་འདུག གནས་ཚུལ་དེ་ཡུལ་དེའི་The Kathmandu Post ཞེས་པའི་གསར་ཤོག་ནང་ཐོན་འདུག 

ཉེ་ཆར་ཨ་རིའི་ཕྱི་སྲིད་ལས་ཁུངས་ཀྱིས་བཏོན་པའི་ལོ་འཁོར་འགྲོ་བ་མིའི་ཐོབ་ཐང་དང་འབྲེལ་བའི་སྙན་ཐོའི་ནང་།  བལ་ཡུལ་གཞུང་གིས་བལ་ཡུལ་ནང་གི་བོད་མི་བཙན་བྱོལ་བ་ཚོར་ཕྱི་ལོ་ ༡༩༩༥ ལོ་ནས་བཟུང་ཡུལ་དེའི་ནང་གནས་སྡོད་ཆོག་པའི་སྐྱབས་བཅོལ་བའི་ལག་འཁྱེར་སྤྲོད་རྒྱུ་མཚམས་འཇོག་བྱས་པ་དང་།  ཁྲིམས་དེའི་འོག་ཕྱི་ལོ་ ༡༩༩༥ ལོར་ལོ་ངོ་བཅུ་དྲུག་མ་ཟིན་པའམ་དེའི་རྗེས་སུ་བལ་ཡུལ་ནང་སྐྱེས་པའི་བོད་མི་ཚོ་ལའང་ཐོབ་ཐང་དེ་དག་བཅད་འདུག །