༢༠༡༩ ཟླ་ ༢ ཚེས་ ༡༨ རེས་གཟའ་ཟླ་བ།
༄༅། །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། དེ་ཡང་ ༢༠༡༩ ཟླ ༢ ཚེས ༡༤ དགོང་མོ་ཆུ་ཚོད ༦ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ཡེལ་མཐོ་སློབ་ Yale University ནས་ཁ་ནེ་ཊེ་ཁ་ཊེ་མངའ་སྡེའི་ནོར་ཝེ་ཆེ་ Norwich ས་གནས་སུ་བོད་རིགས་སུམ་བརྒྱ་ལྷག་འདུ་འཛོམས་སར་ཕེབས་འབྱོར་དང་བསྟུན་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་ངག་དབང་བསམ་གཏན་ལགས་ནས་ཕེབས་བསུའི་མཇལ་དར་དང་གཟའ་མཇུག་བོད་ཡིག་སློབ་མ་རྣམས་ནས་ཕེབས་བསུའི་རྔ་རོལ་དང་ཕྱེ་མར་ཆང་ཕུད་འདེགས་འབུལ་གྱིས་སྣེ་ལེན་གཟབ་རྒྱས་ཞུས། གཟའ་མཇུག་སློབ་མའི་ཟློས་གར་རུ་ཁག་དང་ས་གནས་ཀྱི་གཞས་པ་གཞས་མ། སྦོ་སེ་ཊོན་དང་ནིའུ་ཡོག་ནས་ཕེབས་པའི་གཞས་པ་གཞས་མའི་རུ་ཁག་དྲུག་ཙམ་གྱིས་སྲོལ་རྒྱུན་གཞས་སྣ་འཁྲབ་སྟོན་གནང་།
མཛད་སྒོའི་ཐོག་ནིའུ་ལོན་ཌོན་གྲོང་ཁྱེར་གྱི་གྲོང་སྡེའི་སྤྱི་ཁྱབ་པ་སྐུ་ཞབས་ Michael Passero དང་། ལོ་རྒྱུས་ཚན་པའི་འགན་འཛིན་ལྕམ་སྐུ་ Kate Schramm ལགས། གཞན་ཡང་ས་གནས་ཀྱི་དཔོན་རིགས་ཁག་ཅིག་སྟེ། སྐུ་ཞབས་Robert Farewellལགས་དང་། བྷ་སེམ་གྷ་ཡེ་ཏི་ Bassem Gayed ལགས་སོགས་ས་གནས་ཀྱི་གནད་ཡོད་མི་སྣ་མང་པོ་ཕེབས་ཡོད་འདུག
མཛད་སྒོ་དངོས་གཞིའི་སྐབས་སྲིད་སྐྱོང་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜེལ་རྟེན་གསུམ་འདེགས་འབུལ་དང་གཟའ་མཇུག་བོད་ཡིག་སློབ་མ་རྣམས་ནས་བོད་ཀྱི་རྒྱལ་གླུ་དབྱངས་སུ་གྱེར། དེ་རྗེས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་རྣམས་ལ་གདུང་སེམས་མཉམ་སྐྱེ་ཞུ་སླད་མྱ་ངན་ངག་བཅད་གནང་བསྟུན། སྲིད་སྐྱོང་མཆོག་གིས་གསུང་བཤད་གནང་བའི་ནང་དོན་གཙོ་བོ་ནི་ད་ལན་ཝ་ཤིང་ཊོན་རྒྱལ་སའི་མངའ་ཁུལ་གྱི་ཨ་རིའི་གྲོས་ཚོགས་ཀྱི་ཚོགས་ཁང་ཞིག་ཏུ་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཚོགས་པ་དང་། ལས་འཆར་དེ་ནི་བཀའ་ཤག་གིས་ ༢༠༡༨།༡༩ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་བོད་མི་རྣམས་རྒྱ་གར་གྱིས་གཙོས་རྒྱལ་ཁབ་འདྲ་མིན་ནང་བཙན་བྱོལ་དུ་ཕེབས་ནས་ལོ་ ༦༠ འཁོར་བའི་དུ་ཚིགས་དང་བསྟུན་འབྲེལ་ཡོད་རྒྱལ་ཁབ་སོ་སོའི་ས་གནས་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འཆར་ད་ཆ་མཇུག་སྒྲིལ་རྒྱུའི་མཚམས་སུ་བསླེབས་ཡོད།
ཕྱི་ཚེས་ ༡༢ ཉིན་སྲིད་སྐྱོང་མཆོག་ཝ་ཤིང་ཊོན་ཌི་སི་ཨ་རིའི་གྲོས་ཚོགས་ཁང་དུ་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོར་ཕེབས་པ་དང་། སྐབས་དེར་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་ Nancy Pelosi མཆོག་ཕེབས་པར་ལྕམ་སྐུ་མཆོག་བརྒྱུད་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུའི་གོ་སྐབས་ཐོབ་པ་དང་། མཛད་སྒོའི་ཐོག་ཨ་རིའི་གཞུང་གི་ཆོས་དད་རང་དབང་སྲུང་སྐྱོབ་ཚན་པའི་སྐུ་ཚབ་སྐུ་ཞབས་ Sam Brownback ཕེབས་ཡོད་པ་མ་ཟད། དེ་སྔོན་ཁེ་ན་ཌ་དང་ཨོ་སེ་ཊོ་ལ་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོའི་ཐོག་ཏུའང་བློན་ཆེན་ཕེབས་ཐུབ་ཡོད་པ་སོགས་གསུངས།
ཡང་སྲིད་སྐྱོང་མཆོག་གིས་ཉིན་ཤས་གོང་ཁོང་ཉི་ཧོང་ལ་ཕེབས་དགོས་དོན་ནི། བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་གྲངས་ ༩༡ ཡོད་པར་བརྟེན། གྲོས་ཚོགས་འཐུས་མི་མང་ཤོས་ཡིན་པའི་གྲོས་ཚོགས་ཤིག་ཆགས་ཡོད་པ་དང་། ཉི་ཧོང་གྲོས་ཚོགས་ནས་རྒྱ་ནག་གཞུང་གིས་བོད་ནང་དུ་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པ་མ་ཟད། བོད་ཀྱི་ཐུན་མིན་ཆོས་དང་རིག་གཞུང་ཁོར་ཡུག་དང་བཅས་པར་རྩ་མེད་གཏོང་བཞིན་པའི་སྲིད་བྱུས་ལ་སྐྱོན་བརྗོད་གནང་ཡོད་པ་དང་། བོད་ཀྱི་གནད་དོན་སེལ་ཆེད་དབུ་མའི་ལམ་གྱི་སྲིད་བྱུས་གཞིར་བཟུང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་ཆེད་ཉི་ཧོང་གྲོས་ཚོགས་ནས་རྒྱབ་སྐྱོར་གྱི་གྲོས་ཆོད་བཞག་ཡོད་སྐོར།
ཕྱོགས་མཚུངས་སྲིད་སྐྱོང་མཆོག་ཉེ་ལམ་ལྷོ་ཨ་ཧྥི་རི་ཀར་ཕེབས་དགོས་དོན་ནི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམས་དང་མཇལ་ཕྲད་ཆེད་ཡིན་སྐོར་སོགས་གསུངས། དེ་བཞིན་དེང་སྐབས་རྒྱ་ནག་གཞུང་གི་གནོན་ཤུགས་ལ་བརྟེན་ནས་ཡུ་རོབ་དང་ཁེ་ན་ཌ། ཨོ་སེ་ཊོ་ལི་ཡ་སོགས་སུ་སྲིད་སྐྱོང་མཆོག་གཞུང་འབྲེལ་ཕྱོགས་ཕེབས་གནང་རྒྱུར་དཀའ་ངལ་ཆེ་རུ་འགྲོ་བཞིན་ཡོད་པ་མ་ཟད། མི་ངན་རེ་ཟུང་བཙན་བྱོལ་བོད་མིའི་སྤྱི་ཚོགས་ནང་སིམ་འཛུལ་གྱིས་ཆོལ་ཁ་དང་ཆོས་ལུགས་དབྱེན་སྦྱོར་དང་། བོད་མིའི་སྒྲིག་འཛུགས་དང་བོད་མི་མང་ཚོགས་དབར་འགལ་ཟླ་ཇེ་ཆེར་བཟོ་ཐབས་བྱས་པ་སོགས་ལས་ངན་སྣ་ཚོགས་སྤེལ་ཐབས་བྱེད་བཞིན་པར་བརྟེན་མང་ཚོགས་ནས་ཀྱང་གཟབ་གྲུང་དགོས་སྐོར་གསུངས། ཡང་མང་ཚོགས་ནས་ཀྱང་ཆབ་སྲིད་ཀྱི་འགོ་ཁྲིད་འོས་འདེམས་གནང་སྐབས་ཤེས་འཇོན་དང་ལྷག་བསམ་སེམས་ཤུགས་ཡོད་པའི་མི་སྣ་དྲག་གྲས་འོས་འདེམས་བྱེད་དགོས་པ་མ་གཏོགས་རང་གི་ལུང་ཚན་གཅིག་པའི་ཞེན་ཁོགས་དང་ངོ་ཤེས་པ་རྒྱུ་མཚན་དུ་བྱས་ནས་འོས་ཤོག་བསླུགས་པ་ཡིན་ན་ནོར་འཁྲུལ་ཡིན་པར་བརྟེན། ཚང་མས་ཡིད་གཟབ་གནང་དགོས་པ་སོགས་གསུང་རྗེས་མང་ཚོགས་ཀྱི་དྲི་བར་ལན་འདེབས་གནང་།
སྲིད་སྐྱོང་མཆོག་ཝ་ཤིང་ཊོན་ཌི་སི་ནས་རོ་ཌི་མཐོ་སློབ་ཁང་ University of Rhode Island དང་ཡེལ་མཐོ་སློབ་ཁང་ Yale University ནས་མགྲོན་འབོད་ལྟར་ཕེབས་ནས་གསུང་བཤད་གནང་རྗེས་ས་གནས་ཁ་ནེ་ཊེ་ཁ་ཊེའི་བོད་རིགས་སྤྱི་མཐུན་ཚོགས་པས་ལོ་སར་དགོང་ཚོགས་དང་སྟབས་བསྟུན་ས་གནས་མི་མང་ཚོགས་ཁང་གསར་པ་ཉོ་རྒྱུའི་ལས་འཆར་ཆེད་དཔལ་འབྱོར་འདུ་འགོད་ལས་གཞིར་དམིགས་ནས་མཛད་སྒོ་ཞིག་གོ་སྒྲི་གནང་ཡོད་པ་རེད། སྐུ་ཚབ་དོན་གཅོད་ཁང་གི་ལས་བྱེད་བསྟན་འཛིན་ཚེ་དཔག་གཞུང་འབྲེལ་ལྷན་བཅར་ཞུས་ཡོད།
ཁ་ནེ་ཊེ་ཁ་ཊེ་བོད་རིགས་སྤྱི་མཐུན་ཚོགས་པ་ནི་ ༢༠༡༠ ལོར་དབུ་བརྙེས་ནས་ད་ལྟ་བོད་མི་ ༥༠༠ མ་ཟིན་ཙམ་ཡོད་པ་དང་ཕྱི་ལོ་ ༢༠༡༤ ལོར་ཚོགས་པ་དེ་བཞིན་མངའ་སྡེའི་ལས་ཁུངས་སུ་དེབ་སྐྱེལ་བྱས་ཟིན། ས་གནས་བོད་མི་མང་ཆེ་བ་དང་བླངས་དཔྱ་ཁྲལ་འབུལ་མཁན་ཡིན་པ་དང་། ཆོས་རིག་ལས་ཁུངས་ནས་༸རྒྱལ་བའི་སྐུ་ཕྱྭ་དང་། བསྟན་སྲིད་ཞབས་རིམ་གསོག་སྒྲུབ་དང་འབྲེལ་བའི་གསལ་བསྒྲགས་ནམ་ཕེབས་སྐབས་སྐུ་ཚབ་དོན་གཅོད་བརྒྱུད་སྒྲུབ་ཐོ་ཕུལ་བ་དང་། ས་གནས་བོད་རིགས་ཚོར་མཚོན་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལྟར་ཆོལ་གསུམ་མཐུན་ལམ་ཟོང་ཁ་ཆིག་སྒྲིལ་ངང་གནས་ཡོད། བོད་ཀྱི་ཐུན་མིན་དུས་ཆེན་ཁག་སྲུང་བརྩི་ཞུ་བ་དང་། སྙན་ངག་གྱེར་འདོན། གཞས་སྣ་འཁྲབ་སྟོན་གནང་བ་མ་ཟད། རེས་གཟའ་པ་སངས་ནམ་ཡིན་སྐབས་གཟའ་མཇུག་བོད་ཡིག་སློབ་གྲྭ་འཚོགས་བཞིན་ཡོད་པ་དང་། ད་ལྟའི་སྐབས་གཟའ་མཇུག་བོད་ཡིག་སློབ་གྲྭ་འཛིན་གྲྭ་ལྔ་ལ་དབྱེ་ནས་ཁྱོན་སློབ་ཕྲུག་གྲངས་ ༡༠༠ ལྷག་ཙམ་ལ་སློབ་ཁྲིད་གནང་མཁན་དགེ་རྒན་ ༡༢ ཡོད་པ་དང་། བོད་ཕྲུག་ཚོའི་བོད་སྐད་དང་བོད་ཡིག་གནས་ཚད་གང་ལེགས་ཡོད་པ་ནི་དགེ་རྒན་དང་ཕ་མའི་ཚོགས་ཆུང་ཟུར་དུ་ཡོད་པར་བརྟེན་བྱུང་ཐུབ་པ་དང་། ལོ་སྔོན་མ་ནས་འགོ་འཛུགས་ཀྱིས་དབྱར་ཁའི་གུང་སེང་སྐབས་བོད་ཀྱི་ཐེབས་རྩ་ཁང་དང་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་དགའ་སླར་རིན་པོ་ཆེ་མཆོག་གི་མཐུན་འགྱུར་རོགས་རམ་འོག་བདུན་ཕྲག་གཉིས་ཙམ་རིང་བོད་ཀྱི་ཆོས་དང་རིག་གཞུང་སྐད་ཡིག་སོགས་ཀྱི་ཟབ་སྦྱོང་འཚོགས་བཞིན་ཡོད་པ་བཅས།།
