ཕྱི་ལོ་ ༢༠༡༩ ཟླ་ ༢ ཚེས་ ༡༦ རེས་གཟའ་སྤེན་པ།

༄༅། །ཨེ་མོ་རི་མཐོ་སློབ་ཀྱི་དྲ་རྒྱའི་སྟེང་གནས་ཚུལ་སྤེལ་བ་ལྟར་ན།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རི་ཨེ་མོ་རི་མཐོ་སློབ་ Emory University དབར་ལོ་ངོ་ཉི་ཤུ་ལྷག་རིང་སྒོམ་སྒྲུབ་ཚན་རིག་དང་བྱམས་བརྩེ་གཞི་རྩར་གྱུར་བའི་བཟང་སྤྱོད་སློབ་གསོའམ་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་བགྲོ་གླེང་དང་གོ་བསྡུར་སྦྱངས་བཤད་མཛད་པའི་མཇུག་འབྲས་སུ་ཕྱི་ལོ་ ༢༠༡༩ ཟླ་ ༤ ཚེས་ ༤ ནས་ཚེས་ ༦ བར་རྒྱ་གར་རྒྱལ་ས་ལྡི་ལི་ཏལ་ཀ་ཏོ་རཱ་ Talkatora Indoor Stadium རྩེད་ཐང་ཆེན་མོར་ཆོས་ལུགས་ལ་མ་བརྟེན་པའི་བཟང་སྤྱོད་གོང་འཕེལ་ཐོག་རྒྱལ་སྤྱིའི་རང་བཞིན་ལྡན་པའི་ལྷན་ཚོགས་ཤིག་འཚོགས་རྒྱུ་དང་། སྐབས་དེར་སྤྱི་ཚོགས་དང་ཚོར་ཤེས། བཟང་སྤྱོད་ཀྱི་སློབ་གསོ་དང་འབྲེལ་བའི་བསླབ་གཞིའམ་ཆོས་ལུགས་ལ་མ་བརྟེན་པའི་བཟང་སྤྱོད་གོང་སྤེལ་གཏོང་ཐབས་ཀྱི་བསླབ་གཞི་ Social, Emotional, and Ethical Learning དེ་ཉིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་མཛད་རྒྱུ་ཡིན་འདུག  མཛད་སྒོའི་ཐོག་རྒྱལ་ཁབ་སུམ་ཅུ་ནས་ཤེས་ཡོན་སློབ་སྟོན་མི་སྣ་དང་མཁས་དབང་། ཉམས་ཞིབ་པ་སོགས་ཁྱོན་མི་ཉིས་སྟོང་མཉམ་ཞུགས་གནང་འཆར་ཡོད་འདུག 

དེ་ཡང་ཨེ་མོ་རི་མཐོ་སློབ་དང་ Emory University ཏཱ་ལའི་བླ་མའི་ཐེབས་རྩ། དེ་བཞིན་རྒྱ་གར་ནང་རྟེན་གཞི་བྱས་པའི་ཝ་ན་ Vana Foundation ཐེབས་རྩ་ཁང་བཅས་བཟུང་འབྲེལ་ཐོག་ནས་ཐེངས་འདིར་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་དབུ་འབྱེད་མཛད་སྒོ་དེ་གོ་སྒྲིག་ཞུ་རྒྱུ་ཡིན་འདུག  མཛད་སྒོ་དེ་དག་ཐད་ཀར་བརྙན་འཕྲིན་ལམ་ནས་རྒྱང་བསྲིང་ཞུ་རྒྱུ་དང་། སྐབས་དེར་རྒྱལ་སྤྱིའི་ཁྱོན་ནས་སྤྱི་ཚོགས་དང་ཚོར་ཤེས་ཐོག་མཁས་དབང་དང་ཆེད་ལས་མི་སྣ་ལྕམ་ལིན་ཌ་ལན་ཏེ་རི་ Linda Lantieri ལགས་དང་། ཀིམ་བྷར་ལི་ Kimberly Schonert-Reichl ལགས། དེ་བཞིན་རྒྱ་གར་བ་བྱིས་པའི་ཐོབ་ཐང་སྲུང་སྐྱོབ་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་སཏྱཱར་ཐི་ Kailash Satyarthi མཆོག་སོགས་ཕེབས་རྒྱུ་ཡིན་འདུག  

དེ་ཡང་རྒྱ་གར་ནང་རྟེན་གཞི་བྱས་པའི་ཝ་ན་ Vana Foundation ཐེབས་རྩ་ཁང་གིས་རྒྱ་གར་གནའ་རབས་སེམས་ཁམས་རིག་པ་དང་འབྲེལ་བའི་ལེགས་བཤད་བསྐྱར་གསོ་ཡོང་ཐབས་གནང་བཞིན་པ་མ་ཟད། སོ་ནམ་གྱི་ལས་གཞི་དང་། རྒྱ་གར་སྲོལ་རྒྱུན་རོལ་མོ་དང་ཐགས་ལས་སོགས་སྒྱུ་རྩལ་འདྲ་མིན་ཡོད་པ་དེ་དག་སླར་གསོ་ཡོང་ཐབས་གནང་མཁན་གྱི་ཐེབས་རྩ་ཁང་ཞིག་ཡིན་འདུག །