ཟླ་བ་ ༢ ཚེས ༡༣ ༢༠༡༩
Published By ngawang thokmey

༢༠༡༩ ཟླ་ ༢ ཚེས་ ༡༢ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༢ ཚེས་ ༡༢ རེས་གཟའ་མིག་དམར་སྔ་དྲོ་ཨ་རི་སྐུ་ཚབ་དོན་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་། རྒྱལ་སའི་མངའ་ཁུལ་ས་གནས་བོད་རིགས་ཚོགས་པ་བཅས་ཀྱི་གོ་སྒྲིག་འོག ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་གོ་སྒྲིག་ཞུ་སྐབས། བོད་མིའི་བླ་ན་མེད་པའི་དབུ་ཁྲིད། འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུ་མཛད་པའི་བརྙན་འཕྲིན་ཞིག་སྩལ་བའི་ནང་དོན། 

དེ་རིང་ཁྱེད་རང་ཚོ་ཨ་རིའི་དོན་གཅོད་ཐེ་བའི་འབྲེལ་ཡོད་ཚོགས་པ་ཁག་དང་ས་གནས་བོད་རིགས་ཚོས་པ་བཅས་ཀྱིས་ཨ་རི་ལ་ཐུགས་རྗེ་ཆེ་ཟེར་བའི་མཛད་སྒོ་ཞིག་ཚུགས་བཞིན་ཡོད། ངོས་ཀྱི་བསམ་ཚུལ་དང་འབྲེལ་བའི་ཐོག་ནས་སྐབས་འདིར་ཐུགས་རྗེ་ཆེ་ལབ་ཀྱི་ཡོད། ཨ་རི་ནི་ཕྱོགས་གཅིག་ནས་འཛམ་གླིང་གི་སྟོབས་ཆེན་རྒྱལ་ཁབ་གཅིག་རེད། སྟོབས་ཆེན་རྒྱལ་ཁབ་དེའང་རང་དབང་དང་མང་གཙོ། ཁྲིམས་ཀྱི་དབང་སྒྱུར་ལྡན་པ། རང་དབང་ལྡན་པའི་འཛམ་གླིང་སྤྱིའི་མིག་ལྟོས་བྱེད་ས་ཞིག་དང་། བློ་གཏད་བཅོལ་ས་ཞིག་ཆགས་ཡོད་སྟབས་ཧ་ཅང་གལ་ཆེན་པོ་ཞིག་ཆགས་ཡོད། འཛམ་གླིང་དམག་ཆེན་དང་གཉིས་སྐབས་རང་དབང་མང་གཙོ་འགན་སྲུང་བྱེད་མཁན་ཞིག་ཆགས་པ་རེད། ཧ་ཅང་རྩ་བ་ཆེན་པོ་རེད། བོད་པར་མཚོན་ནའང་ཨིན་ཇི་ནི་དེ་སྔ་ནས་རྒྱུས་ཡོད་རེད། འཇར་མན་ཟེར་ནས་བོད་པ་ཚོས་དོ་སྣང་ཧ་ཅང་བྱེད་ས་ཞིག་དང་།  དེ་ནས་ཨ་རི་རེད། གང་ལྟར་བོད་དུ་དུས་ལོག་ཡོང་སྐབས་བོད་པ་ཚོས་ཨ་རི་ལ་རེ་བ་དང་བློ་གཏད་ཧ་ཅང་བཅོལ་ནས་བསྡད་པ་རེད། དུས་ལོག་བྱུང་ནས་ ༡༩༥༠ ནང་ཐོག་མའི་གནས་ཚུལ་ཡོང་སྐབས་བོད་པའི་གནས་ཚུལ་དེ་འཛམ་གླིང་རྒྱལ་ཚོགས་ལ་ཞུས་པ་རེད། སྐབས་དེར་གཙོ་བོ་ཨ་རིའི་གཞུང་གི་ཤུགས་རྐྱེན་འོག་མ་ལེ་ཤི་ཡ་དང་། ཨེལ་སེལ་ཝེ་ཌོར་ El Salvador གཉིས་ཀྱིས་ཞུ་བརྒྱུད་བྱས་ནས་འཛམ་གླིང་རྒྱལ་ཚོགས་ལ་ཞུས་པ་རེད། ཨ་རིས་བོད་དོན་ཐོག་འགོ་སྟོད་ནས་དམིགས་བསལ་གྱི་ཤ་ཚ་དང་བདེན་པའི་བདེན་རྒྱབ་བྱས་པ་རེད།

ངོས་རང་སྒེར་ལ་མཚོན་ནའང་ ༡༩༤༢ ཙམ་ཡིན་པ་ཡོད། སྐབས་དེར་དམག་ཆེན་མུ་མཐུད་གནས་ཡོད། IIia Tolstoy དང་ཁོང་གི་རོགས་པ་ལྷ་སར་འབྱོར་བྱུང་། སྐབས་དེར་ཨ་རིའི་སྲིད་འཛིན་རུ་སོ་ཝིལྜི་ Roosevelt རེད། ཁོང་གིས་ཕྱག་ཡིག་གཅིག་དང་ཁོང་གི་པར་ས་ཡིག་སྦྱར་མ་ཞིག དངུལ་གྱིས་བཟོས་པའི་གྲུ་གཟིངས་ཤིག ཆུ་ཚོད་གཅིག་བསྐུར་བ་ནི་འདི་རེད།  སྐབས་དེར་ངོས་རང་ཆུང་ཆུང་ཡིན་སྟབས་ཡི་གེ་དེར་དོ་སྣང་དེ་ཙམ་མེད་པར་ཆུ་ཚོད་འདིར་དོ་སྣང་ཧ་ཅང་བྱས་པ་རེད། དེ་ནས་བཟུང་ཆུ་ཚོད་འདི་ངོས་ཀྱིས་ཉར་བསྡད་པ་རེད། ཕྱིས་སུ་ངོས་རང་ཨ་རིར་ཐེངས་ཤིག་སྐྱོད་སྐབས་ནེན་སི་པེ་ལོ་སི་ཁོང་གིས་ཆུ་ཚོད་གཟིགས་འདོད་གནང་བ་རེད། དེར་བརྟེན་ངོས་ཀྱིས་ཐེངས་ཤིག་ཨ་རིར་སྐྱོད་སྐབས་ཆུ་ཚོད་འདི་ཆེད་མངགས་ཁྱེར་ནས་ཁོང་ལ་བསྟན་པ་ཡིན། སྐབས་དེར་ང་ཚོ་དང་ལྷན་མི་བཅུ་གྲངས་ཤིག་འདུག  ནེན་སི་ལི་ལོ་སི་ཡིས་མི་དེ་དག་ཚང་མར་ཆུ་ཚོད་དེ་བསྟན་སོང་།  

གང་ལྟར་ངོས་རང་སྒེར་ལ་མཚོན་ན་ཕྱི་ལོ་ ༡༩༤༢ ནས་བཟུང་སྔ་ས་ནས་འབྲེལ་བ་ཆགས་ཡོད། དེའི་རྗེས་སུ་ངོས་རང་ཨ་རིར་འགྲོ་རྒྱུའི་གོ་སྐབས་བྱུང་ནས་ཨ་རིའི་སྲིད་འཛིན་སྔ་རྗེས་མང་པོ་ཞིག་ངོས་ཀྱིས་མཇལ་རྒྱུའི་གོ་སྐབས་བྱུང་ཡོད། ལྷག་པར་དུ་ཨོ་བྷ་མར་མཚོན་ན་ཁོང་ནོ་བེལ་ཞི་བདེའི་གཟེངས་རྟགས་རག་མཁན་ཞིག་རེད། ཁོང་གིས་དེ་སྔ་སྲིད་འཛིན་རུ་སོ་ཝིལྜི་ཕྱག་ཡིག་དེའི་ངོ་ཤུས་ཤིག་དང་སྲིད་འཛིན་ཊུ་མན་ Truman མཆོག་གི་ཕྱག་ཡིག་ངོ་ཤུས་དེ་ཁོང་གིས་ངོས་ལ་སྐབས་དེར་གནང་བྱུང་། དེ་དག་དཔང་རྟགས་རང་རེད།

ལོ་ངོ་བཅུ་ཕྲག་མང་པོ་ཞིག་རིང་ལ་ང་ཚོའི་དབར་དམིགས་བསལ་འབྲེལ་བ་ཡོད་པ་ཞིག་དང་། ཨ་མི་རི་ཀའི་སྲིད་འཛིན་སྔ་རྗེས་ཀྱིས་བོད་དོན་ཐོག་ཤ་ཚ་དང་རྒྱབ་སྐྱོར། སེམས་ཁུར་ཡོད་པ་དེ་འདྲ་རེད། དེར་བརྟེན་དེ་རིང་དུས་ཚོད་འདིར་ངོས་རང་མི་ལོ་རྒན་ལོ་བརྒྱད་ཅུ་གྱ་བཞིར་ཉེ་བ་ཞིག་གིས་འདས་པའི་ལོ་རྒྱུས་དེ་དག་རྗེས་སུ་དྲན་པའི་ཐོག་ནས་ངོས་ཀྱི་ངོ་ཤེས་མི་མང་པོ་ཞིག་འདས་ཟིན་པ་རེད། འོན་ཀྱང་ཁོང་རྣམས་ཀྱི་ཤ་ཚ་དང་སེམས་ཁུར་བྱས་པའི་འབྲས་བུ་ད་ལྟ་ཡིན་ནའང་བསྡད་ཡོད། བོད་རྒྱ་ཆེའི་མི་མང་གི་བསམ་བློའི་ནང་དུ་དངོས་གནས་བོད་མི་ཚོར་ཤ་ཚའི་ཐོག་ནས་རྒྱབ་སྐྱོར་གནང་མཁན་ཚོའི་བཀའ་དྲིན་ནམ་ཡང་བརྗེད་རྒྱུ་མ་རེད། དེར་བརྟེན་དེ་རིང་གོ་སྐབས་འདིར་ཁྱེད་ཚོས་ཨ་མི་རི་ཀར་བཀའ་དྲིན་རྗེས་སུ་དྲན་པའི་ཐོག་ནས་ཐུགས་རྗེ་ཆེ་ཞུ་བཞིན་པའི་སྐབས་འདིར་ངོས་ནས་ཀྱང་ཐུགས་རྗེ་ཆེ་ཞུ་རྒྱུ་ཡིན།

Share with your friends










Submit