ཟླ་བ་ ༡༢ ཚེས ༦ ༢༠༡༨
Published By སྐལ་བཟང་བདེ་སྐྱིད།
ཕྱི་ལོ་ ༢༠༡༨ ཟླ་ ༡༢ ཚེས་ ༦ རེས་གཟའ་ཕུར་བུ།

༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༢ ནས་ ༡༤ བར་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༤ པ་དེ་བཞིན་ཡུ་རོབ་རྒྱལ་ཁབ་པོ་ལེན་ཊིའི་གྲོང་ཁྱེར་ཀ་ཊ་ཝི་ཙར་ Katowice ནང་ཚོགས་བཞིན་ཡོད། གོ་ལའི་ཁོར་ཡུག་ལྷན་ཚོགས་འདི་ནི་འཛམ་གླིང་ནང་ཁོར་ཡུག་ཐོག་ལྷན་ཚོགས་ཆེ་ཤོས་ཡིན་ཞིང་། ལྷན་ཚོགས་སུ་རྒྱལ་ཁབ་འདྲ་མིན་ཁག་ ༡༩༥ ཙམ་ནས་ཕེབས་པའི་སྐུ་ཚབ་འཐུས་མི་རྣམ་པ་དང་། གཞན་ཡང་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་ཛམ་ལྷ་བསྟན་པ་རྒྱལ་མཚན་ལགས་བཅས་ཚོགས་ཞུགས་གནང་ཡོད།
དེ་ཡང་ཕྱི་ཚེས་ ༥ རེས་གཟའ་ལྷག་པ་ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གོ་ལའི་གནམ་གཤིས་གྱུར་ལྡོག་གི་གནད་དོན་དང་འབྲེལ་བའི་སྐོར་གསུང་འཕྲིན་ཞིག་སྩལ་ཡོད་པ་འདི་ཉིད་ལྷན་ཚོགས་སུ་སྒྲོགས་སྦྱང་ཞུས་ཡོད།
དེ་ཡང་མགོན་པོ་གང་ཉིད་མཆོག་གི་གསུང་འཕྲིན་ནང་། གནམ་གཤིས་འགྱུར་ལྡོག་གི་དཀའ་ངལ་དེ་རྒྱལ་ཁབ་རེ་གཉིས་ཀྱི་གནད་དོན་ཞིག་མ་རེད། དེ་ནི་འགྲོ་བ་མི་རིགས་སྤྱི་དང་། འཛམ་གླིང་འདིའི་ནང་འཚོ་བཞིན་པའི་སྲོག་ཆགས་ཡོངས་དང་འབྲེལ་བ་ཆགས་ཡོད།  ང་ཚོར་སྡོད་གནས་འཛམ་གླིང་འདི་ཁོ་ན་ལས་མེད། གལ་ཏེ་འཛམ་གླིང་འདིའི་ཁོར་ཡུག་གནས་སྟངས་ཀྱི་རྐྱེན་པས་འཚོ་གནས་བྱེད་ཐབས་མེད་པ་ཞིག་ཆགས་པ་ཡིན་ན།  འཛམ་གླིང་གཞན་ཞིག་ཏུ་ང་ཚོ་སྤོ་ས་མེད།  དེར་བརྟེན་ཚང་མས་དགོངས་པ་ཆེ་བཞེས་ཀྱིས་ཁོར་ཡུག་སྲུང་སྐྱོབ་བྱ་རྒྱུ་དང་། གོ་ལའི་ཚ་དྲོད་ཀྱི་དཀའ་ངལ་སེལ་ཆེད་དོན་ཕན་ལྡན་པའི་ཐབས་ལམ་ཞིག་འཚོལ་དགོས་པ་ནི་ཛ་དྲག་དགོས་མཁོ་ཞིག་ཡིན།

མཁའ་དབྱིངས་བར་སྣང་ནས་བླངས་པའི་འཛམ་གླིང་གི་འདྲ་དཔར་དེ་འདྲ་ལ་བལྟ་སྐབས།  གོ་ལ་སྔོ་ལྡུམ་གཅིག་མ་གཏོགས་རྒྱལ་ཁབ་ཕན་ཚུན་དབར་ས་མཚམས་སོགས་མ་མཐོང་རྒྱུ་མི་འདུག   དེར་བརྟེན་ ༼  ངའི་རྒྱལ་ཁབ་༽ ཟེར་བ་དང་། ༼  ང་ཚོའི་གླིང་ཆེན་༽ ཞེས་བསམ་བློ་གཏོང་རྒྱུའི་དུས་ཚོད་ཡོལ་ཟིན་སྟབས་ཚང་མས་གོ་ལ་གཅིག་གྱུར་གྱི་འདུ་ཤེས་འཛིན་ནས་ཀུན་ཁྱབ་འགན་ཁུར་གྱི་འདུ་ཤེས་ཆེ་རུ་གཏོང་དགོས།  ཞེས་འཁོད་ཡོད། 

གཞན་ཡང་ཛམ་ལྷ་བསྟན་པ་རྒྱལ་མཚན་ལགས་ཀྱིས་བོད་མཐོ་སྒང་གི་ཁོར་ཡུག་དེ་འཛམ་གླིང་སྤྱི་ཡོངས་ལ་གལ་གནད་ཆེན་པོ་ཞིག་ཆགས་བཞིན་ཡོད་པ་དང་། བོད་མཐོ་སྒང་གི་ཁོར་ཡུག་ལ་ཤུགས་རྐྱེན་ངན་པ་བྱུང་བ་ལྟར་གོ་ལའི་གནམ་གཤིས་འགྱུར་ལྡོག་འགྲོ་ངེས་ཡིན་པར་བོད་མཐོ་སྒང་དེ་བཞིན་གལ་ཆེན་པོ་ཡིན་པ་ནན་བརྗོད་གནང་།
གོ་ལའི་གནམ་གཤིས་འགྱུར་ལྡོག་ཐད་བོད་མཐོ་སྒང་གི་ཁོར་ཡུག་གལ་ཆེན་པོ་ཡིན་པར་རྒྱལ་སྤྱིའི་མང་ཚོགས་ནས་རྒྱུ་མཚན་འདྲ་མིན་ལ་བརྟེན་ནས་ངོས་འཛིན་བྱེད་ཀྱི་མེད་སྟབས། བོད་མཐོ་སྒང་གི་ཁོར་ཡུག་དེ་འཛམ་གླིང་སྤྱི་ཡོངས་ལ་གལ་གནད་ཆེན་པོ་ཇི་ལྟར་ཆགས་ཀྱི་ཡོད་པ་རྒྱ་ཆེ་མང་ཚོགས་ནས་དངོས་ཡོད་གནས་ཚུལ་མཁྱེན་རྟོགས་ཡོང་སླད་ཕྱི་ལོ་ ༢༠༠༩ ནས་བཟུང་ད་བར་བོད་མིའི་སྒྲིག་འཛུགས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་དུ་མཉམ་ཞུགས་བྱེད་བཞིན་ཡོད། ཅེས་དང་། 

ཕྱོགས་མཚུངས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་འགྱུར་ལྡོག་གི་ལྷན་ཚོགས་སུ་འཛམ་གླིང་སྤྱི་ཡོངས་ལ་བོད་མཐོ་སྒང་གི་ཁོར་ཡུལ་གལ་གནད་ཆེན་པོ་ཇི་ལྟར་ཡིན་པའི་སྐོར་སྙན་སེང་ཞུ་གཏུག་གནང་ཡོད་པ་བཅས། །

Share with your friends










Submit