༢༠༡༨ ཟླ་ ༡༢ ཚེས་ ༢༩ རེས་གཟའ་སྤེན་པ།

༄༅། །འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། མཛད་འཆར་སྔོན་དུ་གཏན་འབེབས་ཟིན་པ་ལྟར་ན། ཕྱི་ལོ་ ༢༠༡༨ ཟླ་ ༡༢ ཚེས་༣༡ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མིའི་སྒྲིག་འཛུགས་དང་། གམ་བཅར་རྣམ་གྲྭ་ཕན་བདེ་ལེགས་བཤད་གླིང་། 

ཤེལ་དཀར་ཆོས་སྡེ་མངའ་ཞབས་བཅས་ནས། མགོན་པོ་གང་ཉིད་བསྟན་འགྲོའི་ཕན་བདེའི་སླད་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་བཞེད་ལྷུན་གྱིས་འགྲུབ་ཆེད་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུའི་སྐལ་བཟང་གི་གོ་སྐབས་དང་བསྟུན།  བོད་མིའི་སྒྲིག་འཛུགས་ཆོས་རིག་ལས་ཁུངས་ནས་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་༸སྐུ་ཕྲེང་བཅུ་བཞི་པ་ཆེན་པོ་མཆོག་ཐུན་མོང་འདུལ་བྱའི་སྣང་ངོར་འཆར་ལོའི་ནང་༸སྐུའི་དགུང་སྐེག་དངོས་གཞི་འཁེལ་བར་བརྟེན། དགུང་སྐེག་གི་དགེགས་བར་ཆད་ཆ་ཕྲ་མོ་ཙམ་ཡང་མིང་གི་ལྷག་མར་གཏང་ཕྱིར། ཆོས་རིག་ལས་ཁུངས་ཀྱི་ཐོ་གཞུང་ནང་གསལ་རྒྱ་བལ་འབྲུག་གསུམ་ནས་རིས་མེད་ཆོས་སྡེ་ཁག་གི་དགེ་བཙུན་དགོན་གྲངས་ ༢༧༦ ལ་གོང་ཚེས་ཉིན་ནང་རྟེན་དུ་ཐུབ་པའི་སྐུ་བརྙན་རེ་དང་། བོན་པོའི་དགོན་སྡེ་ཁག་ལ་སྟོན་པ་གཤེན་རབ་ཀྱི་སྐུ་བརྙན་རེ་འབུལ་གཏན་ཁེལ་བར་བརྟེན་དགོན་པ་གྲྭ་ཚང་སོ་སོའི་སྐུ་ཚབ་རྣམས་གནས་མཆོག་རྡོ་རྗེ་གདན་དུ་ཕེབས་ཡོད།  

འོན་ཀྱང་དགོན་པ་ཁག་གཅིག་གི་སྐུ་ཚབ་རྣམས་གློ་བུར་དུ་ཕྱིར་རང་གནས་སུ་ཕེབས་དགོས་བྱུང་སྟབས། ཆོས་རིག་ལས་ཁུངས་ཀྱིས་དུས་ཚོད་སྔ་སྣུར་ཞུས་ཏེ་ཕྱི་ཟླ་ ༡༢ ཚེས་ ༢༧ དང་ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག 

བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག ཆོས་རིག་དྲུང་ཆེ་བསྟན་འཛིན་ལུང་རྟོགས་ལགས་བཅས་ཀྱིས་རྒྱ་གར་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གྱི་གསུང་ཆོས་ར་བའི་ནང་ཕེབས་ཏེ། དཔལ་ལྡན་སྲིད་སྐྱོང་མཆོག་གིས་བོད་བརྒྱུད་ནང་བསྟན་གྱི་དགོན་སྡེ་ཁག་བཞི་དང་གཡུང་དྲུང་བོན་གྱི་དགོན་སྡེ་ཁག་བརྒྱད་བཅས་ཁྱོན་དགོན་སྡེ་ཁག་ ༡༢ ཀྱི་སྐུ་ཚབ་རྣམ་པར་སྐུ་བརྙན་རེ་སྔ་སྣུར་དུ་ཕུལ་ཡོད་འདུག 

དེ་རྗེས་དཔལ་ལྡན་སྲིད་སྐྱོང་མཆོག་གིས། གནས་མཆོག་རྡོ་རྗེ་གདན་དུ་དད་ལྡན་ཆོས་ཞུ་བ་ཚོར་རིན་མེད་སྨན་བཅོས་དང་སྨན་སྦྱིན་གྱི་ཞབས་འདེགས་བསྒྲུབས་དང་སྒྲུབ་བཞིན་པའི་འཕྲོད་བསྟེན་ལས་ཁུངས་ཀྱི་རིན་མེད་སྨན་སྒར་དང་། སྨན་རྩིས་ཁང་སོགས་ལ་འཚམས་གཟིགས་གནང་ཡོད་པ་བཅས།