༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༧ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༡༡ ཐོག་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་དཔེ་མཛོད་ཁང་གི་ཕྱི་ལོ་ ༢༠༡༨ ལོའི་ཉེ་བའི་གཙུག་ལག་རམ་འབྱམས་སློབ་གཉེར་མཐར་སོན་གྱི་མཛད་སྒོ་སྟབས་བདེ་ཞིག་གོ་སྒྲིག་གནང་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། དྲུང་ཆེ་ངག་དབང་ཡེ་ཤེས་ལགས། དགེ་ལས་དང་སློབ་ཕྲུག་རྣམ་པ། དེ་བཞིན་གསར་འགོད་པ་བཅས་ཁྱོན་མི་གྲངས་ ༤༠ ཙམ་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་སྣང་གསལ་མར་མེ་ཞལ་ཕྱེ་གནང་གྲུབ་མཚམས་སྨོན་ལམ་གསུང་འདོན་གནང་། དེ་ནས་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་འདེགས་འབུལ་ཞུས་ཡོད།

དེ་ནས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་ཕེབས་བསུ་དང་འབྲེལ་ངོ་སྤྲོད་གསུང་བཤད་གནང་གྲུབ་རྗེས་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་བོད་ཀྱི་དཔེ་མཛོད་ཁང་གི་ཕྱི་ལོ་ ༢༠༡༨ ལོའི་ཉེ་བའི་གཅུག་ལག་རམ་འབྱམས་སློབ་གཉེར་མཐར་སོན་པ་རྣམས་ལ་ལག་འཁྱེར་གནང་སྟེ་གསུང་བཤད་གནང་དོན། ཚང་མར་སྔ་དྲོ་བདེ་ལགས་ཞུས་པ་དང་ཆབས་ཅིག དེ་རིང་བཞུགས་སྒར་བོད་ཀྱི་དཔེ་མཛོད་ཁང་ནས་བོད་ཀྱི་སྐད་ཡིག་གིས་གཙོས་ནང་དོན་རིག་པ་བཅས་ཀྱི་ལས་འཆར་གྱི་ཐོག་ནས་ཉེ་བའི་གཙུག་ལག་རམ་འབྱམས་པ་མཐར་སོན་པའི་ལག་འཁྱེར་འབུལ་རྒྱུའི་མཛད་སྒོ་དེའི་ཐོག་ལ་ཕེབས་པའི་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། དྲུང་ཆེ་ངག་དབང་ཡེ་ཤེས་ལགས། དགེ་ལས་རྣམ་པ། ལྷག་པར་སློབ་ཕྲུག་རྣམས་ལ་ཐོག་མར་བོད་མིའི་སྒྲིག་འཛུགས་ཆོས་རིག་ལས་ཁུངས་དང་ང་རང་སྒེར་གྱི་ངོས་ནས་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 

གོང་དུ་བོད་ཀྱི་དཔེ་མཛོད་ཁག་གི་འགན་འཛིན་གྱིས་གསུང་པ་ལྟར། བོད་ཀྱི་དཔེ་མཛོད་ཁང་དེ་བཞིན་ལོ་ལྔ་བཅུ་འཁོར་ལ་ཉེ་བ་ཞིག་ཡིན་སྟབས་བོད་ཀྱི་ཐུན་མིན་ཆོས་དང་རིག་གཞུང་ལ་སོགས་ཉར་ཚགས་བྱས་པ་ཙམ་མ་ཟད། ཕྱི་རྒྱལ་ཡུལ་གྲུ་འདྲ་མིན་ཁག་ནས་ཕེབས་པའི་ཕྱི་རྒྱལ་བ་རྣམས་ལ་རང་རེའི་ཆོས་དང་རིག་གཞུང་ལ་སོགས་ངོ་སྤྲོད་གནང་རྒྱུ་སོགས་ཀྱི་བྱས་རྗེས་ཧ་ལས་པ་ཞིག་གནང་དང་གནང་མུས་རེད། 

དེའི་ཐོག་ལ་འགན་ཁུར་ཆེན་པོའི་ངང་ནས་ཕྱག་ལས་གནང་མཁན་ཡོངས་ལ་བཀའ་དྲིན་རྗེས་དྲན་ཞུ་རྒྱུ་དང་། བར་ལམ་ལོ་བཅུ་ཕྲག་གཅིག་གི་ནང་ཚུད་ལ་གཙོ་བོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལ་བརྟེན་ནས་གང་ས་ཅི་ཐད་ནས་ཡར་རྒྱས་དང་གསར་གཏོད་ཧ་ཅང་གནང་ཡོད་པ་དེ་དག་དངོས་ཡོད་གནས་ཚུལ་དང་མཐུན་པའི་ལས་གཞི་མང་པོ་ཞིག་གནང་འགོ་བཙུགས་པ་ལྟར་གྲུབ་འབྲས་བཟང་པོ་ཐོན་དང་འཐོན་བཞིན་པར་ངས་བོད་མིའི་སྒྲིག་འཛུགས་ཆོས་རིག་ལས་ཁུངས་དང་། ང་རང་སྒེར་ངོས་ནས་བསྔགས་བརྗོད་དང་འབྲེལ་ཡོད་ལས་བྱེད་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། 

ལྷག་པར་ཐེངས་འདིར་ཕྱི་ལོ་ ༢༠༡༨ ལོའི་ཉེ་བའི་གཅུག་ལག་རམ་འབྱམས་སློབ་གཉེར་མཐར་སོན་མཁན་བོད་མིས་གཙོས་རྒྱལ་ཁབ་འདྲ་མིན་ནས་ཡིན་འདུག ལས་གཞི་དང་པོ་དེའི་ཐོག་ལ་ཁོང་རྣམས་ཀྱིས་ཆ་ཤས་བླངས་པའི་ཐོག་ནས་སློབ་སྦྱོང་ལ་ཧུར་བཙོན་དང་། དགེ་རྒན་རྣམས་ནས་ཀྱང་སྐུ་ལས་ཧ་ཅང་བསྐྱོན་པར་བརྟེན་ད་རེས་སློབ་གཉེར་མཐར་སོན་པ་རྣམས་ལ་དམིགས་བསལ་གྱི་འཚམས་འདྲི་དང་བསྔགས་བརྗོད་ཙམ་མ་ཟད། མ་འོངས་པར་མུ་མཐུད་ནས་སློབ་སྦྱོང་ཡག་པོ་ཡོང་བའི་ཡིད་ཆེས་དང་སྨོན་ལམ་ཡོད། དེ་རིང་འདིར་བཅར་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་སོང་།

ཕྱི་ལོ་ ༡༩༥༩ ལོའི་གོང་ལ་བོད་ནང་བོད་ཀྱི་ཐུན་མིན་ཆོས་དང་རིག་གཞུང་ལ་སོགས་དར་སྤེལ་ཧ་ཅང་ཆེན་པོ་བྱུང་ཡོད། བོད་ནང་རྐྱེན་ངན་བྱུང་བར་བརྟེན་བཙན་བྱོལ་ནང་བོད་ཀྱི་ཐུན་མིན་ཆོས་དང་རིག་གཞུང་ལ་སོགས་ཉར་ཚགས་དང་དར་སྤེལ་བྱས་ནས་མི་ལོ་ ༦༠  འཁོར་ལ་ཉེ་ཡི་ཡོད། བཙན་བྱོལ་དུ་སླེབས་རྗེས་གྲུབ་འབྲས་བཟང་པོ་མང་པོ་ཞིག་ཏན་ཏན་བྱུང་ཡོད་པའི་ནང་ནས་བོད་ཀྱི་ཐུན་མིན་ཆོས་དང་རིག་གཞུང་མི་ཉམས་རྒྱུན་འཛིན་བྱ་རྒྱུ་དེ་གྲུབ་འབྲས་ཆེ་ཤོས་ཤིག་ཡིན་པ་དྲན་གྱི་ཡོད། དེའི་ཐོག་ལ་སྤོབས་པ་དང་དགའ་བ་སྐྱེ་དགོས་པ་ཞིག་རེད། 

གཞན་ཡང་ཆོས་བརྒྱུད་ཀྱི་སློབ་སྦྱོང་དང་། སློབ་སྦྱོང་གང་འདྲ་ཞིག་སྦྱོང་བའི་སྐབས་ནང་དོན་ཙམ་མ་ཟད། དེའི་འགྲེལ་པ་དང་ལྷག་པར་ལོ་རྒྱུས་རྣམས་ཞིབ་ཚགས་པོའི་ངང་ནས་སྦྱང་དགོས་རྒྱུ་ཧ་ཅང་གལ་ཆེན་པོ་རེད། དེའི་ཐོག་དགོངས་པ་བཞེས་དགོས། བོད་ཀྱི་དཔེ་མཛོད་ཁང་དེ་བཞིན་བོད་མིའི་བླ་ན་མེད་པའི་དབུ་ཁྱིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་ལྟར་བཙུགས་པ་ཞིག་ཡིན། ཞེས་དང་།

གཞན་ཡང་བཀའ་བློན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཁུར་གཙོ་བོ་ཁག་ངོ་སྤྲོད་སྙིང་བསྡུས་གནང་རྗེས་ཉེ་བའི་གཙུག་ལག་རམ་འབྱམས་སློབ་གཉེར་མཐར་སོན་པ་རྣམས་ནས་ལོ་གསུམ་གྱི་སློབ་གཉེར་ཉམས་མྱོང་སྐོར་ངོ་སྤྲོད་གནང་ཡོད།
མཐར་བོད་ཀྱི་དཔེ་མཛོད་ཁང་གི་དྲུང་ཆེ་ངག་དབང་ཡེ་ཤེས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །