ཟླ་བ་ ༡༡ ཚེས ༣༠ ༢༠༡༨
Published By སྐལ་བཟང་བདེ་སྐྱིད།

ཕྱི་ལོ་ ༢༠༡༨ ཟླ་ ༡༡ ཚེས་ ༣༠ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༣༠ རེེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྤྲོད་དཔང་ཤེས་རིག་དྲུང་ཆེ་ཀརྨ་སེངྒེ་ལགས་དབུ་བཞུགས་ཐོག་ནང་སྲིད་ལས་ཁུངས་ཀྱི་དྲུང་ཆེ་གསར་རྙིང་དབར་རྩིས་སྤྲོད་རྩིས་ལེན་ལེགས་པར་གྲུབ་མཚམས་དྲུང་ཆེ་གསར་པ་དཔེ་ཟུར་དབང་འདུས་ཚེ་རིང་ལགས་ཀྱིས་ནང་སྲིད་ལས་ཁུངས་ཀྱི་དྲུང་ཡིག་ཆེན་མོའི་ལས་ཁུར་འགོ་འཛུགས་གནང་སོང་།

དེ་ཡང་དྲུང་ཆེའི་ལས་ཁུངས་ནང་སྤྲོད་དཔང་ཤེས་རིག་དྲུང་ཆེ་ཀརྨ་སེངྒེ་ལགས་དང་། ནང་སྲིད་དྲུང་ཆེ་འཆི་མེད་རིག་འཛིན་ལགས། དྲུང་ཆེ་གསར་པ་དཔེ་ཟུར་དབང་འདུས་ཚེ་རིང་ལགས་བཅས་ལྷན་འཛོམས་ཀྱིས་དྲུང་ཆེ་གསར་རྙིང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་གྲུབ་བསྟུན་དྲུང་ཆེ་ཟུར་པ་འཆི་མེད་རིག་འཛིན་ལགས་ཀྱིས་དྲུང་ཆེ་གསར་པ་དཔེ་ཟུར་དབང་འདུས་ཚེ་རིང་ལགས་ལ་ཞབས་སྟེགས་རྩིས་སྤྲོད་གནང་སྟེ། དྲུང་ཆེ་གསར་རྙིང་དབར་ཕན་ཚུན་མཇལ་དར་གཡོགས་རེས་གནང་། དེ་ནས་རིམ་བཞིན་ནང་སྲིད་ལས་བྱེད་ཡོངས་ནས་དྲུང་ཆེ་གསར་པ་དཔེ་ཟུར་དབང་འདུས་ཚེ་རིང་ལགས་སུ་འཚམས་འདྲིའི་མགུལ་དར་ཕུལ་གྲུབ་མཚམས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད།

དཔེ་ཟུར་དབང་འདུད་ཚེ་རིང་ལགས་ནི། ཕྱི་ལོ་ ༡༩༥༩ ཟླ་ ༧ ཚེས་ ༡ ཉིན་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་སྐྱེས་ཤིང་། སྦེལ་ཀོབ་གཏན་སློབ་ཐོན་རྗེས་ཝ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ནས་ཤཱསྟྲི་ཐོན། ཕྱི་ལོ་ ༡༩༨༣ ཟླ་ ༥ ཚེས་ ༡༥ ཉིན་གནས་དགུ་པའི་ཐོག་དཔལ་འབྱོར་འདུ་འགོད་ཁང་གི་ཚོད་ལྟའི་གཞོན་དྲུང་། པྱི་ལོ་ ༡༩༨༤ ཟླ་ ༧ ཚེས་ ༡ ཉིན་གནས་དགུ་པ་ལས་བྱེད་ངོ་མར་བསྐོ་གཞག ཕྱི་ལོ་ ༡༩༨༤ ཟླ་ ༡༡ ཚེས་ ༡༥ ཉིན་གནས་རང་འཇགས་ཐོག་སྦེལ་ཀོབ་ཕྱུགས་བཟོའི་དངུལ་གཉེར་དུ་གནས་སྤོས།

ཕྱི་ལོ་ ༡༩༨༨ ཟླ་ ༡ ཚེས་ ༡ ཉིན་གནས་རང་འཇགས་ཐོག་འབུམ་ལ་བསྟན་སྒང་ལས་དྲུང་དུ་གནས་སྤོས། ༡༩༩༢ ཟླ་ ༨ ཚེས་ ༡ ཉིན་ལས་དོའི་གནས་རིམ་དུ་བསྐོ་གཞག ཕྱི་ལོ་ ༡༩༩༣ ཟླ་ ༣ ཚེས་ ༡༥ ཉིན་འབུམ་ལ་དང་བསྟན་སྒང་གཞིས་འགོ་གཅིག་ལྕོགས་སུ་གནས་སྤོས། ཕྱི་ལོ་ ༡༩༩༣ ཟླ་ ༦ ཚེས་ ༣ ཉིན་སྡེ་འགན་གནས་རིམ་དུ་གནས་སྤར། ཕྱི་ལོ་ ༡༩༩༦ ཟླ་ ༣ ཚེས་ ༢༡ ཉིན་ཧུན་སུར་རབ་རྒྱས་གླིང་ས་གནས་འགོ་འཛིན་དུ་གནས་སྤོས།

ཕྱི་ལོ་ ༡༩༩༦ ཟླ་ ༧ ཚེས་ ༢ ཉིན་དྲུང་ལས་གནས་རིམ་ཐོག་གནས་སྤར། ཕྱི་ལོ་ ༡༩༩༦ ཟླ་ ༧ ཚེས་ ༢༥ ཉིན་འབུམ་ལ་དང་བསྟན་སྒང་གཞིས་འགོ་གཅིག་ལྕོགས་སུ་ལས་འགན་བཀོད་སྒྲིག ཕྱི་ལོ་ ༡༩༩༧ ཟླ་ ༦ ཚེས་ ༢༡ ཉིན་སྤོན་ཊ་ཆོལ་གསུམ་ས་གནས་འགོ་འཛིན་དུ་གནས་སྤོས། ཕྱི་ལོ་ ༡༩༩༨ ཟླ་ ༤ ཚེས་ ༢༡ ཉིན་མན་སྤར་ས་གནས་འགོ་འཛིན་དུ་གནས་སྤོས། ཕྱི་ལོ་ ༡༩༩༩ ཟླ་ ༣ ཚེས་ ༩ ཉིན་དྲུང་གཞོན་གནས་རིམ་དུ་གནས་སྤར།

ཕྱི་ལོ་ ༢༠༠༣ ཟླ་ ༣ ཚེས་ ༡༢ ཉིན་ཀོ་ལི་གྷལ་ས་གནས་འགོ་འཛིན་དུ་གནས་སྤོས། ཕྱི་ལོ་ ༢༠༠༥ ཟླ་ ༡༢ ཚེས་ ༢༢ ཉིན་ཟུང་དྲུང་གནས་རིམ་དུ་གནས་སྤར། ཕྱི་ལོ་ ༢༠༠༩ ཟླ་ ༡ ཚེས་ ༡༦ ཉིན་དཔལ་འབྱོར་ལས་ཁུངས་སུ་གནས་སྤོས། ཕྱི་ལོ་ ༢༠༡༣ ཟླ་ ༨ ཚེས་ ༢ དྲུང་འཕར་གནས་རིམ་དུ་གནས་སྤར། ཕྱི་ལོ་ ༢༠༡༤ ཟླ་ ༩ ཚེས་ ༡ ཉིན་བོད་ཀྱི་ཟློས་གར་འགན་འཛིན་དུ་གནས་སྤོས། ཕྱི་ལོ་ ༢༠༡༨ ཟླ་ ༡༢ ཚེས་ ༡ ཉིན་ནང་སྲིད་ལས་ཁུངས་ཀྱི་དྲུང་ཆེར་བསྐོ་གཞག་གནང་ཡོད་པ་བཅས། །

Share with your friends










Submit