Published By སྐལ་བཟང་རྒྱ་མཚོ།

ཕྱི་ལོ་ ༢༠༡༨ ཟླ་ ༡༠ ཚེས་༢༦ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༡༠ ཚེས་  ༢༤ ཉིན་ནོར་ཝེ་བོད་ཀྱི་རླུང་འཕྲིན་ཁང་གིས་གནས་ཚུལ་སྤེལ་གསལ་ལྟར་ན།  རྒྱ་ནག་གཞུང་གིས་བོད་གསེར་རྟ་བླ་རུང་སྒར་ཆོས་སྒར་དུ་བདེ་ཆེན་ཞིང་སྒྲུབ་ཆེན་མོ་འཚོགས་ལ་ཉེ་བ་དང་བསྟུན། འདི་ལོ་ཡང་ཁུལ་དེའི་ནང་བདེ་ཆེན་ཞིང་སྒྲུབ་ཀྱི་སྨོན་ལམ་ཆེན་མོ་འཚོགས་མི་ཆོག་པའི་བཀའ་རྒྱ་བཏང་འདུག  བཞུགས་སྒར་རྡ་སར་རྟེན་གཞི་བྱས་པའི་ Tibet Watch བོད་གནས་ལྟ་ཞིབ་ཁང་ལ་རག་སོན་བྱུང་བའི་བཀའ་རྒྱའི་ནང་གསེར་རྟ་བླ་རུང་དགོན་དོ་དམ་ཨུ་ཡོན་ལྷན་ཁང་དང་གསེར་རྟ་ལྔ་རིག་ནང་བསྟན་སློབ་གླིང་ཨུ་ཡོན་ལྷན་ཁང་།  གསེར་རྟ་རྫོང་མི་རིགས་ཆོས་ལུགས་ལས་དོན་ཅུས་བཅས་ཀྱི་བླ་རུང་དགོན་པའི་ ༢༠༡༨ ལོར་བདེ་ཆེན་ཞིང་སྒྲུབ་ཆེན་མོ་ཚོགས་པའི་ཐད་ཀྱི་སྤྱི་བསྒྲགས་ཤིག་སྤེལ་བ་བརྒྱུད་གསེར་རྟ་བླ་རུང་སྒར་གྱི་གྲྭ་བཙུན་ཚོས་འདི་ལོ་ཡང་ཁུལ་དེའི་ནང་བདེ་ཆེན་ཞིང་སྒྲུབ་ཀྱི་སྨོན་ཆེན་མོ་འཚོགས་མི་ཆོག་པ་གསལ་འདུག་པ་དང་།  གསེར་རྟ་བླ་རུང་ཆོས་སྒར་རང་གི་གྲྭ་བཙུན་ཚོས་ངོས་ནས་ཆོས་གསུང་ཆོག་ཀྱང་ཕྱི་ཕྱོགས་ཀྱི་གྲྭ་བཙུན་དང་ཆོས་ཞུ་བ་རྣམས་གསེར་རྟ་བླ་རུང་སྒར་དུ་ཕེབས་མི་ཆོག་པར་ནན་བརྗོད་བྱས་འདུག   ལོ་ལྟར་གསེར་རྟ་བླ་རུ་སྒར་དུ་འཚོགས་སྲོལ་ཡོད་པའི་བདེ་ཆེན་ཞིང་སྒྲུབ་ཀྱི་སྨོན་ལམ་ཆེན་མོ་ནི། བོད་ཟླ་ ༩ ཚེས་ ༢༢ ལྷ་བབ་དུས་ཆེན་ཉིན་འཁེལ་གྱི་ཡོད་པ་དང་།  དེ་ནི་གསེར་རྟ་བླ་རུང་སྒར་དུ་ཆོས་ཚོགས་ཆེན་མོ་བཞི་འཚོགས་སྲོལ་ཡོད་པའི་ཁྲོད་ནས་མི་ཚོགས་འདུ་འཛོམས་ཆེ་ཤོས་ཤིག་ཡིན་པ་མ་ཟད། སྨོན་ལམ་ཆེན་མོ་དེ་བོད་ཟླ་ ༩ ཚེས་ ༢༢ ནས་འགོ་འཛུགས་ཀྱིས་ཉིན་གྲངས་བརྒྱད་ཙམ་རིང་འཚོགས་ཀྱི་ཡོད་པ་དང་། ཆོས་ཞུ་བ་ཚོས་ངོས་ནས་གཙོ་བོ་སངས་རྒྱས་འོད་དཔག་མེད་ཀྱི་གཟུངས་སྔགས་འབུམ་ཕྲག་མང་པོ་གསུང་འདོན་གནང་བའི་དུས་ཆེན་ཁྱད་པར་བ་ཞིག་ཡིན་པ་རེད།

གསེར་རྟ་བླ་རུང་སྒར་དུ་དེ་སྔ་ ༢༠༡༦ ལོར་རྒྱ་གཞུང་གིས་བཙན་དབང་འོག་གྲྭ་བཙུན་རྣམས་ཀྱི་གྲྭ་ཤག་གཏོར་བཤིག་དང་ཁོང་རྣམ་པ་དགོན་པ་ནས་ཕྱིར་འབུད་བཏང་། དེ་ནས་བཟུང་ད་བར་བླ་རུང་སྒར་དུ་ལོ་ལྟར་འཚོགས་སྲོལ་ཡོད་པའི་བདེ་ཆེན་ཞིང་སྒྲུབ་ཀྱི་སྨོན་ལམ་འཚོགས་རྒྱུར་བཀག་སྡོམ་བྱས་པ་ཐེངས་གསུམ་པ་དེ་ཆགས་ཡོད་པ་རེད།།

 

Share with your friends










Submit