Published By བ་ར་ཡེ་ཤེས་ཀུན་གྲགས།

ཕྱི་ལོ་ ༢༠༡༨ ཟླ་ ༩ ཚེས་ ༢༢ རེས་གཟའ་སྤེན་པ།

༄༅། །ཨོ་གླིང་རི་སྔོན་པོར་གནས་སྡོད་ས་གནས་བོད་མི་ཚོས་འབོད་སྐུལ་ཐེངས་མང་ཞུས་པ་བརྒྱུད་ལོ་རྗེས་མའི་གསུམ་བཅུའི་དུས་དྲན་ནས་བཟུང་ཨོ་སི་ཊོ་ལི་ཡའི་རི་སྔོན་པོ་ཁུལ་གྱི་གྲོང་ཁྱེར་སྤྱི་ཁྱབ་ལྷན་ཁང་གི་སྒོ་ཁར་བོད་ཀྱི་རྒྱལ་དར་སྒྲེང་འཛུགས་གནང་གཏན་འཁེལ་ཡོད་འདུག

ཟླ་འདིའི་ཕྱི་ཚེས་༢༠ ཉིན་ཨོ་སི་ཀྲོ་ལི་ཡའི་རི་སྔོན་པོ་ས་གནས་ཀྱི་གཞུང་འབྲེལ་གསར་ཁང་གིས་གནས་ཚུལ་སྤེལ་བའི་ནང་། ཕྱི་ལོ་ ༢༠༡༩ ཟླ་༣ ཚེས་ ༡༠ ཉིན་ཏེ་བོད་ནང་རང་དབང་སྒེར་ལངས་ཆེན་མོ་བྱས་ནས་མི་ལོ་ ༦༠ ཐམ་པ་འཁོར་བའི་དུས་དྲན་ནས་བཟུང་བོད་མི་རྣམས་ལ་རྒྱབ་སྐྱོར་མཚོན་སླད་ལོ་ལྟར་གསུམ་བཅུའི་དུས་དྲན་སྐབས། རི་སྔོན་པོའི་གྲོང་ཁྱེར་སྤྱི་ཁྱབ་ལྷན་ཁང་གི་སྒོ་རུ་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་གཏན་འཁེལ་བྱུང་བ་གསལ་བསྒྲགས་གནང་ཡོད་འདུག

དེ་ཡང་ས་གནས་གཞུང་འབྲེལ་གྱི་གསར་ཁང་གིས་སྤེལ་བའི་གནས་ཚུལ་ནང་རྒྱ་ནག་གིས་བོད་ནང་བཙན་འཛུལ་བྱས་པར་བོད་མིས་ཡར་ལངས་ངོ་རྒོལ་བྱས་ནས་ལོ་རྗེས་མར་ལོ་ངོ་ ༦༠ འཁོར་བའི་དུས་དྲན་འཁེལ་གྱི་ཡོད་སྟབས། དུས་དྲན་སྲུང་བརྩི་ཞུ་ཆེད་རི་སྔོན་པོ་ས་གནས་སྲིད་གཞུང་གི་ཐོག་ཁར་བོད་ཀྱི་རྒྱལ་དར་སྒྲེང་འཛུགས་བྱ་རྒྱུ་ཡིན་ཞེས་འཁོད་འདུག་པ་དང་། དེ་བཞིན་ལོ་རྗེས་མ་ནས་འགོ་འཛུགས་ཏེ་སླད་ཕྱིན་ཕྱི་ཟླ་ ༣ ཚེས་ ༡༠ ནམ་ཡིན་ལ་མུ་མཐུད་བོད་ཀྱི་རྒྱལ་དར་སྒྲེང་འཛུགས་བྱ་རྒྱུ་ཡིན་པ་དང་། དེ་ནི་རི་སྔོན་པོ་ས་ཁུལ་དུ་གནས་སྡོད་བྱེད་མཁན་བོད་པ་རྣམས་ཚུད་པའི་སྐྱབས་བཅོལ་བོད་པ་རྣམས་ལ་རྒྱབ་སྐྱོར་ཡོད་པ་བསྟན་ཕྱིར་ཡིན་སྐོར་འཁོད་འདུག་པ་མ་ཟད། བོད་རྒྱལ་དར་སྒྲེང་འཛུགས་བྱ་རྒྱུ་དེ་ས་གནས་སྲིད་གཞུང་གི་འཐུས་མི་རྣམས་སྤྱི་མོས་ཀྱི་ཐོག་ནས་འོས་འདེམས་བྱུང་ཡོད་སྐོར་འཁོད་འདུག

གནད་དོན་འདིའི་ཐོག་ས་གནས་སྲིད་གཞུང་གི་འཐུས་མི་བྷོ་རོན་གྱིས་བོད་པ་རྣམས་ཡ་མཚན་ཅན་གྱི་རིག་གཞུང་གིས་ཕྱུག་པའི་མི་རིགས་ཤིག་ཡིན་སྟབས། ཁོང་ཚོས་ངོ་རྒོལ་ལས་འགུལ་སྤེལ་དུས་ཁྲོ་བའི་ཐོག་ནས་མིན་པར། ཞི་འཇམ་གྱི་ངང་ནས་བྱེད་ཀྱི་ཡོད་དུས་རྒྱ་ནག་གི་བཙན་འཛུལ་འོག་ནས་ཁོང་ཚོས་ཇི་ལྟར་མྱོང་གི་ཡོད་མེད་མི་མང་པོ་ཞིག་གིས་ཤེས་རྟོགས་ཐུབ་ཀྱི་མེད་ཅེས་དང་། གལ་ཏེ་རྒྱ་ནག་གིས་རི་སྔོན་པོ་ས་གནས་དང་ཚོང་འབྲེལ་ག་འདྲ་ཞིག་ཕྱིར་འཐེན་བྱས་ནའང་། བོད་མིར་འགྲོ་བ་མིའི་ཐོབ་ཐང་རག་གི་མེད་པ་ངོས་འཛིན་བྱ་རྒྱུ་ནི་འགྲིག་པ་ཞིག་རེད་ཅེས་བརྗོད་འདུག །

Share with your friends










Submit