ཕྱི་ལོ་ ༢༠༡༨ ཟླ་ ༩ ཚེས་ ༡༨ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༩ ཚེས་ ༡༥ ཉིན་རྒྱ་གར་གྱི་བློན་ཆེན་ཟུར་པ་དང་གྲོས་ཚོགས་འཐུས་མི་སྐུ་ཞབས་སཏྱ་པྲ་ཀཤ་མལ་ཝི་ཡ་ Satya Prakash Malviya མཆོག་དགུང་གྲངས་ ༨༤ ཐོག་འདས་གྲོངས་སུ་འགྱུར་བའི་ཡིད་སྐྱོའི་གནས་ཚུལ་ཐོན་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དམ་པ་ཁོང་གི་བུ་མོར་ཐུགས་གསོ་གནང་བའི་ནང་འཁོད་དོན། སྐུ་ཉིད་ཀྱི་པཱ་ལགས་འདས་གྲོངས་སུ་འགྱུར་བའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་གདུང་སེམས་མཉམ་སྐྱེ་ཞུ་རྒྱུ་ཡིན་ཞེས་དང་། དམ་པ་ཁོང་ནི་འདས་པའི་ལོ་ངོ་བཅུ་ཕྲག་ཁ་ཤས་ནས་བཟུང་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་མ་ཟད། གོ་སྐབས་ནམ་བྱུང་ལ་བོད་ཀྱི་རྩ་དོན་དང་འབྲེལ་ནས་ལས་འགུལ་སྤེལ་མཁན་ཞིག་ཡིན་པར་བརྟེན། ད་ལན་ཁོང་འདས་གྲོངས་སུ་འགྱུར་བ་ནི་བོད་མི་ཚོར་གྱོང་གུན་ཤུགས་ཆེ་ཕོག་ཡོད་པ་དང་། དམ་པ་ཁོང་གི་ཆེད་དུ་སྨོན་ལམ་དང་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་འཁོད་ཡོད་པ་བཅས། །