༢༠༡༥ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་བའི་གནས་ཚུལ་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་རྒྱལ་ས་སྦེང་ལོར་ནང་རྟེན་གཞི་བྱས་པའི་རྒྱལ་ཁབ་འདྲ་མིན་གྱི་གཞུང་ལས་ཁང་དང་ཚན་རིག་བསྟི་གནས་ཁང་བཅས་ཀྱི་དབུ་འབྱེད་མཛད་སྒོའི་ཐོག་ཆིབས་བསྒྱུར་བསྐྱངས་ཏེ་མང་ཚོགས་རྣམས་ལ་ལམ་སྟོན་བཀའ་སློབ་སྩལ་གནང་མཛད་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་༸གོངས་༸སྐྱབས་མགོན་ཆེན་པོ་མཆོག་གིས་རྒྱལ་ས་སྦེང་ལོར་ནང་གྲགས་ཆེ་བའི་ཤེ་རཱ་ཊོན་ཝིན་སི་ཊོན་ ITC Windsor Hotel མགྲོན་ཁང་གི་ཚོགས་ཁང་ཆེན་མོའི་ནང་ Diplomatic Consular Corps Karnataka ཞེས་པའི་ཀར་ནཱ་ཊ་ཀ་མངའ་སྡེའི་རྒྱལ་ས་སྦེང་ལོར་ནང་རྒྱལ་ཁབ་ཁག་འདྲ་མིན་གྱི་གཞུང་ཚབ་ཡན་ལག་ལས་ཁུངས་ཀྱི་དོན་གཅོད་པ་མང་དག་ཅིག་མཉམ་འཛོམས་ཀྱི་ཚོགས་ཆེན་དབུ་འབྱེད་མཛད་སྒོའི་ཐོག་མགོན་པོ་གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་ཆིབས་བསྒྱུར་བསྐྱངས་ཏེ་འཇིག་རྟེན་ཀུན་ཁྱབ་འགན་ཁུར་དང་བྱམས་བརྩེའི་སྐོར་བཀའ་སློབ་སྩལ།
སྐབས་དེར་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། ༸རྒྱལ་བའི་གསུང་འབུམ་ཕྱོགས་སྒྲིག་སྡེ་ཚན་གྱི་འགན་འཛིན་སེར་སྨད་ཡང་སྟེང་རིན་པོ་ཆེ་མཆོག ཨོ་སི་ཊོ་རི་ཡར་བཅའ་བཞུགས་གཉན་རྩེ་སྤྲུལ་སྐུ་བློ་བཟང་དམ་ཆོས་ལགས། དེ་བཞིན་རྒྱལ་ཁབ་ ༢༠ ཙམ་གྱི་གཞུང་འབྲེལ་གནད་ཡོད་མི་སྣ་བཅས་ཁྱོན་གྲངས་ ༢༠༠ ལྷག་ཙམ་མཉམ་ཞུགས་གནང་ཡོད། ཐོག་མར་ཕ་རན་སིའི་གཞུང་ཚབ་ཁང་གི་སྐུ་ཞབས་ཨ་ན་ཏོ་ལེ་ཁུ་ཤུ་ཕེ་ཏ་ Anatole Kuschpeta from France ལགས་ཀྱིས་་གོང་ས་མཆོག་ལ་ཕེབས་བསུའི་གསུང་བཤད་གནང་བ་དང་སྦྲགས། ༸གོང་ས་མཆོག་གིས་སྣང་གསལ་ཞལ་ཕྱེས་མཛད་གྲུབ་མཚམས། བྷོ་སི་ནི་ཡ་དང་ཧར་ཛེ་གོ་ཝི་ནའི་གཞུང་ཚབ་སྐུ་ཞབས་ས་བྷི་ཏི་སུ་བྷ་སིཀ་ HE Sabit Subasic, Ambassador of Bosnia & Herzegovina ལགས་ཀྱིས་ཚོགས་བཅར་བ་ཡོངས་ལ་༸གོང་ས་མཆོག་ངོ་སྤྲོད་ཞུས།
དེ་རྗེས་མགོན་པོ་གང་ཉིད་མཆོག་གིས་མང་ཚོགས་རྣམས་ལ་ལམ་སྟོན་བཀའ་སློབ་ཕེབས་པའི་ནང་། འཛམ་གླིང་འདིའི་སྟེང་མི་འབོར་ཐེར་འབུམ་བདུན་ཡོད་པ་རྣམས་ཚང་མ་མ་ལས་སྐྱེས་པ་གཅིག་མཚུངས་ཡིན་སྟབས་འགྲོ་བ་མི་རིགས་ཡོངས་རྫོགས་མི་གཅིག་འགྱུར་ཡིན་པའི་འདུ་ཤེས་ངེས་པར་དུ་འཛིན་དགོས་པ་ལས་དེ་ལས་ལྡོག་ཏེ་དབུལ་ཕྱུག་དང་ཤེས་ཡོན་ལྡན་མིན། ཐོབ་གོ་ས་མཐོ་དམའ། རྒྱལ་ཁབ་མི་འདྲ་བའི་སོགས་ཁྱད་པར་ཁོ་ནར་གཙིགས་ཆེར་འཛིན་པའི་རྙིང་ཞེན་གྱི་བསམ་བློ་དེར་གཙོ་བཟུང་ཐོག་ནས་ཕྱིན་པའི་དབང་གིས་དེང་སྐབས་འཛམ་གླིང་སྟེང་དཀའ་ངལ་དང་རྙོག་གྲ་ཡོང་གི་ཡོད་པ་དང་། དེ་བཞིན་ང་ཚོས་དཀའ་ངལ་ཡོད་ཚད་མིས་བཟོས་པར་བརྟེན་དཀའ་ངལ་དེ་དག་སེལ་ཐབས་ཀྱང་མིས་བྱེད་དགོས་པ་ལས་དཀོན་མཆོག་ལ་སྐྱབས་བཅོལ་ནས་སེལ་ཐུབ་རྒྱུ་ཟེར་བ་ཧ་ཅང་ཁག་པོ་རེད། ཤེས་ཡོན་སློབ་གསོ་སྤྲད་དེ་དཀའ་ངལ་དེ་དག་སེལ་ཐབས་བྱེད་དགོས། ཆོས་ལུགས་ནང་ཁུལ་བརྩི་བཀུར་བྱས་ན་མཐུན་སྒྲིལ་ཡོང་རྒྱུ་ཡིན་སྟབས་ཆོས་ལུགས་ཕན་ཚུན་དབར་གུས་ཞབས་དང་བསམ་ཤེས་དགོས་པ་ཧ་ཅང་གལ་ཆེ་ཡིན་སྐོར། བྱམས་བརྩེ་དང་བཟོད་སྒོམ་སོགས་ནི་ཆོས་ལུགས་ཚང་མས་ཉམས་ལེན་གཅིག་མཚུངས་ཡིན་པ་མ་ཟད། དོན་དངོས་ཆོས་ལུགས་གང་དང་གང་ཞིག་ཡིན་རུང་ཆོས་ཕྱོགས་ཀྱི་བྱེད་སྒོ་གཅིག་གཅིག་པུ་ཉམས་ལེན་བྱས་པ་དང་དཀོན་མཆོག་ལ་སྨོན་ལམ་འདེབས་པ་ཙམ་མིན་པར་ཆོས་ལ་སློབ་སྦྱོང་གནང་སྟེ་མཐར་དངོས་སུ་ཉམས་ལེན་གནང་ཐུབ་པ་ཞིག་དགོས་གལ་ཆེན་པོ་ཡིན་སྐོར། དེ་སྔོན་ལོ་ངོ་སྟོང་ཕྲག་མང་པོའི་གོང་རྒྱ་གར་ནང་རྣམ་དཔྱོད་ཀྱི་རྩེར་སོན་པའི་སྐྱེས་ཆེན་དུ་མ་སྐྱེད་བསྲིངས་བྱུང་ཡོད་པ་དང་། དེར་བརྟེན་ད་ལྟའི་བོད་ཀྱི་སྐད་ཡིག་གཅིག་པུའི་ནང་ཉར་ཚགས་ཐུབ་པའི་དཔལ་ནཱ་ལཎྜའི་ཁྱད་དུ་འཕགས་པའི་ཡོན་ཏན་དེ་དག་ལ་སློབ་སྦྱོང་བྱེད་ཐུབ་ན་དགེ་ཚན་ཆེན་པོ་ཡོད་སྐོར་སོགས་ཀྱི་བཀའ་སློབ་བསྩལ་རྗེས་མང་ཚོགས་ཀྱི་དྲི་བ་ཁག་ལ་བཀའ་ལན་སྩལ་ཏེ་ལས་རིམ་མཇུག་སྒྲིལ།
