༢༠༡༥ ཟླ་ ༧ ཚེས་ ༤ རེས་གཟའ་སྤེན་པ།
༄༅། །བྱང་ཨ་རིའི་བོད་མི་ཚོས་འདི་ལོ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་གྱི་མཛད་སྒོ་སྲུང་བརྩི་ཞུ་སླད་ཕྱི་ཟླ་ ༧ ཚེས་ ༩།༡༠ བཅས་ཉིན་གྲངས་གཉིས་རིང་ཨ་རིའི་གྲོང་ཁྱེར་ནིའུ་ཡོཀ་ཏུ་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག ༸རྒྱལ་བའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུ་གཏན་འཁེལ་ཡོད་སྟབས། མཛད་སྒོའི་ཐོག་མང་གཙོའི་ལམ་ནས་འོས་འདེམས་བྱས་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ལྷན་བཅར་ཞུ་རྒྱུ་མ་ཟད། མཛད་སྒོའི་ཐོག་གསུང་བཤད་ཀྱང་གནང་རྒྱུ་ཡིན་འདུག
སྤྱིར་དཔལ་ལྡན་སྲིད་སྐྱོང་མཆོག་ཕྱི་ལོ་ ༢༠༡༥ ཟླ་ ༧ ཚེས་ ༦ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་༸རྒྱལ་བའི་འཁྲུངས་སྐར་དུས་ཆེན་སྲུང་བརྩིའི་མཛད་སྒོར་བཀའ་ཤག་གི་གསུང་བཤད་གནང་རྒྱུ་སོགས་ཀྱི་ལས་དོན་ཁག་ཡོངས་སུ་མཇུག་སྒྲིལ་རྗེས་ཉིན་རྒྱབ་རྡ་ས་ནས་ག་གྷལ་བརྒྱུད་ལྡི་ལི་དང་། ཕྱི་ཚེས་ ༧ ཉིན་ལྡིལླཱི་ནས་ནེ་ཝཀ་ཏུ་ཕེབས་ཐོན་གྱིས་ཕྱི་ཉིན་ནེ་ཝཀ་ཏུ་ཕེབས་འབྱོར་གནང་རྗེས།
ཕྱི་ཚེས་ ༨ ནས་ ༡༠ བར་གྲོང་ཁྱེར་ནིའུ་ཡོཀ་ཏུ་གཞུང་འབྲེལ་ལས་དོན་གནང་དགོས་ཁག་ལེགས་གྲུབ་རྗེས་ཕྱི་ཚེས་ ༡༡ ཉིན་ནིའུ་ཡོཀ་ནས་ཇར་མན་གྲོང་ཁྱེར་ཕེརེངྐ་ཕོཌ་ཏུ་ཕེབས་ཐོན་གྱིས་ཕྱི་ཚེས་ ༡༢།༡༣ བཅས་ཉིན་གྲངས་གཉིས་རིང་ཇར་མན་གྲོང་ཁྱེར་ཕེརངྐ་ཕོཌ་ཏུ་༸གོང་ས་མཆོག་དབུ་བཞུགས་ཐོག་ཇར་མན་བོད་རིགས་སྤྱི་མཐུན་ཚོགས་པས་གོ་སྒྲིག་འོག་༸གོང་ས་མཆོག་དགུང་གྲངས་ ༨༠ ཕེབས་པའི་སྐུའི་གྱ་སྟོན་གྱི་མཛད་སྒོ་སྲུང་བརྩི་ཞུ་ཆེད་སྐུའི་འཁྲུངས་ལྷ་དབྱར་གསོལ་གྱི་རྟེན་འབྲེལ་མཛད་སྒོ་སོགས་ནང་སྲིད་སྐྱོང་མཆོག་ལྷན་བཅར་ཞུ་རྒྱུ་མ་ཟད། ཕྱི་ཟླ་ ༧ ཚེས་ ༡༤ ཉིན་ས་གནས་ཀྱི་གནམ་ཐང་ནས་དིལླཱི་བརྒྱུད་ཕེབས་ཐོན་གྱིས་ཕྱི་ཚེས་ ༡༥ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག
