༢༠༡༥ ཟླ་ ༧ ཚེས་ ༡ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་འགྲེམས་སྟོན་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་ཁྱད་པར་ཅན་དང་སྟབས་བསྟུན། རྒྱ་གར་བྱང་ཕྱོགས་སྡེ་ར་སྡུན་ཀ་ལི་མན་ཊོན་དང་། རྒྱ་གར་བྱང་ཤར་ཀ་རྡོར་སྒང་གསུམ་ནང་བོད་དང་བོད་མིའི་སྐོར་གྱི་པར་རིགས་འགྲེམས་སྟོན་གནང་རྒྱུ་ཡིན་འདུག
དེ་ཡང་ཐེངས་འདིའི་སྐོར་བསྐྱོད་འགྲེམས་སྟོན་སྐབས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་རྣམ་དང་། བོད་ཀྱི་རྒྱལ་རབས་ལོ་རྒྱུས་ཀྱི་སྣང་བརྙན། བོད་ནང་རང་ལུས་མེར་སྲེག་གཏོང་དགོས་དོན་སོགས་ཀྱི་གནད་དོན་གསུམ་ཐོག་པར་རིགས་འགྲེམས་སྟོན་ཙམ་མ་ཟད་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་རྣམ་དང་བོད་ཀྱི་ལོ་རྒྱུས། དེ་བཞིན་ད་ལྟའི་བོད་ཀྱི་ཛ་དྲག་གནས་སྟངས་སོགས་བོད་དོན་དང་འབྲེལ་བའི་དངོས་བྱུང་གློག་བརྙན་བསྟན་རྒྱུ་ཡིན་འདུག པར་རིགས་འགྲེམས་སྟོན་དང་གློག་བརྙན་གཟིགས་འབུལ་གྱི་ལམ་ནས་མགོན་པོ་གང་ཉིད་དགུང་གྲངས་བརྒྱད་ཅུར་ཕེབས་པའི་སྐུའི་འཁྲུངས་སྐར་ལ་འཚམས་འདྲི་ཞུ་རྒྱུ་དང་། མགོན་པོ་གང་ཉིད་ཀྱིས་གོ་ལའི་སྟེང་སྐྱེ་འགྲོའི་བདེ་ཐབས་སུ་བྱམས་སྙིང་རྗེ་དང་། དེ་བཞིན་འཇིག་རྟེན་ཀུན་ཁྱབ་སེམས་འཁུར་བཅས་ཀྱི་ཐོག་སྔ་ཕྱིར་བཀའ་སློབ་ཕེབས་པ་རྣམས་འགྲེམས་སྟོན་གནང་རྒྱུ་ཡིན་འདུག
སྤྱིར་ཐེངས་འདིའི་འགྲེམས་སྟོན་གྱི་དམིགས་ཡུལ་གཙོ་བོ་ནི། བོད་ཀྱི་ལོ་རྒྱུས་དང་ཐུན་མིན་རིག་གཞུང་ཐོག་གོ་རྟོགས་བསྐྲུན་རྒྱུ་དང་། རྒྱ་གར་བ་ཚོར་ད་ལྟའི་བོད་ནང་གི་ཛ་དྲག་གནས་སྟངས་ཤེས་རྟོགས་ཡོང་སླད་བཅས་ཡིན་འདུག ཐེངས་འདིའི་སྐོར་བསྐྱོད་འགྲེམས་སྟོན་དེ་བཞིན་ཕྱི་ལོ་ ༢༠༡༥ ཟླ་ ༧ ཚེས་ ༥ ཉིན་སྡེ་ར་སྡུན་ཀལ་མན་ཊོན་དང་། ཕྱི་ཚེས་ ༧ ནས་ ༨ བར་རྡོར་རྗེ་གླིང་། ཕྱི་ཚེས་ ༡༢ ནས་ ༡༣ བར་ཀ་སྦུག ཕྱི་ཚེས་ ༡༧ ནས་ ༡༩ བར་སྒང་ཏོག་བཅས་ལ་འགྲེམས་སྟོན་གནང་འཆར་ཡོད་འདུག་པ་བཅས། །
