༢༠༡༥ ཟླ་ ༧ ཚེས་ ༣ རེས་གཟའ་པ་སངས།
༄༅། །ཐེ་ཝན་རྒྱལ་སྤྱིའི་བོད་བརྒྱུད་ནང་པའི་མཐུན་ཚོགས་དང་ཐེ་ཝན་སྐུ་ཚབ་དོན་ཁང་གཉིས་ཀྱིས་གོ་སྒྲིག་འོག་ཕྱི་ཟླ་ ༧ ཚེས་ ༢ ནས་ ༥ བར་ཉིན་གྲངས་བཞིའི་རིང་རྒྱལ་ས་ཐེ་པེའི་ནང་གི་གྲོང་ཁྱེར་ཚོགས་ཁང་ཞེས་པའི་ནང་དུ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་འགྲེམས་སྟོན་གོ་སྒྲིག་གནང་ཡོད། སྐུ་པར་དེ་དག་དགའ་ལྡན་ཕོ་བྲང་ཡིག་ཚང་གི་པར་པ་བསྟན་འཛིན་ཆོས་འབྱོར་ལགས་དང་། ཉི་ཧོང་སྐུ་ཚབ་དོན་ཁང་གི་པར་པ་སྐུ་ཞབས་མ་ས་ཡ་ནོ་ཌ་ Mr. Masaya Noda ལགས།
དེ་བཞིན་ཐེ་ཝན་སྐུ་ཚབ་དོན་ཁང་གི་པར་པ་སྐུ་ཞབས་ལིའོ་ཡང་ཏིང་ Mr. Liu Yanting ལགས་བཅས་ཀྱིས་བསྒྲོན་པའི་པར་རིགས་གྲངས་ ༡༠༠ ལྷག་ཡོད་འདུག དེ་ཡང་པར་རིགས་འགྲེམས་སྟོན་གནང་རྒྱུའི་གསར་འགོད་གསལ་བསྒྲགས་སྤེལ་རྗེས་ལས་འགོ་དབུ་འཛུགས་གནང་བ་ཞིག་ཡིན་པ་དང་། དེ་བཞིན་༸གོང་ས་ཏཱ་ལའི་བླ་མ་མཆོག་གི་བཀའ་ལ་ཉན་པ། ཞེས་ཐེ་ཝན་སྐུ་ཚབ་དོན་ཁང་གིས་པར་བསྐྲུན་ཞུས་པའི་དཔེ་དེབ་གསར་པ་ཞིག་དེ་སྔའི་སྐུ་ཚབ་དོན་ཁང་གི་ཆོས་དགེ་ཟུར་པ་དགེ་བཤེས་བྱམས་པ་རྒྱ་མཚོ་ལགས་ཀྱིས་དབུ་འབྱེད་གནང་འདུག ཐེངས་འདིར་པར་རིགས་འགྲེམས་སྟོན་ནང་པེ་ཅིང་དུ་གནས་ཞུགས་བོད་པའི་བུད་མེད་རྩོམ་པ་པོ་དང་དྲ་ཐོག་ཟིན་བྲིས་འགོད་མཁན་གྲགས་ཅན་འོད་ཟེར་ལགས་ཀྱིས་བརྒྱབ་པའི་པར་རིགས་ཁག་གཅིག་ཀྱང་འགྲེམས་སྟོན་ནང་ཡོད།
དེ་ཡང་ཐེངས་འདིར་༸གོང་ས་མཆོག་གི་སྐུ་པར་འགྲེམས་སྟོན་གོ་སྒྲིག་ཞུ་དགོས་པའི་རྒྱུ་མཚན་གཙོ་བོ་ནི། འདི་ལོར་༸གོང་ས་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་སྲུང་བརྩི་ཞུ་ཆེད་ཡིན་འདུག སྤྱིར་ཐེ་ཝན་ནང་༸སྐུའི་འཁྲུངས་སྐར་དུས་ཆེན་ཕྱི་ཟླ་ ༧ ཚེས་ ༥ ཉིན་སྲུང་བརྩི་ཞུ་རྒྱུ་ཡིན་འདུག་པ་དང་།
ཕྱི་ཚེས་ ༤ ཉིན་ཐེ་ཝན་རྒྱལ་སྤྱིའི་བོད་བརྒྱུད་ནང་པའི་མཐུན་ཚོགས་ཀྱིས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཆེད་སྨོན་ལམ་རྒྱས་པ་ཞིག་ཚོགས་གཏན་འཁེལ་འདུག
