༢༠༡༥ ཟླ་ ༦ ཚེས་ ༡༦ རེས་གཟའ་མིག་དམར།
༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་ནང་བདུན་ཕྲག་གཉིས་རིང་གི་མཛད་འཕྲིན་ཁག་ལེགས་པར་གྲུབ་སྟེ། །ཕྱི་ལོ་ ༢༠༡༥ ཟླ་ ༦ ཚེས་ ༡༦ ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཡོལ་ཙམ་ཐོག་བཞུགས་སྒར་རྡ་རམ་ས་ལར་ྋཞབས་སོར་བདེ་བར་འཁོད་ཡོད།
དེ་ཡང་༸གོང་ས་མཆོག་ཨོ་སི་ཊོ་ལི་ཡའི་ཁུལ་དུ་བདུན་ཕྲག་གཉིས་རིང་མི་མང་ཁྲི་གཉིས་ལྷག་ལ་ཆོས་འབྲེལ་དང་བླང་དོར་བཀའ་སློབ་སོགས་མཛད་འཕྲིན་ཆེ་ཁག ༡༣ ལྷག་ཙམ་ཞིག་བསྐྱངས་ཡོད། ྋགོང་ས་མཆོག་ཕྱི་ཟླ་ ༦ ཚེས་ ༣ ཉིན་བཞུགས་སྒར་ནས་ཆིབས་སྒྱུར་བསྐྱངས་ཏེ་ཕྱི་ཚེས་ ༤ ཉིན་ཨོ་སི་ཊོ་ལི་ཡར་༸ཞབས་སོར་འཁོད་དེ་ཕྱི་ཚེས་ ༡༥ བར་ ཨོ་སི་ཊོ་ལི་ཡའི་ས་ཁུལ་ཁག་བཞིའི་ནང་དད་ལྡན་མང་ཚོགས་ལ་ཆོས་འབྲེལ་དང༌། སློབ་ཕྲུག་དང་མི་མང་ལ་བརྗོད་གཞི་འདྲ་མིན་ཐོག་བཀའ་སློབ། ལྷན་ཚོགས་ཁག་གི་ནང་དབུ་བཞུགས་སོགས་ཀྱི་མཛད་འཕྲིན་རྒྱ་ཆེ་ཞིག་བསྐྱངས་ཡོད།
མཛད་འཕྲིན་གྱི་ཐོག་མར་ཨོ་སི་ཊོ་ལི་ཡའི་བྷི་ལིའུ་མ་འོན་ཊེནསི་(Blue mountains)ཞེས་པའི་གྲོང་ཁྱེར་གྱི་མཐའ་མཚམས་ས་ཁུལ་ལིའུ་ར་ ཞེས་པར་ཉིན་གྲངས་ལྔའི་རིང་དཔལ་རྡོ་རྗེ་འཇིགས་བྱེད་ཀྱི་བཀའ་དབང་བཀྲིན་སྩལ་ཡོད། སྐབས་དེར་ཨོ་སི་ཊོ་ལི་ཡའི་བོད་རིགས་སྤྱི་མཐུན་ཚོགས་པས་མགོན་པོ་གང་ཉིད་མཆོག་ལ་བརྟན་ཞུགས་བསྟར་འབུལ་ཞུས་ཡོད། བརྟན་ཞུགས་འབུལ་མཁན་ཁོངས་སུ་ཨོ་སི་ཊོ་ལི་ཡའི་ནང་གི་བོད་རིགས་སྤྱི་མཐུན་ཚོགས་པ་བརྒྱད་གཙོ་བོར་གྱུར་བའི་ཝེ་ཊི་ནམ་མི་རིགས། འབྲུག་པ། སོག་པོ་བཅས་ཡོད་འདུག སྐབས་དེར་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པས་བོད་ཀྱི་རྩ་དོན་དང་འབྲེལ་བའི་དམ་བཅའ་ཁག་ལྔ་དང་དེ་བཞིན་ལས་བསྡོམས་ཤིག་ཀྱང་སྤྱན་འབུལ་ཞུས་པར། ྋགོང་ས་མཆོག་གིས་དམ་བཅའ་དེ་རྣམས་རེ་རེ་བཞིན་ལྗགས་ཀློག་དང་སྦྲགས། དེ་འབྲེལ་བཀའ་སློབ་རིམ་པ་སྩལ་ཡོད། བརྟན་བཞུགས་སྐབས་བོད་རིགས་གཙོ་བོར་གྱུར་བའི་ཁྱོན་ཆོས་ཞུ་བ་མི་གྲངས་ ༡༦༠༠ ཙམ་བཅར་འདུག
དེ་བཞིན་ྋགོང་ས་མཆོག་གིས་རྒྱ་རིགས་ཤེས་ཡོན་ཅན་ཁག་གཅིག་ལ་མཇལ་ཁ་དང་བཀའ་སློབ་སྩལ་ཡོད་པ་མ་ཟད། གྲོང་ཁྱེར་ཀ་ཊུམ་བྷ་ཞེས་པའི་ས་གནས་ཀྱི་སློབ་གྲྭ་ཞིག་ལ་ཆིབས་སྒྱུར་བསྐྱངས་ནས་སློབ་ཕྲུག་དང༌། མང་ཚོགས་ ༣༦༠༠ ལྷག་ལ་བཀའ་སློབ་སྩལ།
དེ་རྗེས་ྋགོང་ས་མཆོག་གིས་སི་ཌི་ནི་གྲོང་ཁྱེར་ནང་བདེ་སྐྱིད་དང་དེའི་འབྱུང་རྩ་ཞེས་པའི་བགྲོ་གླེང་ལྷན་ཚོགས་སུ་དབུ་ཞུགས་མཛད་པ་དང༌། ཨོ་སི་ཊོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ལྷན་ཉིན་གུང་ལྗགས་སྨིན་ལྷན་བཞེས་མཛད་ཡོད།
དེ་ནས་བྷི་རི་སི་བྷེན་གྲོང་ཁྱེར་ནང་དད་ལྡན་མང་ཚོགས་༢༥༠༠ བརྒལ་བར་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་དང༌། བྱང་ཆུབ་སེམས་འགྲེལ་གྱི་ཆོས་འབྲེལ་སྩལ། གྲོང་ཁྱེར་དེའི་ཡེ་ཤུའི་ལྷ་ཁང་ཞིག་དུ་ཆོས་ལུགས་སྣ་ཚོགས་ཀྱི་མི་སྣ་ལྷན་འཛོམས་ཐོག་འཛམ་གླིང་ཞི་བདེའི་ཆེད་སྨོན་ལམ་གསུང་འདོན་གྱི་མཛད་སྒོའི་ཐོག་དབུ་བཞུགས་དང་བཀའ་སློབ་སྩལ།
དེ་བཞིན་མང་ཚོགས་ལ་སྙིང་རྗེ་ཉམས་ལེན་གྱི་རྣམ་དཔྱོད་ཅེས་པའི་བརྗོད་གཞིའི་ཐོག་བཀའ་སློབ་སྕལ་བ་མ་ཟད། ཁུལ་དེར་གནས་སྡོད་བོད་རིགས་དང་། འབྲུག་པ། སོག་པོའི་མི་རིགས་བཅས་མི་གྲངས་ ༣༠༠ ཙམ་ལ་ཟུར་མཇལ་དང་བཀའ་སློབ་སྩལ་ཡོད།
དེ་ནས་ཨོ་སི་ཊོ་ལི་ཡའི་བྱང་ཕྱོགས་ཁུལ་དུ་གདོད་མའི་མི་རིགས་ཀྱི་རྩ་ཆེའི་གནས་རི་ཨུ་ལུ་རུ་ཞེས་པའི་བྲག་རི་ཞིག་ཡོད་པ་དེར་གནས་གཟིགས་སུ་ཕེབས་ནས་ཁུལ་དེའི་གདོད་མའི་མི་རིགས་ཁག་གཅིག་དང་ལྷན་མཇལ་འཕྲད་དང་བཀའ་སློབ་སྩལ། དེ་རྗེས་ཨོ་སི་ཊོ་ལི་ཡའི་ནུབ་ཕྱོགས་ཀྱི་པཱར་ཐ་ས་གནས་སུ་མང་ཚོགས་སྟོང་ཚོ་བརྒལ་བར་བདེ་སྐྱིད་ལྡན་པའི་སྤྱི་ཚོགས་ཤིག་བསྐྲུན་རྒྱུར་ནང་སེམས་ཀྱི་རིན་ཐང་གོང་སྤེལ་གཏོང་དགོས་པ་དང༌། ད་ལྟའི་ཤེས་ཡོན་གྱི་ལམ་ལུགས་ནང་ཕྱི་དངོས་པོ་ཡར་རྒྱས་དེ་རྩིགས་ཆེར་འཛིན་བཞིན་ཡོད་པས། ནང་སེམས་ཀྱི་རིན་ཐང་གོང་སྤེལ་གཏོང་ཆེད་དུ་ཤེས་ཡོན་གྱི་ལམ་ལུགས་ནང་སློབ་གསོ་ཇི་དགོས་ཐབས་ལམ་འཚོལ་གྲུབ་བྱེད་དགོས་པ་ཕེབས་འདུག སྐབས་དེར་ཨོ་སི་ཊོ་ལི་ཡའི་མི་མང་ ༢༠༠༠ གིས་ྋགོང་ས་མཆོག་ལ་འཚམས་འཕྲིན་འཁོད་པའི་དཔེ་དེབ་ཕྱོགས་སྒྲིག་བྱས་པ་ཞིག་ཕྱག་རྟགས་སུ་འབུལ་ལམ་ཞུས་པ་དང༌། དེར་འདུས་པའི་མང་ཚོགས་སྟོང་ཚོ་བརྒལ་བས་ྋགོང་ས་མཆོག་གི་འཁྲུངས་སྐར་ལ་འཚམས་འདྲི་ཞུས་འདུག
ཕྱི་ཚེས་ ༡༥ ཉིན་ས་གནས་གྱི་བརྙན་འཕྲིན་ལས་ཁང་ཞིག་གིས་བཅར་འདྲིར་དྭངས་ལེན་མཛད་པ་དང༌། དེ་ནས་བོད་རིགས་ཁག་གཅིག་ལ་ཟུར་མཇལ་དང་བཀའ་སློབ་སྩལ།
དེ་རྗེས་ནུབ་ཨོ་སི་ཊོ་ལི་ཡའི་གཙུག་ལག་སློབ་གྲྭ་ཆེན་མོར་སློབ་ཕྲུག ༧༠༠ ལྷག་ལ་ཤེས་ཡོན་དང་སྤྱི་ཚོགས་ལ་ཞབས་ཞུ་སྒྲུབ་ཕྱོགས་སྐོར་བཀའ་སློབ་སྩལ་འདུག དེ་བཞིན་ཨོ་སི་ཊོ་ལི་ཡ་དང་ཨི་ཛི་རེལ་ཚོང་ལས་མཐུན་ཚོགས་ནས་ྋགོང་ས་མཆོག་ལ་ཉིན་གུང་ལྗགས་སྨིན་འདེགས་འབུལ་ཞུས་པ་དང༌། སྐབས་དེར་བཅར་བའི་ཚོགས་མི་སོགས་མི་གྲངས་ ༦༥༠ ཙམ་ལ་ྋགོང་ས་མཆོག་གིས་གང་ཉིད་ཀྱི་སྐུ་ཚེའི་མཛད་འགན་གཙོ་བོ་གསུམ་པོ་ངོ་སྤྲོད་མཛད་འདུག དེ་ནས་འབྲུག་པ་དང་སོག་པོའི་མི་རིགས་ཡིན་པ་མི་གྲངས་ ༧༠༠ ཙམ་ལ་ཟུར་མཇལ་བཅས་སྩལ་ནས་ཐེངས་འདིའི་མཛད་འཕྲིན་ཁག་ལེགས་པར་གྲུབ་ཡོད་ཅིང་།
དེ་རིང་ཕྱེད་ཡོལ་ཆུ་ཚོད་ ༢ ཐོག་ག་གྷལ་གནམ་ཐང་དུ་༸ཞབས་སོར་འཁོད་སྐབས། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་གཞུང་འབྲེལ་མིན་པའི་ཚོགས་པའི་སྐུ་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཆིབས་འགྲོ་བརྒྱུད་བཞུགས་སྒར་དུ་ཆིབས་སྒྱུར་བསྐྱངས་སྐབས། རྡ་སའི་མི་མང་སོགས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས་སོགས་ཐོགས་ཏེ་ཕེབས་བསུ་དང་། ཕོ་བྲང་གི་རྒྱལ་སྒོའི་ནང་ཁྲིམས་ཞིབ་པ་ཆེ་བ་མཆོག་གིས་གཙོས་ཁྲིམས་ཞིབ་པ་གཞན་གཉིས་མཆོག་དང་། བོད་མི་མང་སྤྱི་འཐུས་ཚོགས་གཞོན་མཆོག་གིས་དབུས་སྤྱི་འཐུས་རྒྱུན་ལས་རྣམ་པ་དང་བཀའ་བློན་རྣམ་པ་བཅས་སོགས་ཕེབས་བསུར་བཅར་འདུག
