༢༠༡༥ ཟླ་ ༦ ཚེས་ ༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༦ ཉིན་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་བདམས་ཐོན་འོས་བསྡུའི་འགན་འཛིན་ལས་འཕར་རྣམ་གཉིས་ཀྱི་ལས་ཁུར་དམ་འབུལ་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༢༥ ཐོག་ཁྲིམས་ཞིབ་པ་ཆེ་བ་མཆོག་དང་། ཁྲིམས་ཞིབ་པ་གཞན་རྣམ་གཉིས། སྤྱི་འཐུས་ཚོགས་གཙོ་མཆོག་དང་། སྲིད་སྐྱོང་མཆོག སྤྱི་འཐུས་ཚོགས་གཞོན་མཆོག ལྷན་ཁང་ཁག་གི་བཀའ་བློན་རྣམ་པ། རང་དབང་ཅན་གྱི་སྡེ་ཚན་འགན་འཛིན་རྣམ་པ། འདེམས་ལྷན་ཚོགས་མི། བདམས་ཐོན་འོས་བསྡུའི་འགན་འཛིན་ལས་འཕར་བཅས་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་བཞུགས་གྲལ་འཁོད་བསྟུན།
སྐུ་མགྲོན་རྣམ་པར་རང་ལུགས་ལྟར་ཕྱེ་མར་ཆང་ཕུད་འདེགས་འབུལ་ཞུས་རྗེས་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་ནས་༸གོང་ས་༸སྐྱབས་མགོན་ཆེན་པོའི་༸སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་བསྟུན། བདམས་ཐོན་འོས་བསྡུའི་འགན་འཛིན་ལས་འཕར་བསྟན་འཛིན་ཆོས་འཕེལ་ལགས་དང་། དགེ་བཤེས་བསྟན་པ་བཀྲིས་རྣམ་གཉིས་ནས་རིམ་བཞིན་རྟེན་གསུམ་འདེགས་འབུལ་ཞུས། དེ་རྗེས་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་བདམས་ཐོན་འོས་བསྡུའི་འགན་འཛིན་ལས་འཕར་རྣམ་གཉིས་ཀྱིས་ལས་ཁུར་དམ་འབུལ་ཞུས་མཚམས། འོས་བསྡུ་ལས་ཁུར་བདམས་ཐོན་པ་རྣམ་གཉིས་ཀྱིས་དམ་འབུལ་མ་དེབ་ཏུ་མཚན་རྟགས་བཀོད་པ་དང་། མཛད་གཙོ་རྣམ་པར་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུ་བ་དང་སྦྲགས། མཛད་གཙོ་རྣམ་པས་རིམ་བཞིན་འོས་བསྡུའི་འགན་འཛིན་ལས་འཕར་གཉིས་ལ་རྟེན་འབྱུང་མཇལ་དར་བསྒྲོན་ཏེ་དམ་འབུལ་མཛད་སྒོ་གྲོལ། །
