༢༠༡༥ ཟླ་ ༦ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་ཉིན་ཨི་ཊཱ་ལིའི་རེ་ཌི་ཀལ་ཆབ་སྲིད་ཚོགས་པའི་ཚོགས་མི་སྐུ་ཞབས་མར་ཀོ་པེ་ནེ་ལོ་མཆོག་གིས་མཛད་སྒོ་དང་འབྲེལ་བའི་གསུང་བཤད་དོན། ༸གོང་ས་མཆོག་གིས་འཇིག་རྟེན་འདིར་བདེ་སྐྱིད་ཁྱབ་སྤེལ་མཛད་པ་དེར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། བདེ་སྐྱིད་ནི་ཧ་ཅང་གལ་ཆེན་པོ་རེད། ཐེངས་ཤིག་སྐུ་ཉིད་མཆོག་གིས་བོད་མི་དང་ང་ཚོའི་ཆབ་སྲིད་ཚོགས་པ་ཙམ་མིན་པར་རྒྱ་མི་རིགས་ཚོ་ལའང་ཐོབ་ཐང་དགོས་རྒྱུ་ཧ་ཅང་གལ་ཆེ་ཡིན་སྐོར
་བཀའ་སློབ་སྩལ་ཡོད། སྐུ་ཉིད་མཆོག་གིས་ལམ་སྟོན་འོག་མི་ཕན་ཚུན་དབར་མཐུན་སྒྲིལ་གོང་བུ་གཅིག་གྱུར་ཡོང་བ་དང་། རང་གིས་རང་ལ་དྲིན་ལན་ཡག་ཤོས་དེ་རང་གི་གཉེན་ཉེ་འཁོར་ཙམ་མིན་པར་རང་གི་དགྲ་བོ་ཚུན་ཆད་ལའང་མིའི་འདུ་ཤེས་འོག་ནས་གཅེས་འཛིན་བྱེད་དགོས་པའི་ལམ་སྟོན་མཛད་པ་དེར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། དགའ་སྤྲོའི་རྣམ་པ་རབ་ཏུ་འཁོལ་བའི་དེ་རིང་གི་མཛད་སྒོ་འདིར་མི་ཙམ་མ་ཟད། སྤྲ་དང་སྤྲིའུ་ཚུན་ཆད་ནས་ཀྱང་དགའ་སྤྲོའི་དཔལ་ལ་རོལ་ནས་ཆོས་རྭའི་ཐོག་ཁའི་སྟེང་རང་དབང་ཐོག་རྩེད་མོར་རོལ་བཞིན་འདུག
དེ་རིང་ང་ཚོ་འདིར་འཛོམས་ནས་ང་ཚོའི་དགྲ་བོར་བརྡ་ལན་གང་འདྲ་ཞིག་གཏོང་བཞིན་ཡོད་བརྗོད་ན། ཕན་ཚུན་འགལ་ཟླའི་འདུ་ཤེས་ཁོ་ན་འཛིན་ནས་འཐབ་རྩོད་བྱས་ན་དགོས་པ་མེད་ཅིང། དེ
་ལས་ལྡོག་སྟེ་ཕན་ཚུན་མི་མཐུན་པ་རྣམས་ཞི་མོལ་གྱི་ལམ་ནས་སེལ་ཐུབ་རྒྱུ་ཡིན་པའི་བརྡ་ལན་ཞིག་གཏོང་བཞིན་ཡོད། དེར་བརྟེན་རང་གི་དགོས་འདུན་རྣམས་བདེན་པའི་ཨུ་ཚུགས་ཀྱིས་ལམ་ནས་བསྒྲུབ་རྒྱུའི་ཆོད་སེམས་རྒྱུན་སྐྱོང་བྱེད་བཞིན་པའི་རྣམ་པ་ཞིག་ལྷན་འཛོམས་འདིས་མཚོན་ཐུབ། ངས་དུས་ཚིགས་གསལ་པོ་དྲན་མ་སོང་། སྐུ་ཉིད་མཆོག་གིས་སྐབས་ཤིག་ལ་བོད་མིའི་ཆབ་སྲིད་ཀྱི་དབུ་ཁྲིད་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་ལ་རྩིས་སྤྲོད་མཛད་རྒྱུའི་དགོངས་བཞེད་རླབས་ཆེན་ཞིག་བཞེས་ནས་ད་ཆ་བོད་མི་མང་ཚོགས་རྣམས་ཀྱིས་དེར་མོས་མཐུན་ཞུས་ཡོད། དེ་ནི་ཟུར་གནས་བློ་ལྡན་བདག་ལྟ་བུས་བློ་ཡུལ་དུ་ཤོང་དཀའ་བ་ཞིག་བྱུང་།
དེར་བརྟེན་སྐབས་དེར་ངས་༸གོང་ས་མཆོག་གིས་འུར་སྒྲོགས་མཛད་པ་ལས་དོན་དངོས་སྐུ་དབང་མི་མང་ལ་རྩིས་སྤྲོད་མཛད་ཨེ་ཡོང་བསམ་པའི་ཚོར་སྣང་བྱུང་། དེར་བརྟེན་རླབས་ཆེན་གྱི་དགོངས་བཞེད་འདི་ལྟ་བུ་མཛད་པ་དེར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། ༸གོང་ས་མཆོག་སྐུ་ཉིད་ཀྱིས་བོད་རང་བཙན་མ་རྩོད་པར་རང་སྐྱོང་རྩོད་རྒྱུའི་བཀའ་སློབ་སྩལ་ཡོད། བཀའ་སློབ་དེ་དག་ཁ་ཞེ་གཉིས་མེད་ཐོག་ནས་ཡིན་པ་ཀུན་གྱིས་ངོས་འཛིན་ཞུ་བཞིན་ཡོད། རླབས་ཆེན་གྱི་དགོངས་བཞེད་དེ་དག་ནི་མགོན་པོ་གང་ཉིད་མཆོག་གིས་བྱམས་བརྩེའི་འདུ་ཤེས་ལས་བྱུང་བ་ཞིག་ཡིན། ད་བར་བོད་མི་མང་པོས་རང་ལུས་མེར་སྲེག་བཏང་ཡོད། འོན་ཀྱང་ད་ཆ་སྐུ་ཉིད་མཆོག་གིས་བོད་མིའི་ཆབ་སྲིད་ཀྱི་དབུ་ཁྲིད་མི་མང་ལ་རྩིས་སྤྲོད་མཛད་པའི་རླབས་ཆེན་གྱི་མཛད་རྗེས་ལ་བརྟེན་ནས་བོད་མི་ཚོར་རེ་བ་གསར་པ་ཞིག་བྱུང་བར་བརྟེན་རང་ལུས་མེར་སྲེག་གི་ལས་འགུལ་མཚམས་འཇོག་ཡོང་རྒྱུའི་རེ་བ་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་།།
