༢༠༡༥ ཟླ་ ༦ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གྱ་སྟོན་གྱི་མཛད་སྒོ་ཉིན་གཉིས་པར་ཞྭ་དཀར་གཡུང་དྲུང་བོན་གྱི་སྐྱབས་རྗེ་སྨན་རི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་གིས་གསུང་བཤད་གནང་དོན། ཆོས་ཀྱི་ཞིང་ས་ཆེན་པོའི་ཆ་ཤས་སུ་གྱུར་པ། མདོ་སྨད་ཆོལ་ཁའི་དབུས་རྒྱུན་ནས་ལྷར་བཅས་སྲིད་ཞིའི་གཙུག་རྒྱན་འཛམ་གླིང་ཞི་བདེའི་དེད་དཔོན་ཆེན་པོ། གཞིས་བྱེས་བོད་མི་ཡོངས་ཀྱི་འདི་ཕྱིའི་སྐྱབས་གནས་དམ་པར་གྱུར་པ། ༸གོང་ས་ལྷ་མིའི་རྣམ་འདྲེན། ྋསྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ། རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ། སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག གནས་ཀྱི་མཆོག་གྱུར་ལྷོ་རྒྱལ་འཛམ་བུའི་གླིང་དུ་སྐུའི་མཚན་དཔེ་མངོན་པར་བཞད་ནས། ཕྱི་ལུགས་ལྟར་ན་དགུང་གྲངས་བརྒྱད་ཅུར་བཞེས་པའི་སྐུའི་འཁྲུངས་སྐར། གྱ་སྟོན་ཞེས་པ་གོ་སྒྲིག་ཞུས་པའི་མཛད་སྒོ་འདིའི་ཚོགས་མགོན་དུ་༸ཞབས་སོར་བཀའ་དྲིན་བསྐྱངས་གནང་མཛད་པ། ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དབུས་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང་། སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཝིར་བྷ་ཌ་ར་སིངྒ་མཆོག དེ་བཞིན་དཔལ་ལྡན་མི་དབང་སྲིད་སྐྱོང་མཆོག་གིས་དབུས་བཙན་བྱོལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་སོགས། མདོར་ན་དེ་རིང་སྐལ་བཟང་གི་མཛད་སྒོ་འདིར། དགའ་དད་སྤྲོ་གསུམ་གྱི་སྒོ་ནས་ཕེབས་པའི་ཕྱི་ནང་མི་རིགས་ཡོངས་ལ། ངས་གཞིས་བྱེས་བོན་པོའི་ལྷ་སྡེ་མི་སྡེ་ཡོངས་ཀྱི་ཚབ་ཞུས་ཏེ་གུས་བརྩི་ཆེན་པོས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།
དེ་རིང་གི་ཉིན་མོ་འདི་ནི་སྤྱིར་སྐྱེ་འགྲོ་ཡོངས་དང་། སྒོས་སུ་ངེད་ཅག་ཁ་བ་གངས་ཅན་པ་ལ་མཚོན་ན། དགའ་དད་སྤྲོ་གསུམ་གྱིས་ཁེངས་པ། ས་ཐོབ་ཀྱི་དགའ་བ་ལས་ཀྱང་མཆོག་ཏུ་གྱུར་བ་དགའ་བ་ཚད་མེད་སྐྱེ་པའི་ཉིན་མོ་ཞིག་ཡིན་པ་ངོས་འཛིན་ཞུ་བཞིན་ཡོད། དེ་ཡང་སྤྱིར་མཐའ་ཀླས་པའི་འཇིག་རྟེན་གྱི་ཞིང་དུ། ཐུགས་རྗེ་ཚད་མེད་པ་སྒྱུ་འཕྲུལ་རབ་འབྱམས་ཀྱི་གསང་གསུམ་སྤྲུལ་པའི་རོལ་གར་བསྒྱུར་ཏེ། འགྲོ་དོན་མཛད་པའི་འཕྲིན་ལས་བསམ་གྱིས་མི་ཁྱབ་པ་དག རྒྱལ་བས་ཀྱང་བརྗོད་པར་མི་ནུས་ན། ཚུར་མཐོང་གི་སྐྱེ་བོ་བདག་ལྟ་བུས་དེ་བས་ཀྱང་བརྗོད་པར་མི་ནུས། འོན་ཀྱང་ཐམས་ཅད་མཁྱེན་པ་དགེ་འདུན་གྲུབ་པ་ནས་ཉེ་བར་བཟུང་བའི་༸རྒྱལ་བའི་དབང་པོ་སྐུ་ཕྲེང་བཅུ་བཞིའི་བར་གསུམ་ལྡན་ངུར་སྨྲིག་འཆང་བའི་སྐུ་ཕྲེང་ནོར་བུའི་དོ་ཤལ་མཚར་དུ་མངར་བ་བྱོན་ཏེ། ཐབས་མཁས་ཆོས་སྲིད་ཟུང་འབྲེལ་གྱི་སྒོ་ནས་བོད་ཁམས་ཀྱི་སྐྱེ་འགྲོ་རྣམས་ཞི་བདེ་ལ་བཀོད་པར་མཛད།
ལྷག་པར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཉིད། མས་བོར་བའི་དྭ་ཕྲུག་ཐང་ལ་ལུས་པ་ལྟ་བུའི་བོད་འབངས་རྣམས་ལ་མི་བཟོད་པའི་སྡུག་བསྔལ་མྱོང་དགོས་བྱུང་བའི་དུས་འདིར། བུ་གཅིག་མ་བཞིན་བརྩེ་བ་ཆེན་པོས་བསྐྱངས་གནང་མཛད་དེ། ཆོས་སྡེ་གསར་བཙུགས་ཀྱིས་བཤད་སྒྲུབ་ཀྱི་བསྟན་པ་རྒྱ་ཆེ་སྤེལ་གནང་མཛད་ཅིང་། དེ་བཞིན་གཞིས་ཆགས་དང་སློབ་གྲྭ་ལ་སོགས་གསར་འཛུགས་ཀྱིས་བྱེས་འཁོད་བོད་མི་རྣམས་ལ་ཕུན་སུམ་ཚོགས་པའི་ཁྱིམ་གཞིས་གསར་བསྐྲུན་གྱིས་བཀའ་དྲིན་མཛད། དེ་བཞིན་འཛམ་གླིང་རྒྱལ་ཁབ་གཞན་རྣམས་ལ་མང་གཙོ་དང་རང་དབང་གི་ཆེད་དུ་ལུས་སྲོག་བརྒྱ་ཕྲག་མང་པོ་འགྲོ་གྲོན་བཏང་སྟེ་ཐོབ་ཐང་རྩོད་བཞིན་ཡོད་ནའང་། ངེད་ཅག་རྣམས་ལ་མང་གཙོ་མར་གསོལ་རས་སྩལ་བ་དང་། ཆོས་བརྒྱུད་དང་ཆོས་ལུགས་ལ་སོགས་རང་རང་གི་གང་མོས་བཞིན་རང་དབང་དུ་ལོངས་སུ་སྤྱོད་པའི་དུས་རབས་དང་མཐུན་པའི་བཀའ་དྲིན་བླ་མེད་དུ་སྩལ་གནང་མཛད་པར། འཛམ་གླིང་སྐྱེ་འགྲོ་ཀུན་གྱིས་བསྟོད་བསྔགས་ཀྱི་མེ་ཏོག་འཐོར་བཞིན་ཡོད།
དེས་ན་དུས་དེ་རིང་ནས་བཟུང་སྟེ་ངེད་ཅག་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་དྲན་པ་ཙམ་གྱིས་མི་ཆོག་པར། ༸གོང་ས་མཆོག་གི་ལེགས་ཉེས་བླང་དོར་གྱི་བཀའ་སློབ་ལམ་སྟོན་མཛད་པ་རྣམས་ཉམས་སུ་ལེན་རྒྱུ་ནི་གལ་ཆེ་པོ་རེད་བསམ་བཞིན་ཡོད། ལྷག་པར་༸གོང་ས་མཆོག་གི་ཐུགས་ཀྱི་དགོངས་བཞེད་བླ་ན་མེད་པ། བྱམས་པ་དང་སྙིང་རྗེའི་སྒོ་ནས་འཛམ་གླིང་ཞི་བདེར་འབྱུང་རྒྱུར་ཉམས་ལེན་ལ་སྦྱོང་བརྡར་མཛད་དེ། སྤྱིར་འཛམ་བུ་གླིང་དང་། བྱེ་བྲག་ཏུ་ཁ་བ་གངས་ཅན་ལྗོངས་ཀྱི་སྐྱེ་འགྲོ་རྣམས་ལ་ཞི་བདེའི་འོད་སྣང་ཤར་བ་ཞིག་འབྱུང་ཐུབ་པ་ཡིན་ན། ༸གོང་ས་མཆོག་གི་བཀའ་དྲིན་གསོ་བ་དང་སྐུ་ཚེ་ཁྲི་ལོར་བརྟན་པའི་ཞབས་བརྟན་ཡང་དེ་ལས་ལྷག་པ་ཞིག་ཡོད་པ་མ་རེད་དྲན་གྱི་འདུག
མཐའ་དོན་དུ་ལྷར་བཅས་སྲིད་བཞིའི་གཙུག་རྒྱན་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་གསང་གསུམ་ཡིད་བཞིན་ནོར་བུར། མི་མཐུན་པའི་མཚན་མ་མཐའ་དག་ཞི་སྟེ། སྤྱིར་མཁའ་ཁྱབ་ཀྱི་འགྲོ་བ་ཡོངས་དང་བྱེ་བྲག་བོད་ཁ་བ་རི་པའི་བསོད་ནམས་ཀྱི་དཔལ་དུ། སྐུ་ཚེ་མི་ཤིགས་གཡུང་དྲུང་གི་ཁམས་སུ་ནམ་ཡང་ནུབ་པ་མེད་པར་སྐུ་ཚེ་ཁྲི་ལོ་ནས་ཁྲི་ལོར་བརྟན་ཏེ། ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་གསོལ་འདེབས་སྨོན་ལམ་ཞུ་བ་དང་། དེ་བཞིན་བསྟན་འཛིན་གྱི་སྐྱེས་བུ་གང་ན་སུ་བཞུགས་རྣམས་ཀྱི་སྐུ་ཚེ་ཞབས་པད་བརྟན་ཞིང་མཛད་འཕྲིན་གོང་ནས་གོང་དུ་འཕེལ་ཏེ། མཁའ་ཁྱབ་ཀྱི་སྐྱེས་འགྲོ་རྣམས་ཞི་བདེའི་དཔལ་ལ་ལོངས་སུ་སྤྱོད་པའི་སྨོན་ལམ་ཞུ་བ་དང་། དེ་རིང་གི་སྐལ་བཟང་གྱ་སྟོན་གྱི་མཛད་སྒོའི་གོ་སྒྲིག་ཞུ་བ་པོ་ཚོགས་པ་དང་ལྷན་རྒྱས་ཡོངས་ལ་ངས་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་བཞིན་ཡོད། ཅེས་གསུང་བཤད་གནང་ཡོད།།
