༢༠༡༥ ༦ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ཆིབས་འགྲོའི་ཐོག་ག་གྷལ་གནམ་ཐང་བརྒྱུད་ལྡི་ལིར་ཆིབས་སྒྱུར་བསྐྱངས་ནས་ཕྱི་ཚེས་ ༢༧ ནས་ ༣༠ བར་ཨིན་ཡུལ་དུ་ཆིབས་སྒྱུར་གྱིས་ག་ལ་སི་ཊོན་བྷུ་རི་དུས་སྟོན་Glastonbury Festival ཐོག་ལྷན་བཞུགས་མཛད་རྗེས་ཨལ་ཌར་ཤོ་ཊི་ Aldershot གྲོང་ཁྱེར་དུ་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག དེ་ཡང་ཕྱི་ཟླ་ ༦ ཚེས་ ༢༨ ཉིན་མགོན་པོ་གང་ཉིད་མཆོག་གོང་བརྗོད་དུས་སྟོན་གྱི་ཚོགས་མགོན་དུ་ཆིབས་སྒྱུར་བསྐྱངས་རྒྱུ་དང་། ཕྱི་ཚེས་ ༢༩ ཉིན་༸གོང་ས་མཆོག་ཨིན་ཡུལ་ནང་པའི་མཐུན་ཚོགས་ཀྱིས་གསོལ་འདེབས་ཞུས་དོན་ལྟར། ཨལ་ཌར་ཤོ་ཊི་གྲོང་ཁྱེར་དུ་ཆིབས་སྒྱུར་བསྐྱངས་ནས་ཁུལ་དེར་བལ་པོའི་མང་ཚོགས་གཙོ་བོར་གྱུར་བའི་དད་ལྡན་མི་གྲངས་ ༦༠༠༠ བརྒལ་བར་རྩེད་ཐང་ ESS Stadium Aldershot ཞིག་ཏུ་དུས་རབས་ ༢༡ ནང་པ། ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། ས་གནས་དེར་དེ་སྔ་ཕྱི་ལོ་ ༢༠༡༢ ལོར་༸གོང་ས་མཆོག་ཆིབས་སྒྱུར་བསྐྱངས་འདུག དེ་ཉིན་མང་ཚོགས་ལ་བཀའ་སློབ་དབུ་འཛུགས་མ་མཛད་པའི་སྔ་རོལ་དུ་ཐོག་མར་༸གོང་ས་མཆོག་གིས་ས་གནས་དེར་ནང་པའི་དགོན་པ་གསར་པ་ཞིག་དབུ་འབྱེད་མཛད་རྒྱུ་དང་། དེ་རྗེས་བལ་པོ་ནང་པའི་དད་ལྡན་མང་ཚོགས་ཀྱིས་གཙོས་ཆོས་ལུགས་འདྲ་མིན་གྱི་རྗེས་འབྲང་པ་བཅས་ཚང་འཛོམས་ཐོག་ཉེ་ལམ་བལ་ཡུལ་དུ་ས་ཡོམ་གྱི་གོད་ཆག་ཕོག་པ་རྣམས་ཀྱི་ཆེད་སྨོན་ལམ་གསུང་འདོན་མཛད་རྒྱུ་ཡིན་འདུག དེ་ཡང་སྨོན་ལམ་གོ་སྒྲིག་ཚོགས་ཆུང་གི་ཚོགས་གཙོ་ཀ་ཇི་ཤར་པ་ལགས་ཀྱིས་གསུང་དོན། ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སླར་ཡང་ས་གནས་འདིར་གདན་ཞུ་ཐུབ་པར་ང་ཚོ་འདིར་ཨིན་ཡུལ་དུ་གནས་སྡོད་བལ་པོ་ནང་པ་རྣམས་ཧ་ཅང་སྐལ་བ་བཟང་པོ་ཞིག་བྱུང་བས་ང་ཚོ་ཚང་མ་སེམས་གཏིང་ནས་དགའ་དད་སྤྲོ་གསུམ་གྱི་འཁེངས་ནས་ཡོད། ཐེངས་འདིར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ས་གནས་འདིར་ཆིབས་སྒྱུར་བསྐྱངས་ནས་བལ་ཡུལ་དུ་ས་ཡོམ་གྱི་གོད་ཆག་ཕོག་པ་རྣམས་ཀྱི་ཆེད་ཐུགས་སྨོན་གསོལ་འདེབས་མཛད་རྒྱུ་ཡིན་པ་དེས་དཀའ་སྡུག་འོག་མྱོང་བཞིན་པའི་རྗེས་ཤུལ་ནང་མི་རྣམས་ལ་སེམས་གསོ་ཤུགས་ཆེ་ཞིག་འཐེབ་ངེས་རེད། ཅེས་གསུངས། དེ་ཡང་༸གོང་ས་མཆོག་ཨིན་ཡུལ་ནང་གི་མཛད་འཕྲིན་ཁག་ལེགས་གྲུབ་རྗེས་ཨ་རིར་ཆིབས་སྒྱུར་བསྐྱངས་རྒྱུ་དང་།
ཁུལ་དེར་དེ་སྔའི་ཨ་རིའི་སྲིད་འཛིན་སྐུ་ཞབས་ཇོར་ཇི་ཌབ་ལུ་བྷུ་ཤི་མཆོག་གི་བསྟི་གནས་ཁང་ George W. Bush Presidential Center དུ་བགྲོ་གླེང་ལྷན་ཚོགས་ནང་ལྷན་ཞུགས་མཛད་ནས་བཀའ་སློབ་སྩལ་རྒྱུ་ཡིན་པ་མ་ཟད། ཕྱི་ཟླ་ ༧ ཚེས་ ༩།༡༠ བཅས་ཉིན་གྲངས་གཉིས་རིང་ཨ་རི་དང་ཁེ་ན་ཌའི་ནང་གནས་སྡོད་བོད་མི་རྣམས་ཀྱིས་མགོན་པོ་གང་ཉིད་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་གྱི་མཛད་སྒོ་ཨ་རིའི་གྲོང་ཁྱེར་ནིའུ་ཡོཀ་ཏུ་གཟབ་རྒྱས་ངང་སྲུང་བརྩི་ཞུ་རྒྱུ་ཡིན་འདུག་པ་མ་ཟད། ཕྱི་ཚེས་ ༡༠ ཉིན་གྱི་ཕྱེད་ཡོལ་དུ་ཨ་རིའི་གྲོས་ཚོགས་འཐུས་མི་དང་། ཆོས་ལུགས་འདྲ་མིན་གྱི་དབུ་ཁྲིད། དེ་བཞིན་མི་མང་སྟོང་ཕྲག་བརྒལ་བ་འདུ་འཛོམས་ཐོག་༸སྐུའི་གྱ་སྟོན་གྱི་མཛད་སྒོ་སྲུང་བརྩི་ཞུ་རྒྱུ་ཡིན་འདུག་པ་དང་། དེ་ཡང་བཀའ་དྲིན་རྗེས་དྲན་ཚོགས་ཆུང་གི་ཚོགས་གཙོ་དང་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ཀྱིས་གསུང་དོན། ༸གོང་ས་མཆོག་ནི་བོད་མི་ཙམ་མ་ཟད། སྐྱེ་འགྲོ་གྲངས་ལས་འདས་པས་དད་གུས་དང་བསྔགས་བརྗོད་ཆེན་པོ་ཞུ་ཡུལ་གྱི་སྐྱེ་ཆེན་དམ་པ་ཞིག་ཡིན་པ་དང་།་མགོན་པོ་གང་ཉིད་མཆོག་གི་བཀའ་སློབ་དེས་འཛམ་གླིང་ཕྱོགས་ཀུན་ཏུ་མི་གྲངས་ཧ་ཅང་མང་པོར་སེམས་འགུལ་དང་སྙིང་སྟོབས་སྐྱེ་གཞི་ཞིག་ཆགས་ཡོད། ཐེངས་འདིར་༸སྐུའི་གྱ་སྟོན་མཛད་སྒོ་གཟབ་རྒྱས་ཤིག་སྲུང་བརྩི་ཞུ་རྒྱུའི་དགོས་དམིགས་གཙོ་བོ་ནི་ང་ཚོས་༸གོང་ས་མཆོག་གིས་ད་བར་ཡི་ཤེས་དབྱིངས་འབྱེད་ཀྱིས་སྐྱེ་འགྲོ་ཀུན་ལ་བཀའ་སློབ་ལམ་སྟོན་རྒྱུན་ཆད་མེད་པར་སྩལ་བ་དེར་བཀའ་དྲིན་རྗེས་དྲན་ཞུ་རྒྱུའི་ཆེད་ཡིན། ཞེས་གསུངས། གཞན་ཡང་ཐེངས་འདིར་༸གོང་ས་མཆོག་གིས་མང་ཚོགས་གཏམ་བཤད་དང་བགྲོ་གླེང་ལྷན་ཚོགས་སོགས་ནང་ལྷན་ཞུགས་མཛད་རྒྱུའི་མཛད་འཆར་རྒྱ་ཆེ་ཡོད་འདུག
